San Lucas 2
2
Síijic jesús
(Mt 1.18-25)
1Ti' le kiino'obo' Augusto tu ya'alaj ca beeta'ac jun p'éel censo ti' tuláacal le lu'um tu'ux leti' emperadoro'. 2Le yáax censoa' beeta'ab ca'aliquil Cirenio u jalachil Siria. 3Tuláacal máax yanji' u bin tu caajal u ti'al ca dzíibta'ac u kaaba'i. 4Le o'olal túune' Josee' jóok Nazaret, jun p'éel u caaj tu lu'umil Galilea, ca j bin tu lu'umil Judea tu caajil Belén tu'ux sijnal David, tumen Josee' ti' u ch'i'ilancabil David u taal. 5J bin Belén ca dzíibta'ac u kaaba' yéetel María le máax núucmail dzo'ocol beel yéetele', máax xan koja'an ti' chaan pal. 6Ca'aliquil ti' yano'ob Belene' j kuch u kiinil u síijsaj María. 7Te'elo' tu síijsaj u yáax paal ca tu báadz tep'taj yéetel jajay nook, ca tu chicunsaj tu'ux cu tzéenta'al wacax, tumen ma' yanchaj cúuchil u ti'alo'ob tu najil u'ula'obi'.
Angelo'ob yéetel j canan tamano'ob
8Yaan ca'ach j canan tamano'ob naadz Belén cu máansico'ob áakab te j káaxo' tu'ux cu canatico'ob u j tamano'ob. 9Tu séeblaquil chíicpaj ti'ob jun túul u ángel Yuumtzil yéetel léembalnaj xan u nojbe'enil Yuumtzil tu bakpacho'ob ca jach sajacchajo'ob. 10Ba'ale' le ángelo' tu ya'alaj ti'ob: Ma' a sajactale'ex, tumen táan in taasic te'ex jun p'éel ma'alob péectzil, lela' bíin u qui'imaccuns yóol tuláacal máac: 11Bejela'e' j síij tu caajal David jun túul j tocsajil a ti'ale'ex, Cristo Yuumtzil. 12U chíiculale' bíin a wile'ex le chaan palo' báadz tep'ta'an yéetel jajay nook, chicunsa'an tu'ux cu tzéenta'al wacax.
13Tu séeblaquil ca j chíicpaj tu tzéel le ángelo' ya'ab u ángelilo'ob ca'an, táan ca'ach u qui'iqui' t'antico'ob Ku, táan u ya'alico'ob:
14Nojbe'enil ti' Yuum Ku tu ca'anilo'ob, yéetel ti' lu'ume' jéedzel óolal ti' wíinico'ob máaxo'ob cu qui'imaccunsa'al yóolo'ob yéetel u yutzil.
15Le ca'aj suunaj túun le ángelo'ob te j ca'ano', le j canan tamano'obo' ca tu ya'alaj tu baatzilo'ob: Co'one'ex tac Belén ca c il ba'ax dzo'oc u yúuchula', le xan dzo'oc u beetic x ojéeltic Yuumtzila'.
16Áalcabil binico'ob ca tu yilajo'ob María yéetel José yéetel le chaan pal chilicbal te tu'ux cu tzéenta'al wacaxo'.
17Le ca tu yilajo'obe', tu tzicbalto'ob le ba'ax a'ala'ab ti'ob tumen le ángel tu yo'olal le chaan palo', 18tuláacal túun le máaxo'ob tu yu'ubo'ob le ba'ax tu ya'alaj le j canan tamano'obo' ja'ak u yóolo'ob. 19Ba'ale' Maraíe' tu ta'acaj tuláacal le ba'alo'obo' tu pucsi'ikal táan u tuucul tu yo'olal. 20Le túun le j canan tamano'obo' j suunajo'ob táan u nojbe'encunsico'ob Ku yéetel táan u qui'iqui' t'antico'ob tu yo'olal tuláacal le ba'alo'ob tu yu'ubajo'ob yéetel tu yilajo'obo', tumen tuláacal j úuch je'el bix a'ala'abic ti'obe'.
Yáax bisa'abic Jesús ti' kulnaj
21Tu ocho kiino'ob síijic le chaan palo' súutkupta'abi', ca j dza'ab xan u kaaba'e Jesús, je'el bix tu ya'alaj le ángel ma'ili' koja'anchajac María ti' chaan pale'.
22Le ca j kuch u kiinil u yutztalo'ob je'el bix u ya'almaj t'aan Moisese', j bisa'ab le chaan palo' tu caajil Jerusalén u ti'al dza'abal tu táan Yuumtzil. 23Tu beeto'ob lela' tumen tu ya'almaj t'aan Yuumtzile' dzíiba'an: Tuláacal yáax j xibil paal cu síijile' yaan u jun páaycunsa'al u ti'al Yuumtzil. 24J bino'ob túun u dza'ob le siibal cu ya'alic u ya'almaj t'aan Yuumtzil: ca'a túul mucuy wa ca'a túul tzuutzuy.
25Cajacbal Jerusalén ti' le kiino'obo' jun túul máac, Simeón u kaaba'. Jun túul máac jach utz, cu kultic Ku táan xan u pa'atic u to'ocol u caajil Israel. Quili'ich Pixan ti' yaan yéetel Simeone', 26u ya'almaj ti'e' ma' bíin quíimic ma'ili' u yil Cristo le máax bíin túuxta'ac tumen Yuumtzil. 27Le máaca' dza'ab tu tuucul tumen Quili'ich Pixan ca xi'ic kulnaj; Le ca j taasa'ab Jesús tumen u taataob te kulnaj u ti'al u beeta'al ti' je'el bix u ya'alic le a'almaj t'aano', 28Simeone' tu ch'a'aj le chaan pal u méeko', ca tu qui'iqui' t'antaj Ku, táan u ya'alic:
29Yuumtzil bejela'e' cu páajtal a cha'ic in quíimil ti' jéedzele', tumen dzo'oc a dzo'ocbesic ba'ax a wa'almaj ti' teen a palitzil.
