Filipenses 2
2
U cabalcunajil yéetel u nojbe'enalcunajil Cristo
1Bey túuno', wa Cristo líiksic a wóole'exe', wa u yaacunaj qui'imaccunsic a wóole'exe', wa ti' yaan ta wéetele'ex u Quili'ich Pixane', wa a kaj óole'ex le yaacunaj yéetel le cha'a óotziilo', 2chupe'ex in pucsi'ikal yéetel qui'imac óolal, cuxlene'ex táan a wutzil bisicaba'ex tuláacale'ex, nupa'ane'ex tumen jun p'éelili' yaacunaj, tumen jun p'éelili' pixan yéetel jun p'éelili' tuucul. 3Ma' a beetique'ex mix ba'al chéen u ti'al a wutzile'ex mix tu yo'olal ca'anal ichili' ba'ale' yéetel cabal óolal, tuju jun túule' ca u yil le u láako'obo' bey mas ma'alobo'ob ti' leti'e'. 4Mix jun túul ca u caxant chéen le ba'alo'ob u ti'al u yutzil tu juunalo', ba'ale' le máax u ti'al u yutzil xan le u láako'obo'.
5Tuuculnene'ex je'el bix tuuculnajic Cristo Jesuso'. 6Tumen quex leti' Kue', ma' tu yóoltaj u kabéetcunt le páajtalil yaan ti' u ti'al u queticubáa yéetel Kuo', 7ba'ale' tu p'ataj jun tzéelil le ba'ax u ti'alo' ca tu beetjubáa je'el bix palitzile', le ca j síij je'el bix máaque'. 8Le ca tu beetjubáa máaquile', tu cabalcuntaj u yóol yéetel tu yo'olal u yu'ubaj t'aane' bin ti' quíimil ti' cruz. 9Le o'olale' Kue' tu dzaj le mas ca'anal nojbe'enil ti'o', yéetel jun p'éel kaaba' yaan tu yóokol tuláacal kaaba'. 10U ti'al beyo' le quéen u'uya'ac u kaaba' Jesuse', ca xolac tuláacal le máaxo'ob yano'ob te j ca'ano', te j lu'umo' yéetel yáanal lu'um, 11yéetel u ti'al ca kaj óolta'ac tumen tuláacal máac yéetel ca u ya'alo'obe' Jesucristoe' leti' Yuumtzil, u ti'al u nojbe'enil Ku le taatao'.
Le ocsaj óolo'obo' beyo'ob sáasilil yóokolcaabe'
12Le o'olale' in yaabilaj sucu'une'ex, je'el bix ta dzo'ocbesaquile'ex in t'aan mantadz le ca yanjien ta wéetele'exo', dzo'ocbese'ex in t'aan mas ma'alob bejela'a' náach yanen ti' te'exo'. Dzáa a wóole'ex ti' a tocsajile'ex yéetel cabal óolal yéetel sajaquil; 13tumen Ku máax dzáic te'ex le ma'alob dzíibolalo'obo', yéetel cu yáantique'ex u ti'al a dzo'ocbesique'ex, je'el bix u ma'alob óolal leti'o'. 14Beete'ex tuláacal x ma' tutucchi'il mix yéetel ba'atel t'aanil, 15u ti'al ma' u caxta'al ti' te'ex tumen mix máac mix jun p'éel si'ipil yéetel mix jun p'éel kaas. Ba'ale' ca béeyaque'ex u paalal Ku mina'an pa'apakil ti'ob chúumuc ti' le máaco'ob kasa'ano'ob yéetel looloch u cuxtalo'obo'. Te'exe' ca léembale'ex ichilo'ob je'el bix le eeko'ob ti' jun p'éel yóokolcaab éekjoch'e'eno', 16le quéen a bise'ex ti'obe' u ma'alob péectzilil cuxtal. Beyo', le quéen taalac Cristoe', tene' cu páajtal u qui'imactal in wóol ta wo'olale'ex, tumen in wojel ma' chéen cunel tin wáalcabtaj le bejo', yéetel ma' chéen cunel meyajnajeni'. 17Yéetel quex ca quíimsa'aquen u ti'al u chúucbesa'al le siibal ca dzáique'ex te'ex ti' Ku tu yo'olal a wocsaj óole'exo', tene' cu qui'imactal in wóol yéetel quin ta'acbesique'ex tuláacale'ex ti' in qui'imac óolal. 18Bey xan te'ex qui'imacchajac a wóole'ex yéetel nupaba'ex ti' in qui'imac óolal.
Timoteo yéetel Epafrodito
19Wa Yuumtzil Jesús u káate', quin pa'atic in séeb túuxtic Timoteo u ti'al u yile'ex, u ti'al u qui'imactal in wóol le quéen in wu'uy bix a wanile'ex. 20Tumen mina'an teen u láak máac u ti'al ca tuuculnac queet tin wéetel je'el bix leti'e' yéetel tu jaajil ca u caxant a wutzile'ex; 21tumen tuláacal cu caxtico'ob chéen u yutzilo'ob, yéetel ma' tu dzáico'ob tu yóolo'ob ba'ax u káat Cristo Jesús. 22Ba'axe' te'exe' dzo'oc a wojéeltique'ex bix u cuxtal Timoteo, yéetel bix meyajnajic tin wéetel u ti'al u tze'ecta'al le ma'alob péectzilo', je'el bix jun túul paal cu yáantic u taatae'. 23Bey túuno', quin tucultic in túuxtic u ti'al u yile'exe' tu séeblaquil quéen in wojéelt bix u bin u ba'aluba'ob. 24Ala'an in wóol ti' Yuumtzile' tac teen yaan in bin in wile'ex séeba'an.
25Ba'ale' quin tucultique' kabéet in túuxtic te'ex xan sucu'un Epafrodito, máax láakintiquen ti' le meyaj yéetel ti' in mukulmuuko'ob, máax te'ex túuxmajil ti' teen u ti'al u táan óoltiquen ti' ba'axo'ob kabéet ti' teen. 26Tumen jach táan u dzíiboltic u láaj ilique'ex, yéetel táan u sen tuucul tumen te'exe' ta wojéeltaje'ex koja'anchaji. 27U jaajil koja'anchaji, óolac quíimic, ba'ale' Kue' tu ch'a'a óotzilil ti' leti' ba'ale' tac ti' teen, u ti'al ma' u yantal ti' teen u láak yaayaj óolal tu yóokol le yano'ob tena'. 28Le o'olale' táan in yaayantic in túuxtic, u ti'al ca qui'imacchajac a wóole'ex le quéen a wile'ex tu ca'a téen, yéetel u ti'al ma' u sen okomtal in wóol. 29Kame'ex tu kaaba' Yuumtzil yéetel tuláacal qui'imac óolal, yéetel dza'ex ta pucsi'ikale'ex le máaxo'ob je'el bix leti'o'; 30tumen óolac quíimic tu yo'olal u meyajtic Cristo. Tu dzajubáa tu táan quíimil u ti'al u beetic teen le meyajo'ob ma' tu páajtal a beetique'ex te'exo'.
Currently Selected:
Filipenses 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992