Matye 9
9
Zyezu n syɛɛnmɔngɔɔ pɔʔɔ
(Mar 2:1-12; Luk 5:17-26)
1A Zyezu jée kɔ́rɔw ni n lǒgi jeli n sáà jée wi kěgi ni. 2A be syɛɛnmɔngɔɔ láa yasinɛgɛ ni n pan wi ma. A Zyezu ga be tágali nyaa, a wi syɛɛnmɔngɔw pye: «Ni pyà, maa fundaanra kpéʔele. Mɔ kapeegèle kùsulugo n syɔɔ.» 3A làlwaw sɛ́bɛwelebèle pèle fala ni gi sɔ̀ngí peyɛɛ fúnyi ni níì jo: «Nǎnw naa i Kolocɔlɔɔ mɛ́ɛgi kálagi.» 4A Zyezu fala n be sɔ̀nguri cán, a wi be pye: «Nyàʔá na yele sɔ̀ngubeeri bee sɔ̀ngí yele fúnyi ni? 5Bi jo: ‹Mɔ kapeegèle kùsulugo n syɔɔ,› koro ga jáa bi jo: ‹Yìri maa táanri,› gìí gi wɛ́ʔɛri? 6Koro ga pye yele í gi cán séew i nyɛ Syɔɔn-pya ma tári na bàā kapeegèle kùsulugo syoo.» A wi syɛɛnmɔngɔw pye: «Yìri, mi mɔ yasinɛgi láa maa syée mɔ kpaʔa ma.» 7A wi fala n yìri n kári wi kpaʔa ma. 8A syɛ́ɛnmi ga gee bee nyaa, a bi fyáa ní i Kolocɔlɔɔ kpɔ̀ʔɔrɔ́, woro wee wi séew bee félege kaan lè syɔɔn ye ma.
Zyezu n Matye yeri
(Mar 2:13-17; Luk 5:27-32)
9A Zyezu ga núngo nɛɛ bee, a wi sáà nànwaa nyaa wodɛ́ɛɔn ní wálisyɔɔbèle kpaʔa ni. Pe i wi yiri Matye. A wi wi pye: «Taʔa mii na wo kári.» A wi yìri n taʔa wi na.
10 #
Luk 15:1-2
A Zyezu ga sáà tɛ́ɛn ni líi kpáagi ni, a wálisyɔɔbèle ní kapeebyebèlē saʔa pan n baa tɛ́ɛn ni líi ní wi ní n fàra wi pìitamabèle na. 11A Farisibèle ga gee bee nyaa, a be wi pìitamabèle pye: «Nyàʔá na yele tamafɔw pínɛ ni líi ní wálisyɔɔbèle, ní kapeebyebèle ní?»
12A Zyezu ga gee bee lóʔo a wi jo: «Bele be cólogo lè, pe màko o nyɛ lɔ̀ʔɔtɔrɔ na í, fwɔɔ bele be yáa lè. 13#Mat 12:7; Oz 6:6 Ki n yɛlɛ ye sa syɛ́ɛnri naa kɔ́rɔ sɛʔɛ ye wéle àmɛɛ gi joo lè: ‹Nyinimɛ mii caa. Mii o sáriga caa í.› Níì cán mii ga pan ba syɛɛnsinbèle yeri í, fwɔɔ kapeebyebèle.»
Zyezu ní súnw lele kéele
(Mar 2:18-22; Luk 5:33-39)
14Lǎli bee ni a Zyan pìitamabèle pan Zyezu ma n baa wi yíbe níì jo: «Nyàʔá na wolo ní Farisibèle súnw nii, mɔ piitamabèle si o wi nii í?» 15A Zyezu be yari: «Cefɔnw fɔ́lɔ ga pye ní cèpɔrigi syɛ̀ɛnnɛ ní, pe a gbǎn ra yɛ́ɛyi taanri lé lǎli bee ni? Làlaa si i maa, lee ni pe a ba cefɔnw fɔ́lɔ yirige lè pe níngi ni. Lǎli bee ni pe a náa súnw le.
16Syɔɔn faala o fànifɔɔn téeri ni fànilɛɛɔ tɛɛsulugo jɔli í. Ki ga pye ànbée, fànifɔnw a kùru wiyɛɛ na bi láʔa fànilɛɛw na, tɛɛsulugi si náa pee bi sɔ̀lɔ. 17Pe wɔ́ɔ o dùvɛɛnfɔɔn nii saliya kpàbilɛɛbéle ni í. Ki ga pye ànbée, kpàbibèle a fologi cɛnɛ, dùvɛɛnw si wo, kpàbibèle si wɔ́ɔ kálagi. Kàjáa pe i dùvɛɛnfɔɔn nii saliya kpàbifɔnbéle ni, ti myɛ tɛ́ɛyi siin n kòro wojanra ní.»
