Malasyii 3
3
1 #
Mat 11:10; Mar 1:2; Luk 1:76; 7:27 «Wéle, mii a mii tundunw tun. Wi a sa kologo wòlo mii yɛ́ʔɛ ma. Kàfɔw a ba foo jée wi kpɔ̀ʔɔrɔli kpaʔa ni woro wee yele caa lè. Joogaanni tunduɔn kéele li nyɛ yele fúnyi ni lè, woro wi maa wee,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya. 2#Zyow 2:11; Tɛ̀ɛn 6:17 Wìí wi a ba gbǎn yére wi panni canʔa na? Lǎli ni wi ga wiyɛɛ dɛ̀ɛn lè wìí wi a gbǎn kòro woyéreo ní? Níì cán wi i nyɛ àmɛɛ tunmɔgbalaɔ náa nyɛ lè, ní àmɛɛ fànijeebéle yajeʔe nyɛ lè. 3Wi a tɛ́ɛn bi pye àmɛɛ wálifiio gbàlafɔlɔ nyɛ lè, wee wi wálifiiw gbàlá ni fɔ́ɔnri yirigi wi ni lè. Wi a Levii yòdaʔayi jéemununɔ kpéʔele bi fɔ́ɔnri yirige be ni, àmɛɛ be fɔɔnrɔ yirigi lè tɛɛ̀, ní wálifiio ni, pe a ba pye Yawe má syɛ́ɛnbèle pèle, bele pe a ra maa ní yakaanyi ní lè ní sínnɛ ní. 4Lǎli bee ni Zyuda ní Zyerusalɛmi yakaanyi kéele a Yawe dɛ́nɛ, àmɛɛ gi pye lè booma cányi ni, ní àmɛɛ gi pye lè yɛɛzɔlɔgwɔɔgèle ni. 5«Mii a nùuni yele na kútiiw kéele na, mii a séera kpéʔele kelekele dɛ̀ɛ́bèle ní kanɔnʔɔbyebèle kánma na, ní bele be jànvaaw kàliya kɛ̀ɛ́ lè, ní bele be fǎngi gbàngí sàra-na-falipyeo, ní lɔgucaa ní círio na lè, ní wɔ́ɔ i kolomɔ kútiiw nyuu nibɔɔn na, pe si o fɛ̀ɛgí mii na í.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.
Bi lúru Yawe ma
6«Awá, mii wi nyɛ lè Yawe, mii o fɛ̀ɛ́ í. Koro na yele ye nyɛ lè Zyakɔbi jáabèle, yele ga kálagi n yiri yaà í. 7Nlaa yaà yele tóolɛɛbèle canya na, yele n láʔa mii làlwaw kèlē na, yele ga ge cò í. Ye lúru mii ma, mii a wɔ́ɔ lúru yele ma.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya. A yele si i gi nyuu níì jo: «Mɛ̀ɛ́ wo níì yɛlɛ bi lúru sɛ́ɛ?» 8«A syɔɔn a gbǎn Kolocɔlɔɔ jànváa lé? Yele si i mii jànváa, ní i gi nyuu níì jo: ‹Gìí ni wolo mɔ jànváa?› Yáʔaw, ní sárigaw kéele ni wii! 9Dángaw n nan yele na, àmɛɛ yele mii jànváa lè, yele syɛɛnfelegi myɛ wobogo! 10#Lev 27:30; Cór 18:21-24; Làlw 12:6; 14:22-29; Neh 13:12 Yaa maa ní yáʔaw wovoroo ní, lɔ́ri tɛɛkɔngɔ kpaʔa ma, koro ga pye yaliire í pye mii kpáagi ni. Ye mii pye ye wéle kánmi bee na, yé gi wéle kapye mii a nyɛ̀ʔɛni wéegéle múgu si dùbaw tìrige yele ma saʔa í, fwɔɔ wi tɛɛkɔngi a gbǎn taa í.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya. 11«Mii a fúlo yáriri lìifɔlɔ na bi kaan yele ma, wi a ní tári yafálara kálagi yele ma í, ɛrɛzɛn tírinaa-sìnzanga a ní pye yele séyi ni í,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya. 12«Syɛɛnfeleyi myɛ a ra yele yiri dùbaw pìibēle, níì cán yele a pye fundaanra tányɔʔɔ,» Yawe wi lè Nyɛ̀ʔɛni Sùlasibéle Kafɔlɔ, woro wi jo nya.
