MATYE 2
2
Ticlimi fɛɛ mà bâ Jesu syeri we
1Klo fɔlɔ Erɔde nyiŋi na ge, pe dá Jesu he we wa Jude klo kàʔà kà ni pé naʔa yeri Bɛtelɛmu. Ticlimi fɛɛ bee pé na ŋoŋoo kala ploʔo à pèè ma jɛ wa yaa ki jɛhaʔa namyɛʔɛ na ge mà pan wa Jerusalɛmu kàʔà ni ge, 2mà bâ yo: «Pé ma Juwifiyee pe masa naŋa he we hanbe? Mɛjɛn wo da wi ŋolo nya wa yaa jɛhaʔa na ge. À wo pan jango bì bɔɔ kpɔʔɔ.» 3Klo fɔlɔ Erɔde wi gáʔà loʔo ge, àʔa wi lama wlele me wi na mà plɛn Jerusalɛmu kàʔà hɛɛn pè bɛfu ní. 4Wɔ̀ɔ sraʔá farafɛɛ kpandoo ní Juwifiyee pe Furu sɛbɛ cɛnfɛɛ pè bɛfu kpoʔolo mà bâ pe yugu deʔe ga na pé bi Nyɛʔɛlɛ li wofràa he we. 5À poo po: «Pé buu he Bɛtelɛmu ni, Jude klo kàʔà kà gi. Mɛjɛn Nyɛʔɛlɛ leyoo wà dàʔa nyoŋo ban mà yo: 6Nyɛʔɛlɛ à li yo:
Bɛtelɛmu, mo ŋa wa Jude klo ni,
má nyɛ kpangbanŋa ceŋge wa Jude klo kàkpɔ̀rɔ́ ni de.
Mɛjɛn wà bi ba nyini wa ma nî ŋa wí bi da na hɛɛn Israyɛli woo naʔa be.» # 2:6 ma wèle wa Mis 5:1 ni wè.
7Erɔde wɔ̀ɔ ticlimi fɛɛ yeri be hrama ni mà bâ pe yugu mà pe ceʔe nyiŋi ga nì pe dá ki ŋolo nya le, 8mà pe tun wa Bɛtelɛmu kàʔà ni ge mà yo: «Yee sye, ye ya pe yùgú kmaʔa pyɔ kala ní le. Nà yoo nya ge, ye pan ye baʔa yo ná kan, jango domi fanna, bì gɛri wa bì yɔ̀ɔ kpɔʔɔ kpo.»
9Pe gâ klo fɔlɔ wi kayoro loʔo de kɔ ge, à pe kɛri. Ŋolo la pe dá nya wa yaa jɛhaʔa deʔe na ge, à li na kunnu pe yɛʔɛ̀ fɔ mà yâ yere be deʔe ga na pyɔ wi dá bo ge. 10À pe gáa li nyaʔa ge, pe lama à mi fiʔi pé na ceŋge. 11À pe je wa go ni ge mà pyɔ nya we ní wi no Mari ní we. À pe kunbiʔi kán wì tanla mà noo kpɔʔɔ mà pe tuʔuru nyɛʔɛ de mà nadanma yrɛbɛ kan wí ma. Pí ba: Tɛ nì, ní tyâ nì ga pe dáa hori ná ki nudanʔa syo ge ní hundanma ma nì pé na yeri miri ge. 12Nyɛʔɛlɛ à li bâ yo pé ni ŋloʔo na mà yo pò ga hru bì gɛri wa Erɔde krugu we nɛ. Ki kala na, à pe hru mà kɛri pe klo ni le kloʔò kà ni kì yɛ.
Jesu wi heme mi krɛlɛ Ejipite klo ni
13Pe gâ gɛri kɔ ge, wò fɔlɔ wi mlɛŋɛ à wà ma bâ wì tyɛʔɛ Josɛfu na we ŋloʔo na mòo po: «Jɛ̀, ma pyɔ kpe we ní wi no nì we, ma fyala ma kɛri pé ni wa Ejipite klo ni. Ma ya gò wa fɔ bì baʔa yo má kan nɛ bì yo ma hrù ma pan. Mɛjɛn Erɔde wí bi da pyɔ ca we bùu kpo.»
14Ki yebliʔi ni ge, wɔ̀ɔ jɛ mà pyɔ kpe ní wi no nì we mà fyala mà kɛri pé ni Ejipite klo ni le, 15mà yâ go wa fɔ mà bâ no Erɔde wi kunyiŋi na, jango wò fɔlɔ wi kayoro ti fùnŋù da wi dá yo wi leyoo ma we mâ yo:
Mí ma na Pyɔ yeri we wa Ejipite klo ni le. # 2:15 ma wèle wa Ose 11:1 ni wè.
Erɔde wí ma pii kpo
16Erɔde pɔɔ da gáʔà nya ticlimi fɛɛ pé moo fanla ge, wi lama à mi gban wí na ceŋge. Wɔ̀ɔ sorasiyee troʔo mà yo pe ya Bɛtelɛmu kàʔà nabipiʔi kè bɛfu kpo ní nabipiʔi gee ní ké nyɛ wa kyɛ̀rɛ̀ da ni wa Bɛtelɛmu tanla we, gee ke ìn jé yɛʔɛ́ syɛn syɛn ta we ge, mà yala nyiŋi ga nì wi dá ticlimi fɛɛ yugu mâ pe ceʔe ge. 17Ki nyini na, àʔa funŋu ga Nyɛʔɛlɛ leyoo Jeremi wi dá yo ge mâ yo:
18 Pé ma ákpolo loʔo wa Hrama kàʔà ni ge
taʔaraʔa ní yooloʔo ní.
Mɛjɛn Hrasyɛli wí na kpele
mà na taʔara wi pii kala na le.
Di wi ìn ki ta wà buú fɛn,
mɛjɛn wi pii pé ma ku. # 2:18 ma wèle wa Jer 31:15 ni wè.
Jesu wi heme hrúmu Israyɛli klo ni le
19Erɔde wi da gâ gu kɔ, ki kruʔu ma à wò fɔlɔ wi mlɛŋɛ wà ma bâ wì tyɛʔɛ Josɛfu na we ŋloʔo na wa Ejipite klo ni le, 20mà yo: «Jɛ̀, ma pyɔ kpe we, ní wi no nì we, maa sye Israyɛli klo ni le. Mɛjɛn bee pe dí bo naʔa ca bí pyɔ kpo we, pé ma ku.»
21Ki kala na, Josɛfu wɔ̀ɔ jɛ mà pyɔ kpe ní wi no nì we mà kɛri mà yâ je wa Israyɛli klo ni le. 22Wi gáʔà loʔo mà yo Arikelayusi wí nyɛ Jude klo fɔlɔ wi to Erɔde nolo na le, wɔ̀ɔ fya bì gɛrí wa. Nyɛʔɛlɛ à li yo wí ni ŋloʔo na. Wɔ̀ɔ laʔa mà kɛri Galile klɛnmɛ ni, 23mà yâ go wa kàʔà kà ni pé naʔa yeri Nasarɛti, jango Nyɛʔɛlɛ li leyoo pe kayoro ti fùnŋù, da pe dá yo mâ yo: Pé bi baa Nyɛʔɛlɛ li wofràa yeri Nasarɛti kàʔà woo ge.#2:23 ma wèle wa Mar 1:24; Luk 2:39; Jan 1:45 ni wè.
Currently Selected:
MATYE 2: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire