Mal 3
3
1 #
Mat 11.10; Mar 1.2; Luk 1.76; 7.27 Dɛnaa Lawa Pàãyiidɛnaa a lɛ si ǹ boo n ka kɛ nɛ: Á ke, má maa dia dí-a wole dia máa a da zii zɛnaa ma nyɛɛnɛ. Ka bɛ́ giɛ dɛnaa mɛn li, á re we Lawa a kion a din bǎã-n gɔrɔ, maa boo gii-dali mɛn bɛ́ ka n duĩ, á re maa lɛ kɔ kɔn la ǹ boo lɛ pii ka nɛ. Á ke yii die, Dɛnaa Lawa Pàãyiidɛnaa na á pɛ. 2#Zow 2.11; SNS 6.17 A daa ǹ lɛawaa kɛn die kuu biɛ die ne. Bɛ̀ á soo ka yɔrɔ-a, min tá re boe la a golee lon a gòãn la? A n ká fɔlɔ yole a tɛ bɛ́ lɔn ka sɔmaa damɛɛ á ke lɔn. 3A n die die a yisi boe ka *gɔ̀ nɛ, ká ǹ bɛ́ sana laanka wɔrɔ yoe bɛ̀ ǹ na a yoreen kɔ lɔn. *Levii tɔrɔn kɛn Lawa a wúlu-bɔlen lɛa, á re ǹ tumaa yoreen koe. Bɛn tá re ǹ *wúlu mànan koe Dɛnaa Lawa la a zii li. 4Zudaa laanka Zeruzalɛmu minin wúlu mànan tá re kɔɔ̃n koe Dɛnaa Lawa ganaa, a ǹ si ka lɛlɛ bɛ́ lɔn ka lɛ̀ kɔsɔn kɛn bɛ́ lɔn ǹ nə́ kiɛ̃. 5Hiĩ! Dɛnaa Lawa Pàãyiidɛnaa pɛ: – Ma á re die ka bii ni ma kiri wɔ ka ganaa. Ma á re siɛ lɛlɛ ma zɛ̀rɛ koa kɔ́lɔnbaalin-a, naarɛbaalin ni, min mɛnɛn bɛ́ ǹ ba koe ǹ lɛ kɔ ǹ bɔlɔ lɛ wa, min mɛnɛn bɛ́ mɛnɛɛ dí-nyali la a sara paǹ li, min mɛnɛn bɛ́ mɛnɛɛ lɔ giɔɔrɔ laanka nɛ toen la, hinlaa ǹ nə́ mɛnɛɛ tiin la ka min mɛn tumaa bɛ́ ǹ ba nyɛ́ɛ biɛ masɛ yii-n wa.
Wusoo a da Lawa li
6Masɛ Dɛnaa Lawa, ma ba n bɔyɛɛ wa. Kasɛn dɔn, ka a n boe minin-sãli Zakɔba tɔrɔ taãnbaa kɛ-n doɛ̃ wa. 7A kũ ka digolon waáraa ganaa, ka kɔ maa daraan lɛ wa, ka ǹ lɛ si wa. Ka wusoo ka da masɛ li, ma á re wusii ma kaa wɔ baa. Ma din Dɛnaa Lawa Pàãyiidɛnaa n má pɛ. Ka n pii: «Wɔ n siɛ lɔn wɔ wusoo wɔ da n li?» 8Man ka lɛ sii kɛnɛn: «Minbuiin nɛ á boe la a Lawa sã?» Sɛnɛ, kasɛn man masɛ siɛ̃. Ka n nɔ̀n diɛ ma la: «Wɔ wɔ́ n sã ka wàa nɛ: kaa tán dí nya ǹ màn a talɛɛ a fùbaa ǹ wɔ a kɔmala gɔ́ɔ̃ nɛ, ka kaa wúlu màn a kɔmala nɛ. 9Ka n lɛ-ǹ baraa bii gɔ́ɔ̃ nɛ, a giala ka n ma siɛ̃, ka dinin ni, ka zaman lɛ tumaa nɛ. 10#LWS 27.30; MNS 18.21-24; TDP 12.6; 14.22-29; Neh 13.12 Ka da ká kaa tán dí nya ǹ mànan lɛn tumaa a talɛɛ a fùbaa ǹ wɔ nɛ taãnɛ, maa màn koa ǹ kion kɛ nɛ, màn-bii boo la a yɛ, koa nɛ maa kion biikoo tumaa li. Ka á boe la ka n da ma gɔ́ɔ̃ li ka ga-a bɛa sii lɛ paǹ li. Masɛ Dɛnaa Lawa Pàãyiidɛnaa, ka á re yii man die lon a dɔǹɔn lɛ buĩ, bǐɛ̃ tɔrɔ tumaa n die kiɛ ka la mɔnaa nɛ. 11Ma á re bisĩnin kuri, ǹ ba re basaã koe kaa wurun ni doo wa, ǹ ba re kaa *rezɛ̃ dan sàabiɛ nɛ kɔ ganaa wa. Má n lɛ kɔ ka la. 12Tɔrɔ kɔsɔn kɛn tumaa á re ka doɛ̃ foo kɔɔ̃n-an lɛa, a giala kaa gána a giã ma-n tá re goɛ̃ kɔɔ̃nɛ. Masɛ Dɛnaa Lawa Pàãyiidɛnaa n pii ka nɛ.»
