Beli n'enjoka 1
1
Danieli n'abakuhani ba Beli
1Omukama Asitiajeshi kayatahize, engoma yalibwa Koreshi Omuperisi. 2Danieli ashangwa ali munywanyi w'omukama, ali nganziye kumushagira banywanyibe abandi bona.
3Abantu ba Babiloni bakaba baina ekihuku nikyetwa Beli. Buli kiro bakihongeraga amagunia nka ikumi na gatanu g'ensano nungi, entama makumi ganai, n'egaloni makumi gatanu z'amajuta. 4Omukama yakikuniraga, kandi yagendaga buli kiro kukifukamira. Kyonkai Danieli ogwo yafukamiraga Ruhangawe.
5Ekiro kimoi omukama amubaza ekyo alikwangira kufukamira Beli. Danieli ahorora Omukama Koreshi okwo ebihuku ebikozirwe abantu, wenene tabifukamira, shana afukamira Ruhanga omurora, ayatonzire eiguru n'ensi, Omukama w'abantu bona.
6Omukama Koreshi amubaza ati, “Notekeleza oti Beli ti Ruhanga omurora? Eby'alikunywa akanywa byona buli kiro tolikubibona?” 7Danieli asheka kushai, amugambira ati, “Rugaba, leka kwebeiya, ekihuku eki mulinga aheru, kandi omunda ibumba lishai. Tikilya kandi tikinywa.”
8Aho Koreshi atamwa. Ayeta abakuhanibe abagambira ati, “Kamutangambire alya ebintu ebi, nimufa. 9Kandi kamurazora okwo bilibwa Beli, Danieli nafa, aha rw'okuba yarogota ahali Beli.” Danieli ahorora omukama ati, “Okwo wagamba bibe nikwo biba.”
10Abakuhani ba Beli bakaba bali nshanju, bakazi babo n'abana batabulimu. Omukama Koreshi agenda na Danieli, bataha rwensinga ya Beli. 11Abakuhani ba Beli bati, “Ichwe twashohora. Iwe wenene, rugaba, olete ekyakulya, orung edivai, okinge n'orwigi, oshube orumaamire n'ekirambo kyawe. 12Bukeire bwankya k'oragaruka okashanga Beli atabiliire byona, tufe. Kitali kityo Danieli alikutubeiyelera, afe.” 13Bakaba batalikutina kantu, aha rw'okuba bakaba baina obutahiro obulikumanywa bonene bonkai obw'okugya omu meza okuzimu. Bagyaga omu meza omwo baba nimwo balira ebitambo ebyo. 14Kabamazire kuturuka, Omukama Koreshi ateramu Beli ebyakulya. Danieli aragilira abairube kukwata eijwi bakalimamilira omuli rwensinga, kyonkai Omukama Koreshi wenkai niwe yabaire alimu. Kabamazire kuturuka, bakinga orwigi, barumamira n'ekirambo ky'omukama, bakwata omuhanda bagenda. 15Omu kiro abakuhani baija na bakazi babo n'abana, nk'okwo bakagiraga, balya byona, n'eby'okunywa babimaraho.
16Bwankya omu rukyakya, omukama aimuka, agenda na Danieli. 17Omukama abaza Danieli ati, “Ebirambo bibambwire?” Amuhorora ati, “Tibibambwire rugaba.” 18Enyigi kumara kukingurwa, omukama akaleba aha meza, agambira eiguru ati, “Oba muhango Beli; tobeiya, tobeiya nakake.”
19Danieli asheka kushai, atanga omukama kutaha rwensinga, ashuba amugambira ati, “Olebe ahansi, oyekomye ebilenge ebi bya bahai?” 20Omukama agamba ati, “Nimbona ebilenge by'abashaija n'abakazi n'abana.”
21Aho omukama Koreshi anigara muno, akwata abakuhani, n'abakazi babo n'abana. Bamwoleka n'enyigi ezo yabaire atamanya, ezo batahiragamu kya ebyakulya ebyatekwaga aha meza. 22Omukama abaita, ekihuku kya Beli akiha Danieli; Danieli akyata na rwensinga ya Beli agikambura.
Danieli n'ekinyamugenge
23Kandi akaba aliyo ekinyamugenge kihango. Abantu ba Babiloni bakikuniraga. 24Omukama abaza Danieli ati, “Wakwanga okwo ogu ali ruhanga omurora? Omufukamire.” 25Danieli agamba ati, “Inye ninyija kufukamira Omukama Ruhanga wange, niwe Ruhanga Omurora. 26Kyonkai rugaba k'oranjubura, ekinyamugenge eki nkite, obuzira mbanda anga nkoni ya mutuli.” Omukama agamba okwo yamujubura. 27Aho Danieli akwata elami n'ebishaju n'eishoke, abichumbamu obukeki, abiha ekinyamugenge kibulya. Kakyabulire kyatulika orubunda. Danieli agambira Omukama Koreshi ati, “Olebe eky'otura nofukamira.”
28Abantu ba Babiloni kabakihuliire, batamwa muno, bashenga omukama nibagira bati, “Omukama yabaire Muyahudi. Aisire Beli, mbwenu yaita ekinyamugenge, nangu n'abakuhani abaisire.” 29Bazinda omukama bamugambira bati, “Otuhe Danieli, kakitali kityo nitukwita iwe n'omutungo gwawe.” 30Omukama abona okwo bamukiza amani, bamukaka; Danieli amubaha.
31Danieli bamunaga omu rwina rw'entare, amaramu ebiro mukaga. 32Omu rwina orwo akaba alimu entare mushanju. Buli kiro zahabwaga abantu babili n'entama ibili. Kyonkai eli tibazihaire kantu, zibone kulya Danieli.
Danieli naruga omu rwina rw'entare
33Omu makiro ago omurangi Habakuki akaba ali Yuda. Ashangwa ajurugire obushera aina n'omugate agubegabegulire omu bakuli nabitwalira abagesi omu ndimiro. 34Nikwo omumalaika w'omukama kumugambira ati, “Habakuki, ekyakulya eki okitware Babiloni, okihe Danieli omu rwina rw'entare.” 35Habakuki amuhorora ati, “Waitu, Babiloni tinkagyagayo, kandi n'orwina tindikurumanya.” 36Aho omumalaika w'Omukama amukwata eishoke omu kihorahore amweleza eiguru, amugobya Babiloni aha rwina rwonene; omumalaika ogwo emiharalireye ekaba neshusha emihutire y'omuyaga ogungi.
37Aho Habakuki ayeta muno ati, “Danieli, Danieli! Tora ekyakulya ekyo Ruhanga yakutwekera.” 38Danieli agamba ati, “Waitu Ruhanga, wasinga wanyijuka, abakugonza tobanagirana.” 39Aho aimuka alya. Aho honkai omumalaika w'Omukama agarura habakuki omuka.
40Aha kiro kya mushanju omukama agya kuchulira Danieli. Kayagobire aha rwina alingulizamu, abona Danieli okwo akashuntamire. 41Omukama agamba n'eiraka lihango ati, “Waitu Mukama Ruhanga wa Danieli, oba muhango, mara taliho ruhanga ondijo shana iwe.” 42Ajumbura Danieli omu rwina, arunagamu ababaire benzire kumwita. Entare tizabarakize, zibalya omukama abalebire.
Currently Selected:
Beli n'enjoka 1: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.