Ima̍tiyu 3
3
Ɛrɔ̄ yī Ijɔ̍ɔn Ohuyenyi
(Ima̍aki 1:1-8; Ilu̍uku 3:1-18; Ijɔ̍ɔn 1:19-28)
1Yɛ̄grāa ɔla̍ā Ijɔ̍ɔn Ohuyenyi wā bɛ̍ɛ̄nɛ̄, O̍ kū la lɛlā yī Ɔwɔ la ɔkɔ̄ka de āchɛ abɔ̍ɔ lipu̍ a̍chi̍ chukuru yī Ijudi̍ya. 2O̍ ē ka ē de āchɛ hīka, “Ala̍ ā pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ gɛ ko̍ō! Ma̍a! Ɔchwɔ̄lɛ̍ Oro̍ōre̍ yī Ɔwɔ de hōhī kurɛkurɛ mɛ̍.” 3Ijɔ̍ɔn nūma̍ nīi Ayisa̍ya ɔ̄chɛ ɔkɛrɔ̄ yī Ɔwɔ mwɔ̍ɔmu yī lɛlā nīi hɔ̄ ma̍ ma̍ ku̍ ɔ̄ a̍nɛ:
“Ɔ̄chɛ ɔha̍ yɛ abɔ̍ɔ ē tɔ̍ɔna lipu̍ a̍chi̍ chukuru hīka,
‘Ala̍ ā gbla̍a ɔpɔ̄pū yī Ādā lɔ̄lā de ɔ̍.
Ala̍ ā gbla̍a ɔgu yī nū kpakpakpa de ɔ̍.’”
4Ɔjā otūlibi̍īyē yī Ijɔ̍ɔn, e̍ ya̍ la urū yī ɛbɛ̍ obīho̍ ogbigū. O̍ ē de wɔkpa̍ ē ku̍ la owu. Ojōre̍ yī nū re̍ka ikūba ba̍la yenyi yī ɛngu̍. 5Āchɛ pɛ̍ wā dikpo̍ba̍ Ijɔ̍ɔn bū la Ijɛru̍sālɛm ba̍la ajɛ yī Ijudi̍ya wa̍a̍, ba̍la ɔcha yī ɔta̍kakatū yī Ɔkpa̍ yī Ijɔ̍dan. 6E̍ ē de lɛlā ɔdwɔ̄bi̍ yī wā ka ē hi̍yɛchɛ. Ijɔ̍ɔn ē chī hu wa̍ yenyi abɔ̍ɔ la Ɔkpa̍ yī Ijɔ̍dan.
7Āchɛ yī Ifa̍rasīi ba̍la Āchɛ yī Isa̍dusīi yɛ̄mɛ̄mɛ̄ pɛ̍ wā nīi Ijɔ̍ɔn ge̍ē hu wa̍ yenyi. O̍ ma̍ wā i̍ngɔ̍ɔ ma̍, o̍ de wa̍ hīka, “Ala̍ wɔma yī ogbiji nīi gblāa ma̍ ma̍! Ɔ̄nyɛ ka de ala̍ ka ala̍ ɔ̍lɔ ge̍ē hɛ̍ga ē hī ichi̍ ɔnɔ̄kɔ̄kū nīi Ɔwɔ ge̍ē de nīi yɛ ma̍ yewā ma̍? 8Ala̍ ā yɛ̍ɛ̄lā nīi ge̍ē chabɔ̄ hīka ala̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī ala̍ ma̍ gɛ. 9Ala̍ e̍e gbɛri̍ya̍ hīka ala̍ ɔ̍lɔ ge̍ē pīyaloko̍o hīka, je̍ka A̍brahāam ɔ̍lɔ - a̍dā yī ala̍ nɛ ni̍! Lēchi̍, n ā koko̍o de ala̍! Ɔwɔ lwɔhu̍ ge̍ē kpo̍ achɔ̄ ɔlamu nūma̍ ē de wa̍ pīya ayi̍ yī A̍brahāam ē mɛ. 10U̍ma̍ama e̍ de lɛgɔ̄ ku ɔchi̍ amu la ɛgba mɛ̍! Ɔchi̍ nīi i̍ ge̍ wā īkpō ɛnɛ̄ɛhɛhi ni̍, e̍ ge̍ē de ɔ̍ hɛ̍ tāajɛ, ē kpo̍ ɔ̄ tū ɔla̍. 