Yoosuwa 3
3
ISRAAYIL MARI ORDON WEEQAYTU TABE
1Too ayrok geeri ayro Yoosuwa kee raqqa 'te Israayil ummat inkih maaca dibroh ugutta 'teh woo dabqih elle sugen Tikible-Golo deqsita aracak gexeeniih; Ordon weeqaytuk tabaanam fanah weeqayti xaqul elle yinfiddigen. 2Sidiica ayrok lakal Israayil makaabon kee saqolti, Israayil mari elle yinfiddige ikke fan yemeeteeniih; 3too waqdi keenik iyyeenimih, «Seeka, YALLAY sin Dagelta kinnihiyyah qahdi addat akak yan Sandug, quukah baahah tablen waqdi, litoonum ussukuqay ken kataata. 4Isin a baaxo mataaxigaanaay gita oson sin aybulleelon. Takkay immay gexxan waqdi woo qahdih sandugul maxayyoowina. Woo sanduguk salaf le kabuk inki kiilomitrih gide akak exxeeray gexa» iyyen.
5Yoosuwa a marak iyyemii, «Beera YALLI sin addal ablewaynuh tanim abam faxaah; tohih sabbatah taahirik gacay suga» keenik iyye. 6Sarrak seekak, «Isin kaadu Qahdi-Sandug luk ummattak foocat gexa» iyye. Seeka usuk iyyem abte.
7Tohuk lakal YALLI Yoosuwak annah iyye. «Anu a saaku abu waamak gexxaamah, Israayil mari kaxxa numuh koo abaluk raaqeleeh; anu Muusa lih akah suge innah ko'lih kaadu anim aaxigelon. 8Qahdi-Sandug quukah tabbixe seekak, ‹Weeqaytu guftan waqdi ibah adda akak gacay, soola› keenik inxic» iyye.
9Sarrak Yoosuwa kaadu ummattak annah iyye. «Amay YALLAY sin Dagelta kinnihiyya iyyam ankacisa. 10-11‹Waara Dagelti sin lih yaniih, isin bisoh gutuqak elle tamaateenimil Yalli Kanqaanah yooboke maraay, Ciitah yooboke maraay, Ciiwih yooboke mara kee Feriidah yooboke maraay, Girgaasah yooboke maraay, Amoorah yooboke mara kee Yabuusah yoobokeh mara inkih baaxok ayyaaqele. Waara Dagelti ne'lih yanim macal aaxigenno inteenik, YALLAY inkih yan baadak Amoytah yanihiyyah qahdih sandug Ordon weeqaytuk siinik foocak tabselon. 12Israayil kedoy taban kee nammay takkehiyyak kulli kedok num-num doora. 13Seekay inkih tan addunyah Dageltah yan YALLIH Qahdih Sandug quukah tabbixehiyya weeqaytuk tabta'gidih iba woo leeh addat hayta waqdi, Ordon weeqayti caxitak maraaqa. Too waqdi caxitak sugte lee inki aracal gaaboowele› siinik iyye» 'yaanam keenik iyye.
14-15Too keenik iyyem buqre edde orbisan waktih addak teneeh; weeqayti kaxxa lee luk yen.
Tohuk lakal ummatta woo Ordon weeqaytuk tabaana'gidih elle sugen ikke cabeenih gexeeniih; too waqdi seeka, Qahdi-Sandug quukah abbaxuk, ummattak foocat taben. Seeka woo weeqaytih addat ibah culusse waqdi, 16-17weeqayti lee caxitak maraaqinnaay, Xartan deqsita aracak darrel ten Adam deqsitta magaalal gaabowte. Rabe Bad deqsita bad fan caxitak sugte lee inkitanuuk tiggiriqeh. Too waqdi sinam inkih woo lee sinni kafin baaxol gexxeeh; seekay Qahdi-Sandug quukah tabbixehiyya, Ordon weeqaytuk gudey kafinuk raqtehiyyal, ummatta inkih taturra intam fan soolak sugte. Sinam inkih Yeriko deqsitta magaalah gariik Ordonuk tabte.
Currently Selected:
Yoosuwa 3: NKM
Highlight
Share
Copy
Want to have your highlights saved across all your devices? Sign up or sign in