Matie 2
2
A banda ñani puoli ki cua Betelemi
1Jesu den mali Betelemi, Jude diema nni. Li den tie Herodi n den kaa ti gbandi po yaa yogunu. O madi puoli, yaa banda n diidi a ŋmabila den ñani hali puoli ki cua Jerusalemi. 2Bi den buali: «Ban mali Jufinba bado yua moala ne ye le? Ti laa ke o ŋmabiga pudi puoli, ke ti cua ki baa kpiagi o.»
3O bado Herodi n den gbadi laa laabaalo, o yama den yagi. Jerusalemi yaaba mo kuli yaa yama den yagi. 4O den taani bi kopadicianba yudanba leni li bali maama banda yudanba, ki buali ba U Tienu n Gandi Yua n den baa maa naankani. 5Bi den guani ki yedi o: «Betelemi dogu yuu n ye Jude diema nni, nani o saawalipualo n den diani maama:
6‹Fini Betelemi dogu, yuu n ye Juda diema nni,
Ŋaa tie Juda dociami siiga yaa dogu n wa ki cie.
Diidi, yaa bado n baa gobidi n niba Isidayeli yaaba,
Baa ña fini yaa niinne.› » #Mis 5.1.
7Lane ke Herodi den yini a banda yeni ŋasiili nni, ki buali ki bandi cain ban den laa ke ki ŋmabiga yeni pudi yaa yogunu. 8Li yaa puoli, o den soani ba Betelemi ki yedi: «Gedi mani ki ban buali ki bandi cain ki biga yeni laabaalo. Yi yaa laa o, yin teni min bandi, ke mini n ba moko baa gedi ki ban kpiagi o.»
9Ban den gbadi o bado n yedi ba yaala, bi den fii ki gedi. Ban den laa yaa ŋmabiga puoli po yeni, den kua bi liiga hali ki ban pundi ki biga n ye yaa dieli yuli po, ki sedi. 10Ban den laa ki ŋmabiga, bi pala den mangi hali boncianla. 11Bi den kua li dieli nni ki laa ki biga leni o naa Mariyama. Bi den gbaani ki kpiagi ki biga, ki lodi bi ŋalimani boaga ki ñani ki puni o yaa paabu n tie ne: wula, a dugibila leni mili. 12U Tienu den waani ba ti dangidi nni, ke ban da guani Herodi kani. Lane bi den tagini santo ki kuni.
Josefi leni o niba sani ki gedi Ejipiti
13Ban den fii, o Diedo maleki den doagidi Josefi kani ti dangidi nni ki yedi o: «Fii ki taa ki biga leni o naa ki sani ki gedi Ejipiti. Yin ban yaa ye lanpo, hali min baa waani a yaa yogunu, kelima Herodi baa lingi ki biga, ki bua ki kpa o.» 14Josefi den fii ku ñiagu ki taa ki biga leni o naa ki gedi Ejipiti. 15O den ye lanpo hali Herodi kuuma. Lani, o Diedo n den tuodi ki teni ke o saawalipualo n pua yaa saawalo den kua:
«N yini n bijua Ejipiti po.»#Ose 11.1.
Bi kpa Betelemi dogu bonjala
16Herodi n den sua ke a banda yeni boandi o, o pali den beni boncianla. O den soani ban ban kpa yaa bonjala n pia binalie lie leni yaaba n ki pundi yeni kuli, ki ye Betelemi leni u dobila nni kuli, nani a banda n den waani o, ke ki biga yeni n baa yaa pia yaa bina banlu. 17Lanwani, o saawalipualo Jeremi n den maadi yaa maama den tieni:
18Bi den gbadi i moe Rama dogu nni,
A bubula leni i wanli,
Raseli n buudi o bila kuuma,
Ki kan tuo ban baagi o kelima baa go ye#Jer 31.15..
Josefi leni o niba guani Isidayeli diema nni
19Herodi n den kpe, o Diedo maleki den doagidi Josefi kani ti dangidi nni Ejipiti diema po, 20ki yedi o: «Fii ki taa ki biga leni o naa ki guani Isidayeli diema po, kelima yaaba n den bua ki kpa ki biga yeni kpe.» 21Josefi den fii ki taa ki biga leni o naa ki guani Isidayeli diema nni. 22O den jie lipo guanma, kelima o den gbadi ke Herodi bijua Akelayusi kali o baa gbandi po, ki tua Jude bado. Ama U Tienu den waani o ti dangidi nni, ke wan gedi Galile diema nni. 23O den gedi ki ban kali Nasareti dogu nni. Li den gaa yene ke bi saawalipuaba n den yedi yaala tieni: «Bi baa yini o Nasareti yua.» #Mrk 1.24; Luk 2.39; Jan 1.45.
Currently Selected:
Matie 2: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.