Rut 3
3
U yutzil u pucsi'ikal Booz ti' x Rut
1Jun p'éel kiine' x Noemie' tu ya'alaj ti' x Rut: In x ch'upul aal, tene' unaj in caxtic jun túul a wíicham u ti'al ca u dzáa ti' teech utzil qui' óolal. 2U'uye le c láaktzil Boozo', ti' le áakaba' yaan u bin ich cool u ti'al u p'uch u yi'ij cebada yéetel u x palitzilo'ob le máaxo'ob yéetel j meyajnajeche'. 3Let o'olale' beet le ba'ax quin in wa'al ti' techa': Ichquilnen, qui'iboccunsabáa yéetel búuquint u asab ma'alobil a nook, ca xi'iquech te'elo'. Ba'ale' ma' a cha'ic u kaj óoltiquech Booz ma'ili' dzo'ococ u janal yéetel u yukule'. 4Qui' il ma'alob tu'ux cu bin j chital j wenel. Xeen túun te'elo', lukes u piixil u yooco'obe' ca chilaquechi'. Cu dzo'ocole' leti'e' bíin u ya'al teech ba'ax unaj a beetic.
5X Rute' tu ya'alaj: Bíin in beet tuláacal le ba'ax dzo'oc a wa'alic ti'i teno'. 6X Rut túune' j bin te j coolo' ca tu beetaj tuláacal le ba'ax a'ala'ab ti' tumen u maama u yíicham. 7J Booze' jaani, ukulnaji yéetel sen qui'imacchaj u yóol. Cu dzo'ocole' j chilaj wenel tu yicnal u tucubil le neeko'obo'. Dzo'oc ca'ach u wenele' ca j kuch cháanbelil x Rut, ca tu lukesaj u piixil u yooco'ob j Booze', ca j chilaj te'elo'. 8Tu chúumuc áakabe' téec aj j Booze' le ca tu sutajubae' tu yu'ubaj túun ti' yaan jun túul co'olel chilicbal tu ni' yooco'obe'.
9Ca tu káat chi'itaj Booz ti': ¿Máaxech?
Leti' túune' tu núucaj: Tene' x Ruten, a x meyaj. Teche' in nadza'an láaktzilech, teech u najmal a wáantiquen. In káat ca dzo'ococ a beel tin wéetel.
10Ca j a'ala'ab ti' tumen Booz: Yuumtzil ca u qui' t'antech. Yéetel lela' ca we'esic jach a kubmaj a wóol ti' a íicham. Dzo'oc ca'ach a caxantic jun túul j xiib asab táanquelem ti' tene', óotzil wa ayikal, ba'ale' ma' ta beetaj beyo'. 11Ma' a ch'a'ic sajaquil, in x ch'upul paal, tumen tuláacal in wéet caajalo'obe' u yojéeltmajo'obe' teche' jun túulech utzil co'olel, lebeetic tene' bíin in beet le ba'ax dzo'oc a káatic ti' teno'. 12Jach tu jaajile' tene' a nadza'an láaktzilen, ba'ale' yaan u láak máac asab naadz ti' teech. 13P'áaten way ti' le áakaba'. Wa sáamal leti' u káat u dzo'ocbes ba'ax u najmal u beetic je'el bix jun túul láaktzile', u beete'. Ba'ale' wa ma' táan u beetique', quin dzáic ti' teech u t'aanil tu táan Yuumtzile' tene' je'el in beetique'. Bejela'e' weenen tac ja'atzcab.
14X Rute' j ween tu ni' yooc Booz, Ba'ale' ma'ili' sáaschajaque', láili' éekjoche'ene', ca j líiki, tumen Booze' tu ya'alaj ti': Mix máac unaj u yojéeltic wa j taal le co'olel way ich coole'.
15Booze' tu ya'alaj ti': Lukes a teep'o' ca a mach ma'alob. Ca'aliquil u machmaj x Rute', Booze' tu láalaj míin cuarenta kilos cebada. Cu dzo'ocole' tu yáantaj u cuche', ca j bin túun te j caajo'.
16Le ca j kuch x Rut tu yotoche' u maama u yíichame' tu káat chi'itaj ti': ¿Bix binic ti' teech in x ch'upul aal? X Rute' tu tzicbaltaj le ba'ax tu beetaj Booz tu yo'olal. 17Tu ya'alaj xan: Tu dzaj xan ti' teen tuláacal le cebada, tumen tu ya'alaj: Ma' u najmal a suut ta wotoch wa ma' táan a bisic wa ba'axi'.
18X Noemí túune' tu ya'alaj: Bejela'a' túune' in x ch'upul aal, pa'at a wilic ba'ax cun bin j úuchul. Le máaca' ma' tu bin je'elel wa ma' p'is u ma'alob dzo'ocbesic le ba'ala'.
Currently Selected:
Rut 3: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992