Proverbios 31
31
U cóomcom ca'anbesajo'ob Lemuel
1U cóomcom ca'anbesajo'ob ajaw Lemuel j Masail,
je'el bix úuchic u ca'anbesa'al tumen u maamae':
2In xibil paal, u xéet'el in cuxtal, u núuquech Ku ti' in káat óolalo'ob,
¿ba'ax u láak ba'al je'el u páajtal in wa'alic ti' teche'?
3Ma' a xupic a muuk tu yéetel co'olelo'ob,
tumen leti'ob beetic u kéechel u cuxtal ajawo'ob.
4Lemuel, ma' utz u dzáicuba'ob u yuko'ob vino le ajawo'obo',
mix ca sen cáalaco'ob le j méektáano'obo',
5tumen je'el u tu'ubsico'ob le a'almaj t'ano',
je'el xan u manba'alcuuntico'ob u beetico'ob ba'ax no'oja'an tu yo'olal óotzilo'obe'.
6P'at le vino yéetel le ukulo'ob cu cáalcunajo',
u ti'al le máaxo'ob luba'an u yóolo'ob u ti'al xan le dzaanal u yóolo'obo';
7¡ukulnaco'ob, ma' u suut ka'ajso'ob u yóotzililo'ob mix u mukyajo'ob!
8Ka'am t'aanen tu yo'olal le máaxo'ob ma' tu yu'uba'al u t'aano'obo';
¡toc le máaxo'ob mina'an u muuko'ob u toquicuba'obo'!
9Ka'am t'aanen, beet ba'ax tu beel ti'ob;
¡toc le óotzilo'ob bey xan le caabal u yóolo'obo'!
Jadzutz t'aano'ob u ti'al jun túul co'olel cu ca'anbesaj u cuxtal
10Co'olel cu ca'anbesaj u cuxtale', ma' chéen ch'a'abil u caxta'ali';
¡asab co'oj u tojol ti' jadzutz tuunicho'ob!
11U yíichame', cu jach ocsic u yóol ti',
ma'atech u bineltic ti' u tojol u náajal.
12Cu dzáic ti' yíicham nucuch utzil óolalo'ob
tuláacal u kiinilo'ob u cuxtal.
13Cu caxantic u tzo'otzel j taman bey xan lino,
cu meyajtic tu kabil yéetel qui'imac óolal.
14Je'el bix u cheem j coonolo'obe', leti'e' cu náachtal u ti'al u man ba'ax kabéet ti'.
15Ma' qui' sáasaque' cu líikil u ti'al u dzáa ba'al u jaant u paalal yéetel u x palitzilo'ob.
16Cu dzo'ocol u máan u ma'alob yila'a' jun tzúuc cáacabe', cu manic,
yéetel u tojol u náajale' cu beetic u x péet paachil u pakal uva.
17Cu ca'a mu'uka'ancunticubáa,
cu dzo'ocol u ch'a'ic yóole' cu dzicubáa j meyaj.
18Cu canantic u bin utzil ti' u meyaj,
cu chúunul u meyaj ma' sáasaqui' cu p'atic tu yoocbal kiin.
19Tu kabil cu sacaltic bey xan u jit'ic.
20Ma' tu ch'éenel u yáantic óotzilo'ob
bey le máaxo'ob mina'an ba'alo'ob kabéet ti'ob.
21Ma' tu péec u yóol tu yo'olal u yotochnáalo'ob tu kiinilo'ob que'el,
tumen u láaktzilo'obe' yéetel piimpim noko'ob cu máano'ob.
22Leti'e' tu kabil cu jit'ic piimpim teep'o'ob,
Cu búucbesicubáa tu yéetel u asab jadzutzil nooko'ob.
23U yíichame', sen kaj óola'an ich le caajo',
ti' cu yila'al yéetel u tzicbe'en nuuquilo'ob caaje'.
24Cu beetic búuco'ob bey xan kax nako'ob,
cu conic ti' j maan coonolo'ob.
25Cu ch'a'ic ya'abcach muuk leti' beetic u tzi'iquil,
ma' tu péec u yóol ti' ba'ax cu taal u kiinil.
26Le quéen t'aanaque' cu t'aan yéetel ojéelaj,
cu ca'anbesaj yéetel yaacunaj.
27Cu p'il ichtic bix u bin u meeyjulo'ob u yotoch,
Mix jun téen u jaantmaj waaj ma' u náajalmaji'.
28Cu yutzil t'anta'al tumen u paalal yéetel tumen u yíicham beya':
29Sen ya'abcach utzul co'olelo'ob yaan,
ba'ale', mix jun túul ti'ob quetic a wutzili'.
30Mix ba'al u biilal u lúubul utzil jun túul co'olel,
chéen cunel u qui'ichpamil,
ba'ale' co'olel cu tziquic Yuumtzile',
leti'e', bíin úuchuc t'aan utz tu yo'olal.
31¡Utzul t'anta'ac tumen tuláacal caaj!
¡Chíinpolte'ex tu yo'olal tuláacal ba'ax cu beetic.
Currently Selected:
Proverbios 31: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992