Salmos 2
2
SALMO 2
Junab Kue' cu ya'alic máax u paal
1¿Ba'axten cu p'u'ujul le j ma' ocsaj óol caajo'obo'?
¿Ba'axten cu tucultico'ob u beetico'ob ba'alo'ob mix ba'al u biilal?
2U ajawilo'ob yéetel u méektáanilo'ob lu'ume',
dzo'oc u much'icuba'ob u ba'atelto'ob Yuumtzil, tac xan leajaw u yéeymajo'.
3Cu yawatico'ob:
¡Cone'ex luksic le cadenaob u kaxmilo'one'exa'!
¡cone'ex wach'ic c suumilo'ob!
4Chéen cu che'ejtalo'ob tumen Yuumtzil le máax cu ajawil tej ca'ano';
5cu dzo'ocole' ichil u sen kuuxchaja'ane' cu ja'asic u yóolo'ob;
cu ya'alic ti'ob yéetel tuláacal u p'uja'anil:
6Dzo'oc in jun páaycuntic in ajaw tu yóokol Sión inquili'ich pu'uc.
7Bin in ca'aj in dzáa ojéeltbil ba'ax cu ya'alic Yuumtzil:
leti'e' tu ya'alaj ti' teen: Teche' in paalech;
teen tin beetaj a síijil bejela'e' teene' a taataen.
8Káat ti' teen ca in dzáa ti' teech le múuch' caajo'ob a ti'alinto',
ca in dzáa ti' teech a ti'alint tac u xuul u naklil yóokolcaab.
9Yéetel máascab bíin a xe'exe'et' ajawo'ob,
¡bíin a xiicunto'ob je'el bix u cuumilo'ob kate'!
10Ajawe'ex yéetel u méektáanile'ex lu'um,
¡jach ma'alob u'uye'ex le tzol xiquina'!
11-12Kulte'ex Yuumtzil tu yéetel qui'imac óolal bey xan tu yéetel tziiquil;
chinlaque'ex yéetel quiquilaanquil tu táan,
tumen ma' xan ca p'u'ujuque', te'ex túune' ca quíimique'ex te j bejo',
tumen séeba'an u léequel u p'u'ujul.
¡Qui' u yóolo'ob máaxo'ob caxantic u yáantaj!
Currently Selected:
Salmos 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992