11Ami ē hu ala̍ yenyi la yenyi ɔlamu wu̍chē yī ɔpīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī ala̍. Ɔ̄chɛ nīi ge̍ē wā la okwi̍ihi yī u ma̍ ga um ɔgɔ̄ga pɛtɛpɛtɛ. N i̍ ngma̍ lɛbɛ ɔnāa wɔkpa̍ ochelikpo̍ yī nū ɔbɔbɔ bī de ɔ̍ ni̍. Anu̍ ma̍ ge̍ē hu ala̍ yenyi la Uhu Ɔnɛ̄ɛhɛhi yī Ɔwɔ ba̍la ɔla̍. 12O̍ bī wɔ̍a̍ ɔwɔjā yī nū abɔ̍ɔ la abɔ̄. O̍ ge̍ē de igu yī nū wu gblɛ̍ɛgblɛ̍ɛ, ē kpo̍ ɔ̄ tū la yākwɔ̄ yī nū. O̍ ge̍ē kpo̍ a̍chra̍ yī nū chīyētū la ɔla̍ nīi i̍ nyo̍ōnyi̍ ni̍ ma̍.”
Yenyi Ohōhu yī Iji̍sɔ̄ɔsi
(Ima̍aki 1:9-11; Ilu̍uku 3:21-22)
13Yɛ̄grāa ɔla̍ā, Iji̍sɔ̄ɔsi pīya wa̍a̍ bū la ajɛ yī Iga̍līli ga abɔ̍ɔ ga Ɔkpa̍ yī Ijɔ̍dan dikpo̍ba̍ Ijɔ̍ɔn nīi Ijɔ̍ɔn ge̍ē hu ɔ̍ yenyi. 14Ijɔ̍ɔn yɛ ē chikpo̍ ge̍ē pīya anu̍ ūkpɔ̄tū ta̍. Wu̍chē yī ɔla̍ā o̍ da Iji̍sɔ̄ɔsi hīka, “Je̍ka ami ge̍ē hu yenyi la abɔ̄ yī wɔ a̍nɛ! Awɔ chōo̍chē ge̍ē wā dikpo̍ba̍ u nīi ge̍ē hu wɔ yenyi?”
15Iji̍sɔ̄ɔsi hīya anu̍ ɔkɔ hīka, “Ya̍ i̍ngɔ̍ɔ ji! Wu̍chē oji̍ nɛ, bū la ɔpɔ̄pū oli̍ngɛ̍ɛ̄nɛ̄ nīi alɔ ge̍ē ya̍ ɔjā nīi Ɔwɔ chikpo̍ ma̍ a̍nɛ.” Ijɔ̍ɔn de chɛ̄ bɛ̍ɛ̄nɛ̄.
16Iji̍sɔ̄ɔsi hu yenyi, ngmɛ̍ɛchɛ hī yenyi ɔpɔ̄ɔpɛ̄ ma̍, akpɔ̍ɔwɔ lwāa tɔ̍ɔ̄ta̍ hwōō ɔpɔ̄ɔpɛ̄. O̍ ma̍ Uhu Ɔnɛ̄ɛhɛhi yī Ɔwɔ nīi yɛ ē wā dikpo̍ba̍ ɔ̄, tībi̍īyē bāa libɔkpa̍ ma̍, wā ge̍ che ɔ̍ lɛhu̍. 17Ɔkɔlɛ̄lā ɔha̍ bū abɔ̍ɔ la ichō ka hīka, “Ɔyi̍ otōtū yī u gba̍a̍ hɔ̄ ma̍ a̍nɛ. N lɛ ɔwɔ̄wīyā kpɛ̍ɛji ba̍la anu̍.”
Currently Selected:
Ima̍tiyu 3: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)