Deuteronomio 33
33
Moisese' cu qui' t'antic u ch'i'ilancab Israel
1Jun p'íit u bin u quíimil Moisés u palitzil Kue', tu qui' t'antaj le j israelitaob 2beya':
Yuumtzile', Sinaí u taal;
Tu julaj c beel líikbal Seir.
Chúun u léembal tu witzilo'ob Parán
j bin u náachtal tu tojil Meriba-cades;
cu taasic tu x no'oj kab u káakil a'almaj t'aan.
3Yuumtzile' u yaabiltmaj u caajal,
cu canantic máaxo'ob cu jun páaycuntcuba'ob u ti'al;
leti'obe' cu t'ontalo'ob tu ni' u yooc
u ti'al u kamico'ob u tusbeel.
4Moisese' tu dzaj to'on le a'almaj t'aan
bey u siibal ti' u caajil Jacobe',
5j yanchaj xan ajaw Jesurún
le ca j much'laj u nuuquilo'ob le caajo', le ca j much'laj u ch'i'ibalo'ob Israele'.
6Tu yo'olal Rubén tu ya'alaj:
¡Ma' u quíimil Rubén, cuxlac quex ma' ya'abo'ob u j xibil paalali'!
7Tu yo'olal Judae' tu ya'alaj:
Yuumtzil u'uy ba'ax cu ya'alic Judá;
beet ca much'lac yéetel u caajal.
toc yéetel a páajtalil;
toco'ob ti' u aj p'eeco'ob.
8Tu yo'olal Levie' tu ya'alaj:
Yuumtzil, a ti'alo'ob, le Tumim yéetel le Urim;
a ti'alo'ob bey le j xiib u kubmubaj ti' teche',
le máax ta túuntaj u yóol Masah,
le máax yéetel ba'atelnajech tu ja'ilo'ob Meriba,
9le máax tu ya'alaj ti' u taata yéetel ti' u maama: Mix jun téen in wile'ex,
ti' u sucu'uno'obe' tu ya'alaj: Ma' in kaj óole'exi',
ti' u paalalo'obe' tu ya'alaj: Ma' in wojel máaxe'exi'. Leti'obe' cu dzo'ocbesico'ob a t'aan
Dzo'oc u jach kubicuba'ob ti' a nup t'aan
10Leti'ob ca'anbesic Jacob, leti'ob ca'anbesic Israel,
ti' a wa'almaj t'aano'ob yéetel a ca'anbesajo'ob;
cu dzáico'ob tu multuunil a kulta'al, ta táan,
poom yéetel u ti'ibil óolalil ba'alche'ob.
11Yuumtzil, qui' t'ant u mukulmuuko'ob,
yéetel utzil kam xan u meyajo'ob.
Cach u pu'uch u aj p'eeco'ob,
ma' u ca'a líikilo'ob máaxo'ob p'ectmajil.
12Tu yo'olal Benjamine' tu ya'alaj:
Le máax yaabilta'an tumen Yuumtzilo', ca cuxlac x ma' sajaquil;
le aj Sen Ca'anal bíin canantic sáamsamal.
¡Bíin cuxlac yáanal u canan!
13Tu yo'olal Josee' tu ya'alaj:
Yuumtzil ca u qui' t'ant u lu'umil
yéetel u jach ma'alobil u p'uulja'il ca'an
le ja' yaan tu taamil le lu'umo',
14u jach ma'alobil u joochilo'ob ja'ab,
u jach ma'alobil u yich le winalo'obo',
15u jach ma'alobil le úuchben witzo'obo',
u jach ma'alobil le ba'axo'ob yaan ca'anal mina'an xu'ulul ti'obo',
16u jach ma'alobil icho'ob chupic le lu'umo'
bey xan yéetel u yutzil óolal le máax cajnáal te x cojquéejo'.
Talac tuláacal le ba'alo'ob tu yóokol José
yéeya'ab ichil u chuucáan u láako'obo'.
17Sen qui'ichquelem bey u yáax aal jun túul wacaxe'.
sen mu'uka'an bey jun túul bufaloe',
bíin u kóoch tuláacal caajo'ob
tac tu xuul yóokolcaab.
Bey u múuch'cabilo'ob Efraine';
bey u sen ya'abilo'ob Manasese'.
18Tu yo'olal Sabulón yéetel Isacare' tu ya'alaj:
Sabulón qui'imacchajac a wóol tu kiinilo'ob a jóokol,
teche' Isacar qui'imacchajac a wóol yéetel chuybil najo'ob.
19Bíin u t'aano'ob múuch' caajo'ob te j witzo',
te xano' bíin u táanbeso'ob le quíimsbil ba'alche'ob u najmalo';
bíin u qui'imaccunt u yóolo'ob yéetel u ayikalil le ka'anabo'obo'
bey xan yéetel le ta'acbesbil ba'alo'ob yaan tu ja'il le ka'anabo'.
20Tu yo'olal Gade' tu ya'alaj:
¡Qui' t'antbil le máax dzáic múuch' lu'umo'ob ti'ob!
Gade' cu chital j ch'úuc bey jun túul x leóne',
cu xe'exet'ic le muuk kabo'obo' bey xan le poolo'.
21Gade' j p'áat yéetel u jach ma'alobil,
yéetel juum p'éel lu'um cu najmatico'ob u nuuquilo'ob ba'atele'.
J ooc actáan ti' le caajo',
tu dzo'ocbesaj ba'ax j dzaab ti' tumen Yuumtzil
bey xan tu beetaj ba'ax toj tu caajil Israel.
22Tu yo'olal Dane' tu ya'alaj:
Dane' u chichanil jun túul león cu síit' Basán.
23Tu yo'olal Neftalie' tu ya'alaj:
Neftalie' utz u yila'al tumen Yuumtzil,
ma' tu bineltic ti' ya'abcach qui' t'aano'ob,
¡leti'e' u taatail le xéel ja'o' tac tu jáal j noojol!
24Tu yo'olal Asere' tu ya'alaj:
Qui' t'antbil Aser ichil tuláacal u paalal Jacob,
ma'alo' yaabilta'anil tumen u sucu'uno'ob.
ca u yal aceite tu yooc.
25Yanac u nu'ucul u kalabil u jool najo'ob fierro'ob yéetel bronceob u ca'ajo'ob, xáanac u muuk je'el bix u cuxtale'.
26Mix ba'al quetic u Ku Jesurún,
cu jectal yéetel nojbe'enil yóokol u múuyalilo'ob ca'an
u ti'al u taal u yáantech.
27Le Ku mina'an u xu'ulul ti'o' leti' a ta'acbesajil,
u páajtalil mina'an u xuule' leti' a Aj nacab;
tu beetaj u yáalcab a aj p'eec ta táan
tu ya'alaj teech ca xu'ulsej.
28Israele' bíin cuxlac x ma' sajaquil,
u ch'i'ibalo'obe' bíin cajlaco'ob yéetel jéedzel.
Tu lu'umilo'obe', bíin yanac u péetpachilo'ob trigo yéetel u x péetpaachilo'ob uva,
mix bikin bíin p'áatac mina'an u ja'il ca'an ti'ob.
29Israel qui' a wóol teech,
¿Yéetel máax je'el u páajtal a que'etele'?
Yuumtzile' tu kabil tu lojech;
leti' canantiquech bey xan cu yáantiquech,
¡leti' u máascabil a béeychajal!
a aj p'eeco'obe' bíin u kububa'ob teech,
bíin a puch' u j ca'anal ichil.
Currently Selected:
Deuteronomio 33: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992