Jonás 2
2
U payalchi' Jonás
1Jonás túune' j payalchi'inaj ti' Yuumtzil u Ku ichil u jobnel le cayo', 2Ca tu ya'alaj:
Ichil in yaayam óolale' j káat óolnajen ti' teech Yuumtzil; teche' ta núucajen.
Likbal tu taamil le quíimilo' j káat óolnajen ti' teech, teche' ca ta wu'uyajen.
3Ta pulajen tu asab taamil le ka'anabo',
u muuk u yáalcab le ja'o' tu cuclajeno'ob.
Le u nucuch cuclilo'ob le ka'anab ca túuxtico',
cu máano'ob ca'ach tin wóokol.
4Tin wu'uyajinbáa dzo'oc a tojolch'intiquen ta táan;
ca tin tucultaje' ma' bíin in ca'a ila'a' a quili'ich kulnaji'.
5Le ja'obo' tu láaj bablajeno'ob ca'achi';
u mucmajen ca'ach u sen taamil ka'anabo';
u xíiwilo'obe' cu sa'awanticuba'ob tin pool.
6J búulen tac tu taamil le ka'anabo',
¡tene' tin wu'uyajinbáa mina'an u kiinil u cha'iquen!
Ba'ale' teche', Yuumtzil in Ku, ta tocajen ti' le quíimilo'.
7Le ca tin wu'uyaj táan u xu'ulul in cuxtale',
ca j ka'ajech ti' teen Yuumtzil;
in payalchi'e' j kuch ti' teech ta quili'ich kulnaj.
8Le máaxo'ob cu bino'ob tu paach le beetbil kuobo'
cu jáawal u chuca'antal u yóolo'ob ti' teech;
9ba'ale' tene' yéetel u t'aanilo'ob nib óolale',
bíin in kub quíimsbil ba'alche'ob;
bíin in dzocbes le séebchi'ob tin beetaj ca'ach ti' techo'.
¡Chéen teech Yuumtzil cu páajtal a tocsaj!
10Yuumtzil túune' tu beetaj ca xe'ebec Jonás tumen le cay te tu lu'umil u jáal le ka'anabo'.
Currently Selected:
Jonás 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992