Esdras 10
10
Cu tojolch'int'al le x táanxel lu'umil co'olelo'obo'.
1Ca'aliquil xolocbal Esdras táan u payalchi', táan xan yokole' yéetel táan u cáantic le kebano'ob tu táan u kulnaj Junab Kue', jun p'éel nojoch múuch' israelitaob, j xiibo'ob, co'olelo'ob yéetel paalal táan xan u yaayaj okolo'ob much'ucbalo'ob tu bakpach. 2Secanías túune', u paal Jehiel, yéetel ti' u ch'i'ibal Elame', t'aanaje' ca tu ya'alaj ti' Esdras: To'one' t kexaj c Ku, tumen dzoca'an c beel yéetel co'olelo'ob cu taalo'ob ti' lu'umo'ob mina'an u yocsaj óolo'ob ti' Kui'; quex beyo' yaan ma'alob pa'atajil u ti'al Israel. 3Co'one'ex kax t'antic c tojolch'intic tuláacal c atano'ob x táanxel lu'umilo'ob pa'ate' yéetel u paalal, u ti'al ca dzo'ocbesa'ac le a'almaj t'aano', je'el bix a káat teech yéetel le máaxo'ob cu tziquico'ob u nu'ucbe'en t'aano'ob Yuumtzilo' yéetel cu tzol xiquintico'ono'ob. 4Líiken, tumen lela' chéen teech úunchac a beetic, to'one' ti'ano'on ta wéetele', dzáa a wool beete.
5Esdras túune' j líike' ca tu beetaj ti' u nuuquilo'ob aj kiino'ob, yéetel ti' u nuuquilo'ob j levitaob, ca u séeb chi'ito'ob yéetel jaajilil óolal bey xan ti' tuláacal le israelitaobo', ca u dzo'ocbeso'ob le kax t'aano'; ca tu séeb chi'ito'ob. 6Cu dzo'ocole' Esdrase' j luk tu kulnaj Junab Ku u ti'al u bin tu'ux je'elel Johanán u paal Eliasib, ti' tu máansaj áakabi', ma' jaani' mix tu yukaj mix ba'ali', tumen jach yaj u yóol tu yo'olal u keban le máaxo'ob j bisa'abo'ob ca'ach táanxel lu'umo'.
7Cu dzo'ocole' ca j t'a'ano'ob tuláacal le máaxo'ob j bisa'abo'ob ca'ach táanxel lu'ume' le cajnáalo'ob Judá bey xan le cajnáalo'ob Jerusalene', u ti'al ca much'laco'ob tu caajil Jerusalén. 8Tuláacal máax ma' bíin xi'ic tu óox p'éel kiine' je'el bix dzo'oc u ya'alico'ob u nuuquilo'ob yéetel le máaxo'ob tzol xiquintico'obo', yaan u láaj to'ocol u lu'umo'ob, yaan xan u tojolch'inta'al ichil u cajtalilo'ob le suunajo'obo'. 9Le beetique' tuláacal u cajnáalilo'ob Judá yéetel Benjamine' tu much'uuba'ob Jerusalén tu kiinil veinte u winalil nueve, u káat ya'ale' tu yáam le óox p'éel kiino'. Tuláacalo'obe' culajo'ob tu kíiwiquil u kulnaj Junab Ku, táan u quiquilaanquilo'ob tu yo'olal ba'ax cu yúuchulo' bey xan tumen táan u káaxal. 10Aj kiin Esdrase' wa'alaj túune' ca tu ya'alaj ti'ob: Te'exe' kebanchaje'ex tu yo'olal dzo'oquic a beele'ex yéetel co'olelo'ob x táanxel lu'umilo'ob, beyo' ta nojochquintaje'ex u keban Israel. 11Let o'olale' te'ela', tu táan Yuumtzil u Ku a taatae'exo'obe', cáante'ex yaan a si'ipile'ex yéetele' beete'ex ba'ax u káat Yuumtzil. Jun páaycunsaba'ex ti' le j ma' ocsaj óol wíinico'ob yéetel ti' le co'olelo'ob táanxel lu'umilo'.
12Tuláacal le máaco'obo' tu ka'am a'alajo'ob: Je' c beetic le ba'ax bíin a wa'ale'. 13Ba'ale' ya'abo'on yéetele' ma' tu máan le cháaca', ma' xan tu páajtal c p'áatal yóokol le beja', tumen le ba'ala' ma' tu dzo'ocol ichil ca'a p'éel wa óox p'éel kiin, tumen ya'abo'on le j kebanchajo'ono'. 14C tuclique' ma'alob ca p'áataco'ob t o'olal c nuuquilo'ob waye', u ti'al u yu'ubico'ob ba'ax cu j bin a'albil, yéetel tuláacal le cajacbalo'ob noj caajo'ob dzoca'an u beelo'ob yéetel co'olelo'ob x táanxel lu'umilo'ob, ca taalaco'ob le kiin bíin a'ala'ac ti'obe' láakinta'ano'ob tumen u j méektáano'ob yéetel xan u yu'ubaj ba'atelo'ob u caajo'ob, p'is u náachtal ti' to'on u noj p'u'ujul c Ku tu yo'olal le kebana'.
