Josué 2
2
Josué cu túuchi'itic aj ch'úuco'ob Jericó
1Líikbal Sitime', Josuee' tu túuchi'itaj ca'a túul aj ch'úuco'obe', ca tu ya'alaj ti'ob: Xeene'ex a xakal ile'ex u lu'umilo'ob bey xan u caajil Jericó.
Leti'obe' j bino'obe' ca j kucho'ob tu yotoch jun túul u x cáacbach x co'olelil Jericó cu kaaba'intic ca'ach Rahab, ca j p'áato'ob tu yicnal u manso'ob áakabi'. 2Ba'ale' j yanji máax dzáic u péectzilil ti' u ajawil Jericó, ca j a'ala'ab ti': dze'edzec j israelitaob dzo'oc u taalo'ob u xakal ilo'ob le cúuchila'. 3Le ajaw túuno' tu túuchi'itaj a'albil ti' Rahab: Jóokes le máaco'ob j taalo'ob yilecho' ti' yano'ob bin ta wotoche', tumen aj ch'úuco'ob.
4Ba'ale' leti'e' tu ta'acajo'obe' ca tu ya'alaj: Tu jaajile' j taal dze'edzec máaco'ob u xíimbalteno'ob, ba'ale' ma' in wojel tu'ux u taalo'obi'. 5j bino'ob tu yocbal kiin, tumen ti' le súutuc cu ka'alal u jool najil le caajo', ma' in wojel tu'ux j bino'obi'. Ba'ale' wa ca jóokole'ex tu séeblaquil a ch'a'apachte'exo'obe', je'el a chucpachtique'exo'obe.
6Tu jaajile' leti'e' tu beetaj ca'ach u na'acalo'ob tu yóokol u yotoch, ca tu ta'acajuba'ob ichil dze'edzec u chúuch káxilo'ob lino jaycunta'ano'ob j tijil.
7U aj túuchi'ob le ajawo', tu ch'a'apachtajo'ob tu tojil u yáalcab ja'il Jordán, tac tu ma' taamil ja'. Chéen p'el jóokic le aj ba'atelo'obo', j ka'al u jool najil le caajo'. 8Ca'aliquil túun ma' wenec le aj ch'úuco'obo', j na'ac Rahab tu yóokol le najo' ca tu ya'alaj ti'ob:
9Tene' in wojel Yuumtzile' dzo'oc u dzáic te'ex le lu'uma', tumen leti'e' dzo'oc u beetic sen c sajactal ti' te'ex. Tuláacal le máaxo'ob cajnáalo'ob waya' táan u quíimilo'ob yéetel sajaquilil ti' te'ex. 10C ojel le ca jóoke'ex Egiptoe', Kue' tu tiquincuntaj u ja'il chac ka'anab u ti'al ca a ch'acte'ex. C ojel xan ta láaj xu'ulsa'aje'ex Sehón yéetel Og le ca'a túul u ajawo'ob le amorreob yano'ob ca'ach tu láak jun tzéel le Jordano'. 11Sen ya'ab sajaquil dzo'oc u yantal to'on úuchic c ojéeltic, mix máac cu yóoltic j ba'atel ta wéetele'ex. Tumen Yuumtzil a Junab Kuexe', láili' Ku yóokol ca'ane', Kuil xan yáanal, te j lu'uma'. 12Let o'olale' tene' quin káat óoltic te'ex ca jalach t'ante'ex teen way tu kaaba' Yuumtzile', bíin a beete'ex utz ti' in láaktzilo'ob bey je'el bix tin beetilac utzil ti' te'exe'. Dza'ex teen jun p'éel u chíiculalil a jaaj óolale'ex, 13Quin káatic te'ex ma' a quíimsique'ex in taata, in maama, in sucu'uno'ob yéetel in wíidzino'ob in quiico'ob yéetel in x wíidzino'ob, yéetel tuláacal ba'ax u ti'alo'ob. ¡Ma' a quíimsico'one'ex!
14Leti'obe' tu núucajo'ob: C dzáic c cuxtal bey chíicul ma' bíin quíimsa'aque'exi, wa teech ma' ta tzicbaltic le ba'ala'. Le quéen u kub to'on Yuumtzil le lu'uma' to'one' bíin beet teech utz yéetel jaaj óolal.
15Tu yo'olal ti' caja'an Rahab ti' jun p'éel naj beeta'an tu yóokol u tuulumil le caajo', leti'e' yéetel jun p'éel suum tu beetaj u yéemelo'ob tu jool u calom kiinil le najo' 16Ca tu ya'alaj ti'ob: Xeene'ex te j witzo', tu yo'olal ma' u nactáantale'ex tumen le máaxo'ob caxtique'exo'. Ta'acbesaba'ex buul óox p'éel kiino'ob u ti'al a pa'atique'ex u suuto'ob way j caaje'. Cu dzo'ocole', cu páajtal a bine'ex.
17Leti'obe' tu núucajo'ob ti': To'one' bíin c dzo'ocbes le jalach t'aan dzo'oc c beetic techo'. 18Ba'ale' le quéen ococo'on ti' le lu'uma', teche' unaj a ch'uyquintic le chac suuma', ti' u calom kiinil le naja'. Muuch'quint túun ta wotoch a taata, a maama, a láako'ob yéetel tuláacal u yotochnáalo'ob a taata. 19Wa yaan jun túul ti'ob cu jóokol ta wotoche', leti' bíin u cuuch si'ipil u quíimil; ma' c ti'al u si'ipilil. Ba'ale' wa cu quíimsa'al wa máax ichil a wotoche', c ti'al u si'ipilil. 20Wa teech ca wa'alic wa ba'ax ti' le ba'alo'oba', to'one' ma' kabéet c dzo'ocbesic le jalach t'aan dzo'oc c beetica'.
21Bey bíin úuchaco' tu núucaj leti'.
Leti'e' tu ya'alaj ca xi'ic utzil ti'ob, ca jóok u binbalo'ob. Cu dzo'ocole' leti'e' tu kaxaj le chac suum tu calom kiinil le najo'.
22Le ca'a túul aj ch'úuco'obo', j bino'ob te j káaxo' ca tu ta'acbesmajuba'ob te'elo', buul óox p'éel kiino'ob, ca'aliquil le aj ba'atelo'obo' j máan u caxto'ob tuláacal tu'ux chéen cunel, ca suunajo'ob Jericó. 23Le aj ch'úuco'ob túuno', j éemo'ob te j witzo'obo' ca tu ch'actajo'ob le áalcab ja'o', ca j suunajo'ob tu'ux yaan Josuee', ca tu tzicbalto'ob ti' tuláacal le ba'ax úucho'. 24Tu ya'alajo'ob: Yuumtzile' dzo'oc u kubic tuláacal le cúuchil t kabo'. T o'olale'exe', tuláacal le máaxo'ob cajnáalo'ob te j le lu'umo' táan u quíimilo'ob yéetel sajaquil.
Currently Selected:
Josué 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992