EZARAX 10
10
Tik Bun Tang Ceu
1Glang yam kawn rawg Ezarax bwan mai glang yam kawn khyox khaw nawh mai yiiem khawm roik rawm ngai tix, gup tix ka plak sivoe ngai nyiex bwan Siyiex, cub pui hun khaing ceu pui Isarelax pa mawh simex, bun mai kawn nyawm khankix, kraix khrawm paox tix hoek ka nawh mai yiiem khawm tug rhawm tix sigrien sigre heue. 2Shekhanix kawn simex Yeshelax pa kaoh khaing daux cub kawn praix Elam khankix tix kaux mai ah nin ka Ezarax, “Ex hoik lud ka Siyiex ex mai hoik teei ti moeng pui tang ceu khaing daux pui haktiex an khankix, viang grawng in koe yuh nin kawx krax keud pot jun pot kawn koe ka daux ceu pui Isarelax heue. 3Mawh kheu nan kieh ex yuh sijax mukheu tau mai Siyiex ex yam in, sonsang pon tik ex cub bun inkix khawmuik mai kawn praix pa keh khaing kix, awm krax keud pa hoik tawx cao simiang ex mai khawm can pui pa hoik lhat hoik graung ka gumlox pingnyap Siyiex ex khankix mai yuh ankix awm pa koe lox tat jhawm prawng heue. 4“Kaoh heue, in mawh grawng beeh glawm maix heue, yix tak ot tau mai maix. Kieh koe pa kwa rhawm kwa mai yuh tix an heue.” 5Khaix an Ezarax yaog ti kaoh mai kieh cao kaing cao giex kaing li mai pui Lewix khankix mai pui Isarelax khankix, tiextu sonsang hawt yuh kix awm gumlox in heue. Mawh kheu nan kix hoik tiextu ka heue. 6Khaix an Ezarax yaog ti kaoh khaing plak sivoe nyiex bwan Siyiex mai hu laig ka daux lawg Yehohanan kawn simex Eliaship, mai yam hoek nawh tan, nawh ang ih blah mai ang nyaux rawm, mawh kheu nawh hoik ngia mai khi rhawm kheu jao son phimap pui pa kaoh khaing pa giex laung heue. 7Kix tawx lox hu ka daux haktiex Yudax mai veng Yerusaliem son doeh ru pa deeh giex hoek khaing pa giex laung khawmuik, sonsang kraix khrawm kix hoek ka daux veng Yerusaliem, 8mai can pui pa ang hoek ka daux loe singaix, awm lox pa hoik tat cao kaing mai kuad song khankix mai rhim kraung khrai sinngao nawh khawmuik mai gwieh tokaux nawh lih khaing cub pui hun pa hoik kaoh khaing pa giex laung tix heue. 9Mawh kheu nan cub simex ceu pui Yudax mai Binyamin khawmuik, khrawm paox tix ka veng Yerusaliem daux loe singaix heue. Ngaix an mawh khix dim tixnga ngaix, mai pui khawmuik ngawm tix ot ka daux bing pak sivoe nyiex bwan Siyiex, tau mai sikua lhat tix kheu jao grawng in mai kheu kied ting lhiex heue. 10Khaix an cao giex kiang li kaoh cung mai ah nin ka kix, “Pex hoik koe krax lud kheu hoik teei ti moeng bun pui tang ceu mai pex hoik nie thie phimap piang ceu pui Isarelax khankix heue. 11“Mawh kheu nan khyox khaw ka Siyiex keeing pex yam in mai yuh awm lox Nawh Cao, mai gwieh tokaux pex khaing pui haktiex an mai khaing moeng pui tang ceu khankix heue.” 12Khaix an cub pui hun khawmuik, deeh pawk lox pa kied ting ah nin, “Mawh heue, ex tak sang yuh awm lox hoik tat maix heue. 13Viang mawh nan pui kawn koe tom nie, mai kawn mawh bawg yam ting lih lhiex mai ex ang nyang pon hu cung plak praix heue. In ang tie mawh pa chix hoik daux tix ngaix ra ngaix, mawh kheu jao kawn kied nie koe pa lud ex ka grawh grawng in heue. 14Yuh bwanson kieh cao kaing khaing daux cub pui hun ex khawmuik ot tan, mai kieh pui pa ot ka daux veng ex, pa teei ti moeng pui tang ceu khankix hoek bleeh ka daux bawg yam pa hoik tat ti deuh, tau mai kuad song khankix khaing daux veng cao kix, tom hoek bawg yam hoik luan pa kied kin song rhawm Siyiex ex khaing ex ka son grawng in heue.” 15Mawh ngie Yawnasan kawn simex Asahelax mai Yahaziyax kawn simex Tikavax pa kieh pa thiang ka grawng in mai Meshulam mai Shabethie pa mawh pui Lewix khankix pa hoik joh jhan ka kix heue. 16Khaix an cub doeh ru pui pa giex laung khankix hawt yuh awm an heue. Cao giex kaing li Ezarax tau mai cao kaing doeh nyiex ma keeing nawh khankix, hoik mawh pa tang gwieh nawh ti deuhawm pa koe doeh nyiex ma keeing nawh khankix, ka daux ceu kaux kix ku kaux mai kix ngawm cied ti yaox grawng an khix kao tix ngaix heue. 17Yam hoek khix tix, tix ngaix kix hoik cied ka pui, pa hoik teei ti moeng bun pui tang ceu khankix heue.
