Mateo̱ 2
2
Ja chjine
1Belen ngande xi chja̱ nangi Judea̱ kitjukja Jesuu̱, nga Erode̱ xi Je Xta̱xá tetjún xi kjibatexumáre̱ kui na̱xi̱nanda. Kui ni̱tjin, jichú janda Jerusalen ja chjine xi chja̱ ngu na̱xi̱nanda teya jma ngatjen bitju tsuꞌbi 2ku tsinengiya: «Jmá kjitjián kjindi xi kitjukja, xi xuta xá xi batexumare̱ judio̱ ku̱ma. Kuyájni niñuꞌe̱n jan nangi jma ngatjen bitju tsuꞌbi ku kui xi kju̱a̱ꞌiꞌnikixantꞌájni.»
3Erode̱ Xtaxá tetjun xi kjibatexuma kui ni̱tjin ku ngieje xu̱ta̱ xi sindu Jerusalen tuxi ndá kitsindusinre̱ yajo̱ꞌe nga tsitꞌe kui én. 4Kui nga kitsiꞌin Erode̱ nga ꞌyetku ja chanaꞌmi xi inchatetjún kju̱ chjine xi mare̱ Kju̱a̱kixiꞌe̱ Namiña Diuu̱, ku tsinengiyáre̱:
—Jmá ngande kisꞌe nga tjukja xi jajin Namiña Diuu̱ nga ꞌBatsjengiña.
5Ku̱i̱cha kitsúre̱ kui ja:
— Jma ꞌmí Belen, nangi xi chja̱ Judea̱, nga̱tꞌa ku̱a̱cha kiski xi tsuya enꞌen Namiña Diuu̱:
6«Jí, Belen,
jí xi ꞌñu chjiꞌeiji̱
nga ngieje na̱xi̱nanda Judá.
Ngajín nangiri tjukja ngu xi basentetjún,
xi tsjuáre̱ ndiya na̱xi̱nandaꞌna Israe.»
7Erode̱ tsichja ꞌmáre̱ xu̱ta̱ xi chjine ku tsangitsjaiya kjiá kuya̱ niñu xi inchatsú kui xu̱ta̱. 8Ku ku̱i̱cha kitsúre̱: «Tangijnu Belen ku tinchitsjaiyájnu ngieje én xi tjin nga̱tꞌaꞌe kui kjindi. Nga sakujnu, tixuyájnu. Tekuácha mejénna nga faitsikixantꞌaꞌan.»
9Nga je tsitꞌére xta̱xá tetjún xi batexuma, kui ja chjine itju ku kijí ngatje̱n Belen. Tuku inchabasére̱ ngakꞌa kui niñu xi kube janda nga itju na̱xi̱nanda teya jma chja̱. Nga jichú tuxi kꞌi̱a̱ kisasen kui niñu, nga̱sún niꞌya jma kjiꞌi kjindi. 10¡Tuxi tsjuá kumáre kui ja chjine nga kube kui niñu!
11Nga tsasꞌén nganiꞌya, kube kjindi kju̱ Maria̱ xi na mare̱ ku inchá tkuꞌe nga kitsikixantꞌa. Skexꞌa kaxa xi tjimajún ku tu̱kitsjuáre kjindi ton sine, tjiungu ku mirra̱.
12Kui nga ngajín chini kitsuyáre̱ Namiña Diuu̱ kui ja chjine̱, nga ngite̱ ngatꞌáiji ndabaxáꞌe Erode̱. Kui nga kitsiꞌin kui xu̱ta̱ nga kjaꞌi ndiya kitsichjén nga kijí na̱xi̱nanda teyaꞌe.
Tsanga xu̱ta̱ꞌe Jesuu̱ xi ngu niꞌya ku Ejipto̱ kijí
13Nga je kijíni na̱xi̱nandaꞌe ja chjine, ngu xi tsixatꞌare Namiña Diuu̱ jiꞌitꞌáre Kuse ngaya chiniꞌe̱n ku ku̱i̱cha kitsúre̱: «Tisitjéin. Tꞌaji̱n Ejipto̱ kjindi kju̱ naꞌe̱n, ku kꞌi̱a̱ tijni janda nga xiyára, nga̱tꞌa Erode̱ kjimangitsjái kjindi nga mejénre tsikꞌién.»
14Tekuíni ni̱tje̱n kiju̱ Kuse kjindi kju̱ Maria̱, 15kꞌi̱a̱ kisꞌendu janda nga kꞌien Erode̱. Ku̱a̱cha kumá nga itjusún én xi kitsúre̱ Namiña Diuu̱ xu̱ta̱ xi tsuya enꞌen: «Ejipto̱ tsichjána kjindiꞌna.»
Erode̱ mejénre kitsikꞌien Jesuu̱
16Nga kube Erode̱ nga tsꞌanacha̱ju ja chjine, tuxi ndá kitsiti ku kitsiꞌin manda nga nikjesún ngieje ni̱skindi xi ngindeꞌe̱ nga jó nu tjínre xi sindu na̱xi̱nanda Belen kju̱ ngieje ngandaiꞌe̱. 17Ku̱a̱cha kumá nga itjusún én xi kitsjuáre Jeremia xi tsuya Enꞌen Namiña Diuu̱:
18«Tsitꞌere xu̱ta̱ xi chja̱ Rama
xi inchakjindá nga on inchamáre̱.
Rake̱ xi ku̱a̱cha tjikjindá
nga̱tꞌa kinikjesúnre̱ kjindiꞌe,
ku mejínre nga nikꞌexú.»
Nga jindibáni Kuse jma ꞌmí Nasare
19Kꞌen Erode̱ nga tuku Ejipto̱ kjitjián Kuse. Kui nga ngu xi tjitsixatꞌare Namiña Diuu̱ jiꞌitꞌáre Kuse ngajin chiniꞌe̱n 20ku ku̱i̱cha kitsúre̱: «Kjatꞌa̱ma tuxi tꞌáinni Israe, tjiujún kjindi kju̱ naꞌen, nga̱tꞌa je jesún xi mejénre nga kitsikꞌien.»
21Kuse ku Maria̱ kju̱ kjindi jindibáni Israe. 22Ta̱nga kitsakjún Kuse nga nangi Judea̱ kijí nga̱tꞌa kube nga Arkelao̱, tiꞌe̱ nde Erode̱, kjitjián xta̱xá tetjún tjatse xi kjibatexuma kꞌiakua. Xi tjitsixatꞌare Namiña Diuu̱ ku̱i̱cha kitsúre̱ Kuse nga janda nangi xi chja̱ Ngalilea̱ nga̱tjai.
23Nga jichú kꞌiakua, ngu ngande xi ꞌmí Nasare kikꞌendú. Ku̱a̱cha kumá nga itjusún én xi kitsuyáre̱ Namiña Diuu̱ ngieje ja xi tsuya enꞌen: «Nasareno̱ kuitsúre xu̱ta̱ xi jajin Namiña Diuu̱ nga ꞌBatsjengiña.»
Currently Selected:
Mateo̱ 2: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO