Daniel 12
12
U dzooc kiino'ob
1Ti' le súutuco' bíin chíicpajac Miguel, nojoch ángelil ca'an, le máax canantic yéetel cu toquic a caajale'.
Lela' jun p'éel u súutuquil yaayam,
jun súutuc mix bikin úuchuc ca'ach u láak beyo'
líikbal chúunic le múuch' caajo'obo'.
Le quéen kuchuc le súutuco',
bíin to'ococ tuláacal le a wéet caajalo'ob
máaxo'ob dzíibta'an u kaaba'ob ti' le dzíibil ju'uno'.
2Ya'abcach ti' le cu wenelo'ob ti' le mucnalo' bíin ajaco'ob:
jun jaatze' u ti'al u j cuxtalo'ob ti' ja'abo'ob mina'an u xuul,
u láako'obe' u ti'al subtzilil yéetel noj sajaquil mina'an u xuul.
3Le aj ojelo'obo' bíin léembalnaco'ob,
je'el bix léenbal le ca'ano';
le máaxo'ob cu ca'anbesico'ob ba'ax tu beel ti' ya'abcach máaco'obe'
¡bíin léembalnaco'ob je'el bix le eeko'ob ma'atech u tu'upulo'obo'!
4Ba'ale' teche' Daniel mucult le ba'alo'oba' yéetel dzáalkabt le ju'una' tac tu dzooc kiin. Ya'ab máaco'ob bíin u máanaco'ob tuláacal tu'ux táan u caxantico'ob u ya'abcuntico'ob u kaj óolalo'ob.
5Teen Daniele', tin wilaj u láak ca'a túul máaco'ob wa'alacbalo'ob, tu jujun tzéel le áalcab ja'o'. 6Jun túule' tu káat chi'itaj ti' le máac u búuquintmaj lino nooko', le máax ti' yaan ca'ach yóokol u ja'il le áalcab ja'o': ¿Ba'ax kiin bíin xu'uluc le ba'alo'ob jach jela'antaco'oba'? 7Le máac u búuquintmaj lino u nooko' tu líikesaj u kabo'ob tu tojil ca'an, ca tu jalach t'antaj tu kaaba' cuxa'an Ku, ca tu ya'alaj: Ichil óox ca'a tac táancoch u máalal ja'abo'obe', le quéen xu'uluc u pa'abal u muuk u caajal Kue', bíin xu'uluc túun tuláacal le ba'alo'oba'.
8Tene' tin wu'uyaj ba'ax tu ya'alaj ba'ale' ma' tin na'ataj mix ba'ali'. Ca túun tin káat chi'itaj: Yuumtzil, ¿ba'ax bíin úuchuc le quéen dzo'ococ tuláacal le ba'alo'oba'? 9Le ti'e' tu núucaj: xíimbalnen Daniel, tumen le ba'alo'oba' u najmal a ta'acbesico'ob tac quéen kuchuc u súutuquil. 10Ya'abcach bíin u mukyajto'ob le yaayaj ba'alo'ob a'ala'ano'obo', bíin p'áataco'ob utz yanilo'ob yéetel utzil chuca'ano'ob. Le j loolob máaco'obo' bíin u beeto'ob ya'ab meyaj loobo'ob, ma' tu páajtal u na'atico'ob ba'axo'ob cu yúuchul, ba'ale' le aj ojéelajo'obo' bíin u láaj ch'a'a nu'ucto'ob. 11Mil doscientos noventa kiino'ob bíin máanaco'ob, líikbal ti' le súutuc quéen a'ala'ac ma' u ku'ubul le sáamsamal quíimsbil ba'alche' yéetel quéen dza'abac le p'ecbe'en manba'alcunaj tu kulnaj Yuumtzil. 12Qui' u yóol le máax cu pa'ataj yéetel ocsaj óolal tac quéen máanac le mil trecientos treinta yéetel cinco kiino'ob. 13Ba'ale' teche' Daniel, xíimbalnen tac ta xuul yéetel je'elsajbáa, tu xuul le kiino'obo' ca líikil u ti'al a kamic a bo'olal.
Currently Selected:
Daniel 12: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992