Filipenses 1
1
Pabloe' cu dzíib ti' u iglesiail Filipos
1Pablo yéetel Timoteo, palitzilo'on ti' Jesucristoe', ti' tuláacal le máaxo'ob u ti'alo'ob Ku nupa'ano'on yéetel Cristo Jesuso' máaxo'ob yano'ob ti' u caajil Filipos, c táacbesic ichilo'ob xane' le obispo'ob yéetel le diacono'obo'. 2Kame'ex u siibal utzil yéetel jéedzel óolal Ku c taata yéetel c Yuumtzil Jesucristo.
U payalchi' Pablo tu yo'olal le ocsaj óolo'obo'
3Je'el jay téen quin ka'ajsique'exe' quin dzáic gracias ti' in Ku. 4Le quéen payalchi'inaquene' mantadz quin káat óolal yéetel qui'imac óolal tu yo'olal tuláacale'ex; 5tumen meyajnajo'on jun múuch' ti' u meeyjul le ma'alob péectzilo', cáajic tu yáax kiine' tac bejela'e'. 6Jach ma'alob in wojelile' Ku máax tu cáajsaj u ma'alob meyaj ti' te'exe', yaan u yutzil chíicbesic tac tu kiinil quéen taalac Jesucristo. 7Jach tu beel ca tuuculnaquen beya' tu yo'olal tuláacale'ex, tumen ti' yane'ex tin pucsi'ikale', yéetel tumen jun múuch' tin wéetele' tuláacale'ex ca kamique'ex queet qui'iqui' t'aanilo'ob, quex kala'anen wa quex ca yanac in ba'atel t'aan tu yo'olal le ma'alob péectzilo' yéetel in wa'alic leti' u jaajil. 8Kue' u yojel buca'aj in yaabiltmaje'ex tuláacale'ex, yéetel u muumun yaacunaj Jesucristo. 9quin káatic ich payalchi'e' ca xi'ic u bin u ya'abtal a yaacunaje'ex yéetel ya'ab kaj óolalil yéetel na'atil ti' tuláacal ba'al, 10u ti'al ca a wojéelte'ex a yéeye'ex mantadz ba'ax asab ma'alob. Beyo' je'el u páajtal u yantal te'ex jun p'éel sac cuxtale' yéetel ma' bíin yanac mix ba'al a si'ipilcunta'ale'ex tu kiinil le quéen taalac Cristoe'. 11Beyo' Jesucristoe' bíin u beet ca béeyac a cuxtale'exe' jun p'éel u joochil ma'alob meyajo'ob, u ti'al u tziiquil yéetel u nojbe'enil Ku.
In ti'al tene' le cuxtalo Cristo
12Sucu'une'ex, in káat ca a wojéelte'exe' le ba'alo'ob dzo'oc u yúuchul teno' u jaajile' j taalo'ob bey jun p'éel áantaje' u ti'al u tze'ecta'al le ma'alob péectzilo'. 13Bey túuno' tuláacal u soldado'ob le chúumuc najo', yéetel tuláacal le u láako'obo', u yojelo'ob kala'anen tu yo'olal in tzay pachtic Cristo. 14Tumen cu yilico'ob kala'anene' ya'ab ti' le sucu'uno'ob cu yantal u yóolo'ob u ti'al u tze'ecto'ob u t'aan Ku x ma' sajaquilil yéetel nojoch kub óolal ti' Yuumtzil.
15U jaajile' yaan dze'edzeque' cu tze'ectico'ob u kaaba' Cristo tu yo'olal kaakas dzíibolalo'ob yéetel tu yo'olal ba'atelilo'ob, ba'ale' u láako'obe' cu beetic yéetel u pucsi'ikal. 16Dze'edzeque' cu tze'ectico'ob u kaaba' Cristo tumen cu caxtico'ob u yutzil antalo'ob, ma' tu jaajil u yóolo'obi', tumen táan u tucultico'ob u ya'abcuntico'ob beyo' in yaayaj óolalo'ob beoraa' kala'anena'; 17ba'ale' le u láako'obo' cu beetico'ob yéetel yaacunaj, tumen u yojelo'ob yanen waye' u ti'al in ba'atel t'aan tu yo'olal le ma'alob péectzilo'. 18Ba'ale' ¿ba'ax túun? je'el bixaque', wa yéetel tuláacal pucsi'ikal wa ma'e', táan u tze'ecta'al u kaaba' Cristo; lela' cu qui'imaccunsic in wóol.
Yéetel yaan u asab qui'imactal in wóol, 19tumen tene' in wojele' ti' tuláacal le ba'alo'oba' ma'alob quin jóokol tu yo'olal a payalchi'ex yéetel tu yo'olal le áantaj cu dzáic teen u Quili'ich Pixan Jesucristoo'. 20Tumen ba'ax in káat yéetel ba'ax quin pa'atique' ma' in sublactal, ba'ale' ca páatac in t'aan yéetel tuláacal kub óolal, bey túuno' beoraa' je'el bix mantadze' ca nojochquinta'ac Cristo tin wíinclil, quex cuxa'anen quex quimenen. 21Tumen in ti'al tene' le cuxtalo' Cristo, yéetel le quíimilo' jun p'éel náajal. 22Ba'ale' wa iquil in cuxtal ti' le wíinclil cu páajtal in meyaj u ti'al u yutzil meyaj Yuumtzile', ma' in wojel túun máacalmáac unaj in yéeyiqui'. 23Talam in ti'al in yéeyaj ichil le ca'a p'éel ba'ala'; ti' jun tzéele' quin dzíiboltic quíimil u ti'al in bin yantal yéetel Cristo, tumen lelo' asab ma'alob in ti'al teen. 24Ba'ale' ti' u láak jun tzéele', asab kabéet ti' te'exe' ca cuxlaque'ex ti' le wíinclila'. 25Tumen ma'alob in wojelil lela', tene' yaan in p'áatal yéetel yaan in wantal ta wéetele'exe', u ti'al in wáante'ex ca xi'ique'ex táanil yéetel ca yanac te'ex asab qui'imac óolal ti' a wocsaj óolale'ex. 26Yaan túun in wantal tu ca'a téen ta wéetele'ex, u ti'al beyo' tin wo'olale' ca yanac te'ex qui'imac óolal ti' Cristo Jesús.
27Chéen il a wile'exe' ca cuxlaque'ex je'el bix cu ya'alic to'on u ma'alob péectzil Cristoe'. Beyo', quex ca xi'iquen in wile'ex, wa quex náach yanene', in káat ca kuchuc teen u péectzilile' te'exe' jeedzel a wanile'ex ti' jun p'éelili' óol, táan a múuch' ba'atele'ex tuláacale'ex tu yo'olal u yocsaj óolalil le ma'alob péectzilo', 28yéetel ti' mix ba'al ca cha'ique'ex u ja'asa'al a wóole'ex tumen a enemigoex. Lela' jun p'éel chíiculal jach sáasil: leti'obe' yaan u bino'ob ti' xu'ulsajil, ba'ale' queet u ye'esic xane' a tocsajile'ex, lela' ti' Ku u taal. 29Tumen tu yo'olal Cristoe' dza'an ti' te'ex qui'imac óolalil ma' chéen ca wocs a wóole'ex ti'e', ba'ale' ca mukyajnaque'ex xan tu yo'olal. 30Te'ex yéetel tene' ti' yano'on ti' jun p'éelili' ba'atele'. Dzo'oc a wilique'ex bix ba'atelnajiquen, beoraa' dzo'oc a wu'uyique'ex u péectzilil bix láili' táan in ba'atele'.
Currently Selected:
Filipenses 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992