Lawa a kiri wɔ pinaa
13Dɛnaa Lawa pɛ: – Ka n boo baraa diɛ masɛ ganaa ka n nɔ̀n diɛ: «Wàa boo baraa n wɔ da n ganaa?» 14Ka boo mɛn da á ke: «Ká mà dí nya Lawa nɛ n kooro lɛa. Á ke, wɔa là n wàa nɛ ta wɔ n bɔlɔ si, wɔ foo ziziɛ̃ nsɛ Dɛnaa Lawa Pàãyiidɛnaa taman yii. 15Wɔ́ dɔ̃ kanna kəni, din gole-kɔlen lɛn man ke ǹ foo n kɔɔ̃nɛ. Sii baraa-zɛnaalin lɛn man ke màndɛnan lɛa. Ta ǹ nə́ ga Lawa lɛ li, maǹ nə n boe a-n biikoo yii li.» 16Sɛnɛ, min mɛnɛn bɛ́ Dɛnaa Lawa lɛ sii, bɛn nə́ boo da kɔn ǹ dinin bii ni. Dɛnaa Lawa nə́ n too kɔ ǹ lon, á ǹ boo diɛ ma. Min mɛnɛn bɛ́ a pàã doɛ̃ ǹ ná a lɛ sii, ǹ nə́ bɛn tɔ kiɛ̃ sɛ́wɔ nɛ ǹ nə́ koa a yɔrɔ-a. 17Dɛnaa Lawa Pàãyiidɛnaa tɔn pɛ: «Ma bɛ́ re má pàã nyɛɛ ǹ mɛn pinaa, ma á re bɛn doɛ̃ maa wɔn lɛa, maǹ die ma din a zaman biɛ. Ma á re giɛ ǹ walan ka díi bɛ́ giɛ a nɛ walan lɔn n mɛn bɛ́ a guguru koe. 18Tɔtɔbaa mɛn bɛ́ min sonbore laanka min baraa niɛ̃ kɔn, min mɛnɛn bɛ́ Lawa guguru koe, ka min mɛnɛn bɛ́ ǹ ba a guguru koe wa, ka á re bɛ yii doo. 19Masɛ Dɛnaa Lawa Pàãyiidɛnaa n pii, maa lɛawaa a die, a n ka tɛ bɛ́ lɔn kuĩ girigiri, bɛa pinaa kɛ-n kəni din gole-kɔlen tumaa laanka sii baraa-zɛnaalin tumaa tá re kuĩ ka buu gere bɛ́ lɔn. Màn kɔn ba re boe ǹ kio wa, haalɛ boɛɛn kɛnɛn dinin wa. 20Sɛnɛ min mɛnɛn bɛ́ nyɛ́ɛ biɛ ma yii ni, maa lɛ kɔ á ke: Ka á re maa boo sii la yii ka wasa a soo biikoo bɛ́ lɔn, ma á re kakabaa koe ka la. Ka ǹ die goɛ̃ ka dinin gɔn wìi a lɛ-a, ka á re parɛ ka foo kɔɔ̃n nɛ ka diin nɛn wɔ bɛ́ lɔn ǹ soo ziã-n waáraa. 21Ma bɛ́ re ma pàã nyɛɛ ǹ mɛn pinaa ka á re min baraan kɛn yɔyɔrɛ, ǹ tá re n biɛ ka ton bɛ́ lɔn ka gòã giulun, Dɛnaa Lawa Pàãyiidɛnaa n pii ka nɛ.
Eli a wusoo a daa
22Maa dí-nyali Muizu ka daraa dí-pɛ mɛn ganaa, ka n yiri kɔ ka bɛ nɛ. Ka kɔ sii yɔrɔ bɔ ǹ boon kɛn lɛ ka landa boon kɛn nɛ ma ǹ kɔ la, Orɛbu kele la, Izirayeli a zaman tumaa wɔ lɛa. 23#Mat 11.14; 17.10-13; Mar 9.11-13; Luk 1.17; Zaã 1.21 Á ke, Dɛnaa Lawa a lɛawaa laan bɛ̀ a dɔ, lɛawaa gole ke a n nyɛ́ɛ diɛ, ma á re maa boo gii-dali Eli diɛ. 24Á re díin kiɛ kun ka ǹ nɛnyaanan nɛ, nɛnyaanan dɔn nə́ kun ka ǹ díin ni. Bɛ̀ á n baa miɛ̃ ma a re die kaa gána lɛ ziziɛ̃ doo wa.»
Currently Selected:
Mal 3: SBPE2011
Highlight
Share
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.