Oseas 2
2
1Bíin a wa'ale'ex túun ti' a j xibil láake'ex:
Te'exe' u caajale'ex Ku,
ti' a x ch'upul láake'ex xane', bíin a wa'ale'ex: X ch'a'a óotzilta'ane'ex.
U kex óolal u caajil Israel
2Yuumtzile' cu ya'alic:
¡Taque'ex u pool a maama'ex, taque'ex u pool,
tumen leti'e' ma' in watan bejela'e',
teen xane' ma' u yíichameni'!
¡Ca u p'at u ye'esicubáa bey x cáacbache'!
¡Ca u lukes ti' u yiimo'ob u weeyo'ob!
3Wa ma' tu beetique' bíin in p'at chacnule'en u wíinclil:
bíin in p'at chacnulil je'el bix le kiin ca j síije',
bíin in suutkes bey jun p'éel x tocoye',
láaj tiquin lu'umil, yaan in beetic u quíimil yéetel ukajil.
4Ma' bíin in ch'a'a óotzilil ti' u paalali',
tumen u paalal x cáacbachil.
5U maamae' x cáacbachchaji; tu sataj u sublaquil, le ca tu ya'alaj:
Bin in ca'aj in caxant in weeyo'ob,
máaxo'ob dzáic in wo'och waaj yéetel in wo'och ja',
cu dzáico'ob xan ti' teen u tzo'otzel j taman yéetel in lino,
in aceite yéetel in wukulo'ob.
6Le t o'olale' bíin in kal yéetel ki'ixo'ob u beel
bíin in sup' u bakpach, u ti'al ma' u nuptáantic u t'o'ol bejilo'ob.
7Bíin xi'ic u t'u'ulpacht u weeyo'ob ba'ale' ma' bíin u chucpachto'obi';
bíin u caxanto'ob, ba'ale' ma' bíin u nuptáanto'obi'.
Bíin u ya'al túun: Bin in ca'aj suut tu yicnal in yáax íicham,
tumen yéetel leti'e' cu bin teen utzil ca'achi.
8Ba'ale' leti'e' ma' tu kaj óoltaj wa teen dzáic ca'ach ti'
le trigoo, le vinoo yéetel le aceiteo';
teen máax ya'abcuntic ca'ach le plata
yéetel le oro iquil u beetic u kuob.
9Le t o'olale' bíin suunaquen in ch'a'a in trigo
yéetel in vino tu kiinil in joch,
bíin xan in mol u tzo'otzel j taman yéetel in lino,
ba'axo'ob tin dzaj ca'ach ti' u ti'al u pixicubáa.
10Tu táan u yich u weeyo'obe' bin in ca'aj in paj u subtal.
¡Mix máac bíin páatac u toquic tin kab!
11Bíin in dzáa xuul ti' u qui'imac óolal,
ti' u cha'ano'ob yéetel ti' u túumben ujo'ob,
ti' u kiinilo'ob u je'elel yéetel tuláacal u kiinbesajilo'ob.
12Bíin in kascunt u pakal uvaob yéetel u higueraob,
tu yo'olal cu ya'alic ca'ach: Lela' leti' le bo'olal
tu dzajo'ob ti' teen in weeyo'ob.
Bíin in suutkes jun p'éel pocche',
bíin jaanta'ac xan tumen u ba'alche'ilo'ob káax.
13Bin in ca'aj in jadz tu yo'olal le kiin tu máansaj
táan u kubic poom ti' beetbil kuob,
le táan ca'ach u jadzutzquinticubáa yéetel x dzipito'ob
bey xan yéetel jookenjooko'ob u ti'al u bin tu paach u weeyo'ob,
táan u tu'ubsiquen.
Teen Yuumtzil, teen a'alic.
Kue' u yaabiltmaj Israel u caajal
14Tene' bin in ca'aj in we'es in yaacunaj ti':
bin in ca'aj bis jun páayil, bíin in wa'al ba'alo'ob jadzutz ti'.
15Cu dzo'ocole' quin sutic u x péet pach pakal uvaob,
bíin in sutkes u táax lu'umil Acore'
bey u jool najil alab óolal u ti'al leti'e'.
Te'elo' ti' bíin u éejemteni' je'el bix tu x lo'obayanile'
je'el bix le kiinac ca jóok Egiptoe'.
16Bíin túun u t'anen beya': In wíicham,
ma' bíin u ya'al ti' teen beya': In ku Baal.
Teen Yuumtzil, teen a'alic.
17Bíin in lukes tu chi' u kaaba' le ku Baalo',
mix bikin bíin suunac ch'a'a chi'itbil.
18Ti' le kiino'obo' bíin in beet u ti'al u yutzil Israel
jun p'éel nup t'aan yéetel u ba'alche'ilo'ob káax,
bey xan yéetel le ch'íich'o'obo' bey xan yéetel le caano'obo';
bíin in cache bíin xan in lukes ti' le lu'uma'
le p'úunche'o', le x táadz máascabo' yéetel le ba'atelo',
u ti'al ca je'elec x ma' sajaquil in caajal.
19Israel tene' bíin dzo'ococ in beel ta wéetel
u ti'al ca in watantech, u ti'al ja'abo'ob mina'an u xuul,
jach jun p'éelech watan in ti'al, je'el bix u najmale',
tumen in yaabilmajech yéetel tuláacal in pucsi'ikal.
20Tene' bíin in beetech jun túul in watan in ti'al,
bíin chúucpajac in wóol ti' teech,
teech túune' bíin a kamen bey a Yuumtzile'.
21Teen Yuumtzil, teen a'alic:
Ti' le kiino'obo' tene' bíin in beet utz ti' le ca'ano',
le ca'ano' bíin u beet utz ti' le lu'umo';
22le lu'umo' bíin u beet utz ti' le trigoo ti' le vinoo yéetel ti' le aceiteo',
leti'obe' bíin u beeto'ob utz ti' Jezreel.
23Bíin in cajcunt in caajal te j lu'umo' chéen in ti'alinte;
bíin in ch'a'a óotzilil ti' Lo-ruhama,
ti' Lo-ami' xane' bíin in wa'al: Teche' in caajalech,
leti'e' bíin u ya'al ti' teen: ¡Teche' in Junab Kuech!
Currently Selected:
Oseas 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992