Matthai 2
2
Mitingle ih Lumleennak
1Siangphahrang Herod san lio, Judea peng sung, Bethlehem khua ih Jesuh a suah hnukah mitingle cu Nisuahnak in Jerusalem ah an pha ih 2“Judah siangphahrang dingih a suakmi naute cu khawnangah a om? Icatile nisuahnakla ah a arsi kan hmu ih amah upat pia dingin kan pha,” tiah an dil. 3Siangphahrang Herod ni ahi thu a zak tikah a thin a phang, culeh Jerusalem ih om mi zate ni khaw an thinphaanpi. 4Culeh Tlangbawi upapawl leh daanthiampawl a ko khat hngai ih Messiah khawnangih a suah thok a hlekhlai hngai. 5Anmimi ni, “Judea peng sungih Bethlehem khua ah a suak thok; icatile acu cu profet ih ngantaak rommi:
6‘Culeh nang, Judah ram
sungih Bethlehem,
Judah uktu khuapawl lakah
na tenautleng hrimhrim lo;
icatile namah sungin
ka miphun Israel khaaltu ding
uktu pakhat a suak thok’
timi cu a ii,” #Mik 5:2.
tiah an sim.
7Cutikah Herod ni mitingle cu a thuptein a ko hngai ih arsi khawcang cekci ah a lang ti an hemin a hlekhlai. 8Cuhnukah Bethlehem ah thlah hngai in, “Tat u la naute cu cemmeh ngaiin hrawl uh; culeh nan hmuhngah tikah ma sim u la kei khaw tatin upat a pia ve taw ing,” tiah a cah hngai. 9Siangphahrang ih thucah an zakngah in an pok; culeh a suah an hmuhmi arsi cu naute omnak hmun cungih a diin hlansung an hmala in a tat. 10Arsi an hmuh tikah an lung a awi vuai. 11Inn sung an luh ah naute cu a nu Mari rum an hmu; culeh an khuk bilin upatnak in an bia. Cuhnukah an hlawnthil kuangpawl hongin sui, frankincense leh myrrh#2:11 Frankincense ti cu thingthling rimhmui a ii. Myrrh ti cu Thingthling a khami in vuakmi rimhmui a ii, minung, mithi tiksa hnulh ah an hmang, Mai-ir tiih rel thok. rimhmui laksawng ah an ṭhen. 12Culeh an mangla ah Herod hemih kirṭhan lo dingin ralrin piak an ik ruangah, lam pace in an ram laah an tlung.
Izipt ram ah Ralzuan
13An tah hnukah Bawipa ih vanmi pakhat cu Josef ih mang ah langin, “Tho, naute leh a nu hi pita hngai la Izipt ram ah zuang lei cu khawh, ka tan sim hlansung acunangah om uh; icatile Herod ni naute hi siatsuah dingah a hrawl samte vel,” tiah a ti. 14Cutikah Josef cu a tho, cun naute leh a nu cu pita hngai in zan pi ahcun Izipt laah an tat, 15culeh Herod thih tiang acunangah an om. Ahihi Bawipa ni profet hemin, “Izipt ram in ka tiapa ka kosuak” #Hos 11:1. tiih a sim taakmi kimngah dingah a ii.
Tepangpawl Thahciamconak
16Mitingle ih deuhngah a ik Herod ni a tiahtiak tikah a thin a kaangaw lianglo, culeh mitingle hemin a tiah-ngahmi caan rum caangtia in, Bethlehem leh a hrialkam ih om kum hnih leh a tangla pami tepang hmawhhmawh a thahsak hngai. 17Cutikah profet Jeremiah hemin sim taakmi:
18“Ramah khua ah aw
zak a ii,
Lungzuur ṭahnak, aihram
riangro aw,
Rachel ni a tiale a ṭah hngai;
an om ti lo ruangah,
hnem khaw a ngah lo,”#Jer 31:15.
ti cu a kimngah.
Izipt in Kirṭhannak
(Luk 2:39)
19Herod a thih tikah Bawipa ih vanmi pakhat cu Izipt ram ih Josef hemahcun a mangla ah a lang lohliih, 20“Tho, naute leh a nu pita hngai la Israel ram ah tat uh, icatile naute thah khaai tu mile cu an thi rom,” tiah a ti. 21Cutikah Josef cu a tho ih, naute leh a nu cu pita hngai in Israel ram ah an tat. 22Ihmansela Judea peng cu Arkhelaus ni a pa Herod canah a uk lio ti a zak tikah acunangih tah ding cu a thin a phang. Culeh a mangla ih ralrin piak a ik hnukah Galilee peng ah a tat mianmi. 23Acunangih Nazareth timi khua ahcun a om; acu cu profetpawl hemin sim taakmi, “Amah cu Nazareth khuami tiih kawh a i thok,” ti khi kimngah dingah a ii.
Currently Selected:
Matthai 2: KHBF
Highlight
Share
Copy
Want to have your highlights saved across all your devices? Sign up or sign in
Khualsim Holy Bible © Bible Society of Myanmar, 2021.