30Dzo'oc in wilic yéetel in wicho'ob le j tocsajil
31ta túuxtaj tu táan tuláacal máaco'obo'.
32Leti' le sáasil bíin u sáasilcunt le máaxo'ob ma' Israel u caajalo'obi', bey xan bíin u dzáa nojbe'enil ti' a caajal Israel.
33José yéetel u maama Jesuse' ja'ak u yóolo'ob tu yo'olal le ba'ax tu ya'alaj Simeón tu yo'olal le chaan palo'. 34Simeón túune' tu dzáaj u qui' t'aanil ti'ob yéetel tu ya'alaj xan ti' u maama Jesús: Ile, le chaan pala' dza'an u ti'al u beet u lúubul wa u líikil ya'ab máaco'ob ti' Israel. Leti'e' jun p'éel chíicul ma' túun j kambil tumen ya'ab máaco'ob; 35bey túuno' bíin ojéelta'ac ba'ax cu tucultic jun túul máac tu pucsi'ikal. A ti'al teche' tuláacal le ba'alo'oba' bey jun p'éel táadz máascab u ti'al u táadzmáans a pixan.
36Te'elo' ti' yaan ca'ach jun túul co'olel cu dzáic ojéeltbil ba'ax u káat Ku, Ana u kaaba', u x ch'úupal Fanuel ti' u ch'i'ibal Aser. Dzo'oc u ch'íijil. J dzo'oc u beel, ba'ale' siete ja'abo'ob cajlaj yéetel u yíicham.
37Bejela'a' túune' ochenticuatro ja'abo'ob quíimic u yíicham. Ma'atech u jóokol ti' le kulnajo', ba'ale' yéetel kiin yéetel áakab táan ca'ach u meyajtic Yuumtzil yéetel su'ukin yéetel payalchi'. 38Anae' j taal jach tu yorail, ca tu dzáaj nib óolal ti' Yuum Ku yéetel t'aanaj tu yo'olal le chaan pal ti' tuláacal le máaxo'ob cu pa'atico'ob ca'ach u tocsajil Jerusaleno'.
Sutbal Nazaret
39Le ca j dzo'oc u dzo'ocbesico'ob ba'ax cu ya'alic u ya'almaj t'aan Yuumtzile', ca j suunajo'ob Galilea tu caajil Nazaret u caajalo'ob. 40Le túun le chaan palo' táan u nojochtal, táan u jach antal u muuk bey xan u na'at, yéetel táan u qui' t'anta'al tumen Ku.
Chan xi'ipal Jesús cu bin kulnaj
41U taataob Jesuse' cu bino'ob ca'ach Jerusalén tuláacal ja'abo'ob u ti'al u kiinbesico'ob Pascua. 42Le ca j yanchaj doce ja'abo'ob ti' Jesuse', tuláacalo'ob j bino'ob Jerusalén je'el bix suuquil u kiinbesico'obe'. 43U ti'al u suutbalo'ob leti'ob dzo'oc le kiinbesajo', Jesuse' j p'áat Jerusalén, mix u maama mix José tu yojéeltajo'ob. 44Tu tuclajo'obe' táan ca'ach u taal Jesús ichil le ya'ab máaco'obo'. Bey túuno' xíimbalnajo'ob jun p'éel kiin, ba'ale' le ca tu yóoltajo'ob u caxto'ob ichil u láaktzilo'ob yéetel u kaj óolalo'obe', 45ma' tu yilajo'obi', ca túun suunajo'ob u caxto'ob Jerusalén,
46Tu yóox p'éel kiin ca tu nuptanto'ob te j kulnajo', culucbal ichil u aj ca'anbesajilo'ob le a'almaj t'aano', táan u yu'ubic ba'ax cu ya'alico'ob yéetel táan u káat chi'itico'ob. 47Tuláacal le tu yu'ubajo'ob u t'aano' ja'ak u yóolo'ob, tumen jach sen yaan u na'at, yéetel tu yo'olal u nuuquil le káat chi'ob beeta'ab ti'o'. 48Le ca j ila'ab tumen u taataobe', ja'ak u yóolo'ob; u maama túune' tu ya'alaj ti': in j xibil paal, ¿ba'axten ta beetaj to'on lela'? A taata yéetel tene' dzo'oc c sen caxtiquech yéetel yaayaj óolal.
49Jesús tu ya'alaj ti'ob: ¿Ba'axten ca caxtiquene'ex? ¿Ma' wa a wojele'ex ti' u ba'alilo'ob in Taata unaj in wantali'?
50Ba'ale' leti'obe' ma' tu na'atajo'ob le ba'ax tu ya'alajo'.
51Ca túun j suunaj tu yéetelo'ob tac Nazaret, láili' cu sen u'uyaj t'antico'obe'. U maamae' táan u ta'aquic tu pucsi'ikal tuláacal le ba'alo'oba'. 52Ca'aliquile' táan u bin u nojochtal Jesús ti' u wíinclil yéetel ti' u yojéelaj, kambe'en xan tu táan Ku yéetel tu táan máaco'ob.
Currently Selected:
San Lucas 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992