Tik Moeng Pui Tang Ru
18Ka daux sinax cub kawn praix cao giex kaing li khankix pa hoik teei ti moeng bun pui tang ceu khankix hoik yaox awm in plak greem, khaing daux cub kawn praix Yawsux kawn simex Yozadak mai pux nawh pa mawh Maseyax, Eliaza, Yarip mai Gedaliyax khankix heue. 19Kix hoik kham sijax mukheu son tak sang tik kix moeng tix khankix mai pa hoik lud tix, kix teei ti tan yung tix mu khaing daux cub yung son phimap pa hoik lud kix heue. 20Khaing daux cub kawn praix Imerax, pa mawh Hananix mai Zebadix, 21khaing daux cub kawn praix Harim, pa mawh Meseyax, Eliyax, Shemayax, Yehelax mai Uziyax khankix, 22khaing daux cub kawn praix Pashurax, pa mawh Elionie, Maseyax, Ishamelax, Natanelax, Yozabat mai Elasa khankix heue. 23Khaing daux cub pui Lewix, tom mawh Yozabat, Shimi, Kelayax, pa mawh Kelata, Petahiyax, Yudax mai Eliaza khankix heue. 24Khaing daux cub cao pa ah lai rhax, tom mawh Eliaship, khaing daux cao pa pau siviex, tom mawh Shalum, Teliem mai Urix khankix heue. 25Pui tang kaux ceu pui Isarelax, pa kaoh khaing kawn praix Parot pa mawh Ramix, Yezix, Malakhix, Miyamin, Eliza, Malakhiyax mai Benayax khankix, 26khaing daux cub kawn praix Elam, tom mawh Matania, Zakharix, Yehelax, Abadix, Yeramot mai Elia khankix, 27khaing daux cub kawn praix Zadux, tom mawh Elionie, Eliaship, Matania, Yeramot, Zabat mai Azizax khankix, 28khaing daux cub kawn praix Bebie, tom mawh Yehohanan, Hananiyax, Zabie mai Atalie khankix, 29khaing daux cub kawn praix Banix, tom mawh Meshulam, Maluk, Adayax, Yashup, Shelax mai Ramot khankix, 30khaing daux kawn praix Pahat-mawbax, tom mawh Adanax, Khelelax, Benayax, Maseyax, Matania, Bezalelax, Binnui mai Manashe khankix, 31khaing daux cub kawn Harim, tom mawh Eliaza, Ishiyax, Malakhiyax, Shemayax, Simeon, 32Binyamin, Maluk mai Shemariyax khankix, 33khaing daux cub kawn praix Hashum, tom mawh Matenie, Matata, Zabat, Eliphaliet, Yeramie, Manashe mai Shimix khankix, 34khaing daux cub kawn praix Banix, tom mawh Madie, Amaram, Uelax, 35Beneyax, Bedeyax, Kheluk, 36Vanix, Meramot, Eliaship, 37Matania, Matenie, Yasaw, 38Banix, Binnui, Shimix, 39Shelemix, Nasan, Adayax, 40Makhanadebie, Shashie, Sharie, 41Azarelax, Shelamix, Shemarix, 42Shalum, Amarix mai Yosiep khankix, 43khaing daux cub kawn praix Nebo, tom mawh Yeyelax, Matithix, Zabat, Zebinax, Yadie, Yolax mai Benayax khankix heue. 44Inkix mawh can pui pa hoik teei ti moeng bun pui tang ceu khankix mai khaing daux cub kix tiblah, hoik koe kawn simex kawn bun tau mai moeng tix khankix heue.
Currently Selected:
EZARAX 10: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012