2 PETRUX 3
3
Sijax Mukheu Grawng Sang Hoek Simiang
1Pui pa moh aux khankix eue, in mawh lai pa tiiem aux ra pheen tix pheen ka pex mai ka daux khawm ra pheen aux hoik so ti kieh rhawm pa singax pex doh keud heue. 2Kheu sang doh keud pex ka gum lox pa hoik grux krai cao jhai pa singax singeh khankix mai ka lox tawm jhawm krai Cao Taoh, pa hoik tawx kawncau pa ting pex heue. 3Kieh tawng in phao ka, ka daux bawg yam singaix pa sidah khankix, pui pa map pa ang cee ang cak khankix, tak hoek mai viex pa map pa ang cee cak mai hawt hu ka alo tokaux tix,#Yud 18 4ah nin, “Lox mukheu grawng pa sang hoek Nawh koe dee mawx? Grawh grawng nawh jah ka singaix pa tax du khankix pa hoik laig it, kuceu khawmuik ca kawn mawh awm yam jah ti phan ti yuh heue.” 5Kix su ti ang rhawm tawng, grawh grawng raoma hoik koe tom di dix mai haktiex pa hoek ti kieh tan kieh sied mawh khaing rawm mai sigreung rawm, kheu gumlox Siyiex,#Jah 1:6-8 6mai ka gumlox Siyiex pa yuh nan, haktiex pa koe yam an, hoik laux hoik leeing kheu naog mai kheem rawm kah heue.#Jah 7:11 7Raoma mai haktiex pa koe yam in kawx hoik deuh son ngu mai hoik priex son singaix pa prawng ciyang mai pa sang yuh laux, kheu gumlox an, ka pui pa ang nab yam mai pa yuh pa ang khaw ka Siyiex khankix heue. 8Pui pa moh aux khankix eue, paw vi doh piawm ka grawng ceu in, tix singaix ka Siyiex awm tix rheng num mai tix rheng num, awm ngie tix ngaix heue.#Yaog 90:4 9Simiang ang nhim ka lox sijax mukheu Nawh, awm pui tix blah keud mawh pa nhim, viang mawh nan Nawh lang gun yeung ka pex mai ang rhawm kieh pui laux leeing tix kaux kawx, viang mawh nan Nawh mie pui khawmuik doh keud ka phimap tix heue. 10Ngaix Simiang tak sang hoek awm hoek pui briex.#Mat 24:43; Luk 12:39; 1The 5:2; Jhi 16:15Yam an raoma khankix tak sang grai hu tau mai lox pa kied sinum mai tokaux raoma khankix pa mawh khix, singaix mai simuing tak sang ceh sang laux ka pa kied hax mai haktiex mai can pa hoik yuh ka daux nawh tak sang proe ka ngu khawmuik heue. 11Mawh kheu hoik yaox pex grawng ceu in khawmuik tak sang grai hu, pex khaw ti mawh pui pa yuh ka mawx, ka daux krax twah klaung pa singax singeh mai pa chix nab yam mai pa yuh pa khaw ka Siyiex, 12jhak mai nied ti mie yam sang hoek singaix Siyiex. Mawh kheu singaix an raoma khankix tak sang gleeing ka ngu mai laux grai mai tokaux raoma khankix pa mawh khix, singaix mai simuing tak sang ceh sang laux ka pa kied hax heue. 13Viang mawh nan ex krox ti jhak son raoma pa khraox mai haktiex pa khraox, dee sang ot sang koe pa rahsee, awm pa khaw mai lox sijax mukheu pa tawx Nawh heue.#Isa 65:17, 66:22; Jhi 21:1 14Mawh kheu nan, pa moh aux khankix eue, kheu hoik yaox grawng krox pex ti jhak son ceu in khankix, nied ti coca yuh ka mawx sonsang pon pex ti yaox ka daux pa nhim mai pa loig pa ang koe dee ne ka sivoe ngai Nawh Cao heue. 15Sawn ceu pa lang gun yeung Cao Taoh ex, mawh krax pa taoh, awm puxaik pa moh ex Pawlux kawx, hoik tiiem ti tawx ka pex, awm pa khaw ka pingnya cuyi pa hoik tawx ka nawh, 16Awm nawh kawx hoik krai grawng ceu in khankix ka daux lai can pa tiiem tix khawmuik. Ka daux lai an khankix lox tix blah nu ti tawng dee bleeh mai pui pa ang chix tawng mai pa ang kaux cong khankix, deeh tieh dee bleeh kix, awm kix kawx deeh tieh bleeh, lox phuk lai sigang khri pa tang khankix, tom kieh mawh krax laux leeing ka tokaux tix heue.
Lox Ghoik
17Mawh kheu nan, pui pa moh aux khankix eue, kheu hoik grux tawng pex grawh grawng ceu in khankix, rien rhawm tix, son ang pex sang lud hu, tau mai pa yuh pui caox khankix mai rau khaing pa kaux cong pex heue. 18Viang mawh nan kieh haok hwan ka daux bwanson mai krax tawng yung Cao Taoh ex Yesux Khrit heue. Kieh Nawh koe min pakngai khawm yam in mai leeing ju liak. Amen.
Currently Selected:
2 PETRUX 3: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012