Cángee na Kolocɔlɔɔ a wi sínni tɛ̀ɛn lè
13«Yele syɛ́ɛnri n gbàn mii kánmi na,» Yawe wi jo nya, «á yele si i gi nyuu níì jo: ‹Nyàʔá wolo nyuu ní woyɛɛ ní mɔ kánmi na?› 14Yele n jo: ‹A syɔɔn i báara Kolocɔlɔɔ ma wii gbanzan. Amɛɛ wolo wi tundunri cò ní i táanri ní funbɛɛnrɛ ní lè, Nyɛ̀ʔɛni Sùlasiibéle Kafɔlɔ Yawe kéeli na, nyàʔá wolo taa gee bee ni? 15Tɔ́ɔliw ni wolo i gi tímana n jo nɛ̀ɛgbɔʔɔgi fɔ̀ɔlɔ i nyɛ dùba pìibēle. Kányɛʔɛ na, bele be péemi kpéʔele lè, kàa i taari be na. Pe tɔ̀nɔ́ i Kolocɔlɔɔ pingi ni wéle, yafyɛn si o be taagi í!› »
16Lǎli bee ni bele be fɛ̀ɛgí Yawe na lè, a poro i nyuu ní peyɛɛ ní. A Yawe líiyi cáan n lóʔo be ma, a sɔ̀ngudaara sɛ́bɛ sɛ́bɛ wi yɛʔɛ̀ ma, jàngó bàā wi sɔ̀ngumi tìrigí bele kéele na be fɛ̀ɛgí Yawe na lè, ní i wi mɛ́ɛgi kpɔ́ʔɔgi. 17Yawe wi lè Nyɛ̀ʔɛni Sùlasiibéle Kafɔlɔ, wi n jo: «Cángee mii sámagi ni yaari lè, pe a ba pye mii wòolo, pe a tɔ̀nɔ́ pye mii tiimaa wòolo cángi bee na. Mii a ra be kɔ̀rɔsíi, àmɛɛ nàɔn wi jaà kɔ̀rɔsíi, wee wi báara wi ma lè. 18Yele si a náa ba gi nyaa wàlimee bi nyɛ lè syɛɛnsiɔn ní syɛɛnpeeo níngi ni, ní wee wi báara Kolocɔlɔɔ ma lè, ní wee wi lè wi o báara wi ma í, poro níngi ni. 19Níì cán cángi gi maa gee: Ki i nyɛ àmɛɛ naagbanga fúru nyɛ lè. Nɛ̀ɛgbɔʔɔgi fɔ̀ɔlɔ myɛ, ní bele be péemi kpéʔele lè poro a ba pye àmɛɛ nyàásige nyɛ lè. Cángi bee gi maa lè, ki a ba cò be na naà,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya, «wi a nìnge, wàlá káganbile yaʔa be ni í. 20Kàjáa yele bele ye fɛ̀ɛgí mii mɛ́ɛgi na lè, sínni canʔa a folo yele ma, pɔʔɔli si pye gi fókaanyi láara ni. Yele a yiri bàā yegi àmɛɛ nìtoʔo náapiiye nyɛ lè. 21Yele a ba ra syɛɛnpeebèle tánʔana, níì cán pe a ba pye yele yédaagèle láara ni àmɛɛ cɔnʔɔ nyɛ lè cángee na mii sámagi ni yaari lè,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.
Elii lúrubanni kéele
22«Ye sɔ̀ngi ye taa mii falipyew Mowizi làlwaw kéele na, woro wee má mii làlwaw kèlē ní kajoogèle kaan lè Horebi nyanbelegi na Isirayɛli ye myɛw kéele na.
23 #
Mat 11:14; 17:10-13; Mar 9:11-13; Luk 1:17; Zyan 1:21 Wéle, mii tiimaa a kanyaajoow Elii tórigo naa yele ma, sáni Yawe cángi í nan lè, cângbɔɔgi gi lè fyáara wóʔo ní. 24Wi a ba tofɔbèle fúnyo kàriga bi tórigo be pìíbèle kàbaan na, si wɔ́ɔ pìíbèle fúnyo kàriga bi tórigo be tóobèle kàbaan na, koro ga pye mii a kɔ́ pan bi ba tári kpúmɔn ní dángaw ní í.»
Currently Selected:
Malasyii 3: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.