15-16Tuláacal le j bisa'abo'ob ca'ach táanxel lu'ume' tu éejemtajo'ob u beetico'ob beyo', chéen Jonatán u paal Asael, yéetel Jahazías u paal Ticva, ma' tu éejemto'obi' áanta'abo'ob xan tumen Mesulam yéetel j levita Sabetai. Aj kiin Esdras túune' tu yéeyaj wa jay túul máaco'ob u nuuquilo'ob ca'ach u láaktzililo'ob, tu yáax kiinil ti' u winalil diez tuláacal le máaxo'ob j yéeya'abo'obo', dze'edzec ti'obe' tu dzajuba'ob u yilico'ob jujun p'éelil le ba'axo'ob ucha'ano'. 17U yáax kiinil ti' u yáax winalil tu dzo'ocsajo'ob u dzíib kaaba'il le máaxo'ob dzoca'an u beelo'ob yéetel x táanxel lu'umilo'ob.
18Le aj kiino'ob dzoca'an u beelo'ob yéetel co'olelo'ob táanxel lu'umilo'ob leti' lelo'oba': Ti' u ch'i'ibal Josué u paal Josadac, yéetel u láaktzilo'obe': Maasías, Eliezer, Jarib yéetel Gedalías, 19máaxo'ob tu séeb chi'itajo'ob u tojolch'intico'ob u yatano'ob, ca tu táanbesajo'ob jujun túul j taman tu yo'olal u kebano'ob.
20Ti' u ch'i'ibalo'ob Imer: Hanani yéetel Zebadías.
21Ti' u ch'i'ibalo'ob Harime': Maasías, Elías, Semaías, Jehiel yéetel Uzías.
22Ti' u ch'i'ibalo'ob Pasure': Elioenai, Maasías, Ismael, Natanael, Jozabad yéetel Elasa.
23Ti' u ch'i'ibalo'ob le levitaob: Jozabad, Simei, Kelaía (wa Kelita), Petaías, Judá yéetel Eliezer.
24Ti' aj kaayo'obe': Eliasib. Ti' aj canano'ob: Salum, Telem yéetel Uri.
25Le u láak israelitaob láili' bey yanilo'ob xano', leti' lelo'oba': Ti' u ch'i'ibalo'ob Parose': Ramía, Jezías, Malquías, Mijamín, Eleazar, Malquías yéetel Benaía.
26Ti' u ch'i'ibalo'ob Elame': Matanías, Zacarías, Jehiel, Abdi, Jeremot yéetel Elías.
27Ti' u ch'i'ibalo'ob Zatue': Elioenai, Eliasib, Matanías, Jeremot, Zabad yéetel Aziza.
28Ti' u ch'i'ibalo'ob Bebaie': Johanán, Hananías, Zabai yéetel Atlai.
29Ti' u ch'i'ibalo'ob Banie': Mesulam, Maluc, Adaía, Jasub, Seal yéetel Ramot.
30Ti' u ch'i'ibalo'ob Pahat-moabe': Adna, Quelal, Benaía, Maasías, Matanías, Bezaleel, Binuy yéetel Manasés.
31Ti' u ch'i'ibalo'ob Harime': Eliezer, Isías, Malaquías, Semaías, Simeón, 32Benjamín, Maluc yéetel Semarías.
33Ti' u ch'i'ibalo'ob Hasume': Matenai, Matata, Zabad, Elifelet, Jeremai, Manasés yéetel Simei.
34Ti' u ch'i'ibalo'ob Banie': Madai, Amram, Uel, 35Benaía, Bedías, Queluhi, 36Vanías, Meremot, Eliasib, 37Matanías, Matenai, Jaasai.
38Ti' u ch'i'ibalo'ob Binuye': Simei 39Selemías, Natán, Adaía, 40Macnadebai, Sasai, Sarai, 41Azareel, Selemías, Semarías, 42Salum, Amarías yéetel José.
43Ti' u ch'i'ibalo'ob Neboe': Jeiel, Matatías, Zabad, Zebina, Jadau, Joel yéetel Bebaía.
44Tuláacal le je'elo'oba' dzoca'an u beelo'ob yéetel co'olelo'ob táanxel caajilo'ob, ba'ale' tu láaj tojolch'intajo'ob pa'ate' yéetel u paalalo'ob.
Currently Selected:
Esdras 10: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992