LIH HU 40
40
Yuh Nyiex Gox Bwan Man Ap Ka Siyiex
1Siyiex ah nin ka Mose, 2“Ka daux khix tix, tix ngaix maix tak sum nyiex gox bwan man bang kum pui hun. 3Maix tak deuh khui bwan sijax mukheu daux lawg mai tie ka man tie. 4Maix tak viex pheen hoek tau mai can kraung pa shiao ka piang mai khre ti deuh kraung nawh khankix mhawm mhawm maix tak viex pang jawk ten khri hoek mai tok kawk ngu khankix. 5Maix tak baox deuh khu khri dee tan, dee tok kix nyawng bhawng, ka plak sivoe khui bwan pa kham sakse mai sau man tie khankix, ka diang siviex nyiex gox bwan man. 6Maix tak deuh khu dee tan krax tan pa gleeing ka plak sivoe siviex nyiex gox bwan man bang kum pui hun. 7Maix tak deuh pan khoek sinax nyiex gox bwan man bang kum pui hun mai khu dee tan mai sau ti deuh rawm ka daux. 8Maix tak jung tix priex man tie hawt vung viang biang mai vhak ka dee laig kix daux siviex biang. 9Maix tak teei bee groi mai kraix ka nyiex gox bwan man mai ka can pa koe plak daux khawmuik maix tak kieh nawh singax khawmuik mai khankix tak mawh pa singax singeh. 10Maix tak kraix ka khu dee tan krax tan pa gleeing mai can kraung pa shiao khawmuik mai kieh khu dee tan an singax, an tak mawh pa singax khaing paox tix. 11Maix tak kraix ka pan khoek mai caong nawh khankix mai kieh nawh mawh pa singax. 12Maix tak viex Arun mai kawn simex nawh khankix hoek ka diang siviex nyiex gox bwan man bang kum pui hun tan mai heem kix. 13Maix tak tawx Arun ceep kraung pa singax singeh mai groi nawh ka bee, kieh nawh singax sonsang yuh nawh kaing cao giex kaing li Aux. 14Maix tak viex kawn simex nawh khankix hoek mai tawx kix ceep sibex dhah plak daux. 15Maix tak groi bee ka kix, awm hoik groi maix ka keeing kix, sonsang yuh kix kaing cao giex kaing li Aux, ka can pa hoik groi maix bee khankix, tak mawh pa kieh kix yuh kaing cao giex kaing li tom sidah doeh ru kix tix ju hoik tix ju leeing ju.” 16Mose yuh an khankix awm lox pa hoik tawm Siyiex khawmuik. 17Daux num ra, khix tix, tix ngaix, kix yaog jung nyiex gox bwan man mai sum kah. 18Mose yaog ti sum nyiex gox bwan man, sau daux jhup jaong mai tok ka phia, sau jhong mai jung rong nawh khankix. 19Nawh nih man lhop ka piang nyiex gox bwan man mai sau braux ka piang choek an, awm lox pa hoik tawm Siyiex ka nawh. 20Nawh teei khlawp simaox pingnyap sau ka daux khui, chup khaox glawm ka daux jhup khui mai sau dawb dang ngeung krax pa caux rhawm, ka piang khui. 21Nawh viex khui laig daux nyiex gox bwan man mai vhak man tie, sonsang tie nawh lawg dee koe teug awm lox pa hoik tawm Siyiex ka nawh. 22Nawh deuh pheen daux nyiex gox bwan man, bang kum pui hun, ka praok plak laong nyiex gox bwan man, ka plak praix man tie an khankix, 23khan kheu blah ka piang pheen ka plak sivoe ngai Siyiex, awm lox pa hoik tawm Siyiex ka Mose. 24Nawh deuh pang jawk ten khri, ka daux nyiex gox bwan man bang kum pui hun, see dee koe pheen plak an, ka plak seh nyiex gox bwan man, 25Nawh tok kawk ngu an khankix sivoe Siyiex, awm lox pa hoik tawm Siyiex ka Mose. 26Nawh deuh khu khri dee tan, ka daux nyiex gox bwan man bang kum pui hun ka plak sivoe man tie, 27mai nawh gleeing nyawng bhawng pa sioe bhawng ka piang an, awm lox pa hoik tawm Siyiex ka Mose. 28Nawh vhak man tie khankix, ka diang siviex nyiex gox bwan man. 29Nawh deuh khu dee tan krax tan pa gleeing ka plak sivoe siviex nyiex gox bwan man bang kum pui hun mai tan krax tan pa gleeing mai krax tan phawng nghox ca im ka piang an, awm lox pa hoik tawm Siyiex ka Mose. 30Nawh deuh pan khoek sinax nyiex gox bwan man bang kum pui hun mai dee tan, nawh sau ti deuh rawm ka daux sonsang khoek kix ti ka, 31Mose mai Arun khawm kawn simex nawh khankix khoek taix caong tix ka rawm an. 32Yam laig kix ka daux nyiex gox bwan man bang kum pui hun mai yam hoek kix dex khu dee tan, kix khoek taix caong tix awm lox pa hoik tawm Siyiex ka Mose. 33Nawh yaog ti jung man tie, hawt vung viang biang nyiex gox bwan man mai khu dee tan khawmuik mai nawh vhak man tie khankix ka diang siviex laig kix uik, mawh kheu nan, Mose hoik yuh kaing in khankix khawmuik heue.
Paiawm Min Pakngai Siyiex
(Si 9:15-23)
34Yam an paiawm ceep ka piang nyiex gox bwan man bang kum pui hun mai min pakngai Siyiex grum naog ka daux nyiex gox bwan man. 35Mose ang pon laig ka daux nyiex gox bwan man bang kum pui hun kheu hoik ceep paiawm ka piang mai min pakngai Siyiex hoik grum naog ka daux nyiex gox bwan man. 36Yam hoik deeh haok paiawm khankix khaing piang nyiex gox bwan man ku bawg, ceu pui Isarelax khankix lih hu krax hu tix. 37Phan paiawm ang nyang haok khaing tan, kix ang nyang hu krax hu tix, krox tom hoek singaix deeh haok paiawm. 38Mawh kheu ponngaix paiawm Siyiex koe ka piang nyiex gox bwan man mai yam ponsawm koe ngu pa jhan riang ka piang sivoe nyiex ma ceu pui Isarelax khanix, ka daux krax hu kix leeing lang krax heue.
Currently Selected:
LIH HU 40: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012