Hageo 2
2
U nojbe'enil túumben kulnaj
1Tu veintiun kiinil ti' u siete winalil, Yuumtzile' tu ca'a t'anaj aj bóobat Hageoe', 2ca tu ya'alaj ti' ca xi'ic u ya'al ti' Zorobabel, ti' Josué bey xan ti' u yalab le caajo'. 3Le máaxo'ob j il u qui'ichquelmil le yáax kulnajo', u ya'alo'ob bix u yilico'ob le yaan to'one'ex bejela'a'. ¿Ma' wa mix ba'al a wilique'ex tu tzéel le yáaxo'? 4¡Ba'ale' Zorobabel yanac a wóol! ¡Josué u j noojoch le aj kiino'obo' yanac a wóol! U cajnáalile'ex tuláacal le lu'umo'oba' yanac xan a wóole'ex. Meyajnene'ex tumen tene' ti' yanen ta wéetele'exe', Teen Yuumtzil, u yuumil tuláacal páajtalil, teen a'alic. 5Je'el bix tin séeb chi'itajilac ti' te'ex le ca'aj jóoke'ex Egiptoe', yaan a láakinta'ale'ex tumen in pixan. Ma' a sajactale'ex. 6Ichil jun p'íit kiin bíin in beet u quíilbal ca'an yéetel lu'um, ka'anab yéetel dzu'uy lu'um. 7Bíin in beet u quiquilanquil tuláacal múuch' caajo'ob, bíin xan u taas u ayikalilo'ob, beyo' bíin chu'upuc in kulnaj yéetel nojbe'enil. Yuumtzil u yuumil tuláacal páajtalil, leti' a'alic: 8In ti'al le plata yéetel le oroo'. 9Le kulnaja' bíin asab qui'ichquelemchajac ti' le yáaxo'. Bíin túun in jedz ti' le cúuchila'. Teen Yuumtzil u yuumil tuláacal páajtalil, teen a'alic.
Kue' cu keyic le j kex óol caajo'
10Tu veinticuatro kiinil ti' u nueve winalil u méektáan Darioe', Yuumtzile' tu t'anaj aj bóobat Hageoe', 11ca tu ya'alaj ti' ca u beet le káat chi'oba' ti' le aj kiino'ob tu yo'olal a'almaj t'aan: 12Wáa jun túul máac cu bisic bak to'an ti' jun p'éel suyeme', wa le suyem cu táakal ti' waaj, wa ti' janal, wa ti' vino, wa ti' aceite, wa ti' je'el ba'alac janalile', ¿cu p'áatal wa jun páaycuna'an le janalo'? Le aj kiino'obo' tu núucajo'ob ma' tu jun páaycunchajal. 13Hageo túune' tu ca'a a'alaj: Cux túun wa yaan jun túul máac ma' utz yanil tu yo'olal tu machaj jun túul quimen, cu bin u mach jun p'éel ti' le ba'alo'oba': ¿ca tucultique'ex ma' bíin p'áataco'ob ma' utz yanilo'obi'? Le aj kiino'obo' tu núucajo'ob je'el u p'áatal ma' utz yanilo'obe'.
14Hageo túune' tu ya'alaj: Bey u yúuchul yéetel le wíinico'oba': tuláacal ba'ax cu beetico'ob yéetel tuláacal ba'ax cu taasico'ob ti' tene', ma' utz yanilo'obi'. 15Líikbal ti' le kiina', tuculte'ex ma'alob lela'. Ma' a chu'unse'ex a beetique'ex le kulnajo', 16¿ba'ax ca'ach cu yúuchul ti' te'ex? Le quéen xi'ic wa máax tu yicnal veinte u múulul janalbe'en neeko'obe', cu nactáantic ca'ach chéen diezi'; le quéen xi'ic ca'ach wa máax tu'ux cu beeta'al vino u ti'al u jóokesic cincuenta u p'úulilo'obe', chéen veinte ca'ach cu jóokesiqui'. 17Tene' tin xu'ulsaj yéetel báan quíimilo'ob, bey xan tu yéetel j bat tuláacal a meyaje'exe' ba'ale' ma' a kube'ex a wóole'ex ti' teni'. Teen Yuumtzil, teen a'alic. 18Bejela'a' u kiinil veinticuatro ti' u nueve winal, dzo'oc u dzabalo'ob u chuun pakilo'ob in kulnaj. 19Ma'alob túun, ilawile'ex líikbal bejela'e', ma' bíin p'áatac mina'an le jejeláas neeko'ob te tu ch'iilo'obo'. Ca'aliquil ma' ichnac le uvao', mix le higoo, mix le granadao', mix le olivoo'; ba'ale' líikbal bejela'e', bíin in qui' t'ante'ex.
Yuumtzile' cu séeb chi' ti' Zorobabel
20Ti'ili'e' kiino', Yuumtzile' tu ca'a t'anaj Hageo, 21ca tu túuchi'itaj u ya'al ti' Zorobabel, u aj méektáan u caajil Judá: Tene' bíin in beet u quíilbal ca'an paate' yéetel le lu'uma'; 22bíin in pa'a u muuk u ajawilo'ob yóokolcaab, bíin xan in pul j lu'um u péet jo'olo'ob; bíin in balkes u bolanilo'ob u ba'atelo'ob pa'ate' yéetel máaxo'ob cu bino'ob ichil, bíin quíimic u tzíiminilo'ob yéetel u aj nat' tzíiminilo'ob; tu jujun túulil bíin quíimic tu ch'aac u máascab u láaktzil. 23Zorobabel in palitzil, ti' le kiino' bíin in canantech je'el bix in canantic u x dzipitil in x dzalabe', tumen teen tin yéeyajech. Teen Yuumtzil u yuumil tuláacal páajtalil, teen a'alic.
Currently Selected:
Hageo 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992