NEHAMIX 2
2
Nehamix Hu Ka Veng Yerusaliem
1Yam kwang simiang Atazarit ka haktiex tixnga num tix num ka daux khix nisan mai aux teei rawm plix siiet deuh ka sivoe ngai nawh mai tawx ankix ka simiang heue. Glang ka in ang sax koe krax laux rhawm plak sivoe nawh tix bawg kawx heue. 2Mawh kheu nan simiang ah nin ka aux, “Maix ang tie koe krax saux krax ngia kawx, kheu patix ngai baoh maix lai ngeem yuh nan lie? In ang tie mawh tidtix, mawh pa laux rhawm maix heue. “Khaix an aux hoik koe krax lhat graung, 3mai aux deeh ah nin ka simiang, kieh simiang lang ju heue. Miex hoik laux leeing dee koe simeeig keeing aux khankix mai siviex veng khankix kawx hoik gleeing ka ngu, #2Sim 25:8-10; 2Been 36:19; Ye 52:12-14 ngai baoh aux lai ang ngeem yuh ka mawh lie?” 4Khaix an simiang ah nin ka aux, “Mawh sang mhaing maix ceu patix?” Mawh kheu nan aux hoik rawg bwan ka Siyiex raoma heue. 5Aux ah nin ka simiang, “Phan an mawh pa khaw rhawm simiang mai phan kawncau maix hoik pon krax pa caux rhawm ka plak sivoe ngai Maix, aux rawg maix ploi ti hu ka haktiex Yudax, ka daux veng dee koe simeeig keeing aux khankix, sonsang deeh pon cox sum aux ankix heue.” 6Yam an simiang chawk aux ah nin, Laux simiang kawx ngawm praok nawh, “Mawh sang rheeng krax hu maix miex grheeng? sang deeh hoek yam mawx lie? Mawh kheu nan, an hoik mawh pa khaw rhawm simiang sonsang ploi aux hu mai aux hoik tat ti deuh bawg yam heue. 7Lheu khaing an aux ah nin ka simiang, “Phan in mawh pa khaw rhawm simiang, tawx aux viex lai son cao kwang kien baoh haktiex toi rawm klawng plak klip singaix khankix, sonsang pon tawx kix akhwang ka aux sonsang pon tiang aux ti hu tom hoek ka haktiex Yudax, 8mai baox tiiem ti tawx lai tix pheen ka Asapha pa mawh cao pa pau daux nong cie simiang son tak sang tawx nawh khaox an khankix ka aux, pa sang yuh khaox lat siviex tab nyiex bwan pa sitoe tix ka guh veng mai nyiex pa sang ot aux, awm koe plawng taix pa mhawm Siyiex piang aux, simiang kawx tawx ankix ka aux heue.” 9Khaix an aux hu ka cao kwang kien baoh haktiex toi rawm klawng mai plak klip singaix mai tawx lai pa tiiem simiang ka kix heue. Yam in simiang ploi cao kaing naing cub kru naing khankix mai pui naing brung khankix hu tau mai aux heue. 10Yam mhong Sanbalat ceu pui Horonix mai Tobix cao kaing ceu pui Amon khankix ka grawng an, kix kied sung sang rhawm ka hoek pui tix kaux sawg ti yuh pa mhawm son kawn praix ceu pui Isarelax khankix heue.
Nehamix Sum Guh Veng Khraox
11Mawh kheu nan aux hoek ka veng Yerusaliem mai ot tan loe ngaix heue. 12Khaix an aux yaog ti kaoh yam ponsawm khawm pui tiblah pa ot tau mai aux mai aux ang krai pui tix kaux kawx mhong ka ceu pa sau Siyiex ka daux rhawm aux, son kaing pa sang yuh tix ka daux veng Yerusaliem heue. Lheu khaing tobrie pa brug aux, tobrie tang mu ang lai koe mai aux heue. 13Aux lih hu plak praix yam ponsawm, ka siviex ngawd mai hoek ka rawm siyawng mai ka siviex seeing, dee tik pui pa seeing brai khankix mai cied ti yaox ka guh veng Yerusaliem pa hoik grhup hoik groing mai siviex khankix pa hoik gleeing ka ngu heue. 14Khaix an aux deeh hu ka plak siviex rawm keut mai ka dung rawm simiang, viang mawh nan krax sang hu brung cie aux ang lai koe heue. 15Mawh kheu nan ka daux ponsawm, aux lih hu ka plak siviex daux ngawd mai cied ti yaox ka guh veng, khaix an aux deeh veeh tix plak khaix mai laig ka daux siviex daux ngawd mai ing ka daux krax an heue. 16Cao pa kwang veng khankix ang tawng ka dee hu aux mai ceu pa yuh aux khankix, kheu aux ang nyang krai grawng inkix, ka pui Yudax mai ka cao giex kaing li, ka cub simiang, ka cub cao pa kwang veng mai ka pui tang kaux khankix, pui mawx pa sang yuh ka kaing heue. 17Khaix an aux ah nin ka kix, “Pex hoik yaox krax pa kha rhawm ex in mai veng Yerusaliem hoik grhup groing mai grawng pa hoik gleeing siviex veng khankix ka ngu, hoek heue mai kieh ex deeh sum guh veng Yerusaliem, sonsang ang lai koe lox sibriem ka ex heue.” 18Aux krai grawng koe riang rao plawng taix Siyiex tau mai aux mai grawng gumlox pa mhawm simiang pa hoik krai nawh ka aux heue. Khaix an kix ah nin, “Ex kaox mai sum.” Kix yaog taix yaing caong paox tix sonsang yuh ka kaing jhaw ceu pa mhawm in heue. 19Viang mawh nan yam mhong Sanbalat ceu pui Horonix mai Tobix, pa mawh cao kaing ceu pui Amon mai Geshem ceu pui Arap khankix ka grawng an, kix hoik nyiah mai sibriiem ka ex ah nin, “Pa yuh pex in mawh ceu patix lie? mawh sang deeh tieh feen pex ka simiang lie?” 20Mawh kheu nan aux deeh pawk lox kix ah nin, “Siyiex meung raoma tak sang tawx akhwang yix yuh tom hoik heue. Yix pa mawh kawncau Nawh khankix, tak sang deeh sum, viang mawh nang phan mawx pex ang koe nyum ka daux veng Yerusaliem mai ang koe akhwang ti mhaing tidtix.
Currently Selected:
NEHAMIX 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012