Zyefubèle sérikpaʔa kafɔlɔ jáa ní céw wi tánga Zyezu búrogi na lè
(Mar 5:21-43; Luk 8:40-56)
18Lǎli ni Zyezu pye ni kérigèle bee nyuu be ma lè, a Zyefubèle sérikpaʔa kafɔwaa pan n baa kpùmɔnɔ wi taana níì jo: «Mii calipili n kùu tɔ́ɔliw ni. Koro ní ki myɛ ní maa maa mi ba mɔ kɔ́gi taʔa wi na, wi a nyán.» 19A Zyezu ní wi pìitamabèle yìri n pínɛ ni syée ní wi ní.
20Cewaa si maa pye ní lòwelige ní, a gi kwɔ́ɔ wi na yɛ̀ʔɛlɛ kɛɛ ní siin, a wee bee taʔa Zyezu na n sáà tánga wi búrogi kàgomɔ na. 21Níì cán wi maa ni gi sɔ̀ngí wiyɛɛ fúngi ni n jo: «Alí mii ga tánga wi búrogi yagana na, mii a pɔʔɔ.» 22A Zyezu ga kàri n wéle n wi nyaa, a wi wi pye: «Ni pyà, mɔ a kɔ́ ra fɛ̀ɛgí í, mɔ tágali n mɔ pɔʔɔ.» Lǎli bee ni a céw fala n pɔʔɔ.
23A Zyezu ga sáà jée sérikpaagi kàfɔlɔ kpaʔa ni, a wi maawiibèle nyaa, ní wɔ́ɔ̀ syɛ́ɛnmi nyaa a bi fúnyi curugo bi na. 24A wi be pye: «Yaa yirigi yaà, níì cán pìcaapili ga kùu wii í, a li ŋúnɔ wii.» A be i peyɛɛ nyɛ́nɛ wi na. 25A be ga syɛ́ɛnmi yirige, a Zyezu jée kpáagi fúngo ni n sáà pìcaapili cò kɔ́gi na n yìrige. 26A kéeli bee fala n cariga tári bee myɛ ni.
Zyezu n fúunbéle siin paʔa
27A Zyezu ga yiri nɛɛ bee ni syée, a fúunbéle siin taʔa wi na ní i yákpogèle wáa wi kurugo níì jo: «Davidi jáaw, nyinimɛ taa wolo na.»
28A wi ga sáà jée kpáagi ni, a fúunbèle bee nùuni wi na. A Zyezu be yíbe níì jo: «A yele tága lé gi na ncan mii fánʔa i nyɛ gee bee na bi gbǎn gi kpéʔele?» A be wi pye: «Ɛɛn, Kàfɔw.» 29A wi fala n tánga be nyapiigèle na níì jo: «Ki n yɛlɛ gi kpéʔele yele ma bi yɛlɛ ní yele tágali ní.» 30A be nyapiigèle fala n múgu. A Zyezu gi joo n gbàn be ma níì be pye: «Ki n yɛlɛ ye kɔ̀rɔsíi, ki ga yɛlɛ syɔɔn faala í kɔ́ gi cán í.» 31A be ga yiri nɛɛ bee terire, a be sèʔé sa ni wi kéeli jáari tári bee myɛ ni.
Zyezu n bobonaɔn pɔʔɔ
32Lǎli ni fúunbèle yiri ni syée lè, a pèle pan ní boboo ní Zyezu ma. Màdeo maa pye wi ni. 33A wi ga màdew nɛnɛ n yirige, a boboow fala ni nyuu. A syɛ́ɛnmi i káama gi na níì jo: «Gee naa kàa félege ga kɔ́ɔ̀ nyaa Isirayɛli tári ni í.» 34#Mat 10:25; 12:24; Mar 3:22; Luk 11:15 Kàjáa a Farisibèle jo: «Màdebèle kàfɔlɔ báriga ni wi màdebèle nɛnɛ ni yirigi syɛ́ɛnbèle ni.»
Syɛ́ɛnmi nyínimɛ i nyɛ Zyezu na
35 #
Mat 4:23; Mar 1:39; Luk 4:44 A Zyezu fala ni syée kèkpoloyi ní kèpiigèle myɛ ma n sa ni be tama pe sérikpaayi ni, ní i Kolocɔlɔɔ fǎngi syɛɛnjóocànra nyuu, ní i yáami féleye myɛ láari syɛ́ɛnbèle na. 36#Cór 27:17; 1Fàn 22:17; 2Cán 18:16; Ezek 34:5; Mar 6:34 A wi ga syɛ́ɛnmi nyaa, a bi nyínimi wi taa gbanʔama, níì cán bi fúnyi maa tɔ̀nɔ n curugo bi na, a bi yɛ́ɛyi wɔ́ɔ àmɛɛ bànaʔaɔ fun bàala nyɛ lè. 37#Luk 10:2 Lǎli bee ni a Zyezu wi pìitamabèle pye: «Yaliilɛɛgwɔɔri n tɔ̀nɔ n nɛʔɛ séyi ni, kàjáa ti láafɔbèle ga nɛʔɛ í. 38Koro na gi yɛlɛ yaa séyi Kàfɔlɔ nyɛ́ɛri jàngó waa yaliilaabèle kɔ́ri waa tórogi wi séyi ma.»
Currently Selected:
Matye 9: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.