Mateo 2
2
Ma ja matsa'a ixtääpyë tku'ixëtën ja mëxu'unk Jesús
1Belén ja Jesús ojts myiny kye'exy, Judea y'itjotm. Herodes ënety jam yajkutujkp. Tääts jam Jerusalén jyajtë ja matsa'a ixtääpyë mëti'ipë tso'ontëpën xëëwpëtsëmtsyow. 2Jä'ä ojts tyajtëwtë:
¿Maa ja jutiis ja'ayëty yajkutujkpë të myiny të kye'exy? Tëës n'ixtë ja myëtsa'a xëëwpëtsëmy, paatyës nmintë yë'ëjës n'ëwtatantëp.
3Ko ja yajkutujkpë Herodes jëtu'un tmëtooy, tääts ojts tmëmay tmëtajy, näjyëtu'un mëët ni'ëmukë ja Jerusalén ja'ayëty. 4Ënet ja Herodes twoowmujktaay ja teety wintsëntëjk ets näjyëtu'un ja tsajptëkotyëtë yaj'ijxpëjkpëtëjk ets tyajtëëy, ¿maa myina'any kyä'äxa'any ja Kristë? 5Tääts y'ëtsoowëtë:
Belén, Judea y'itjotm, ijxtëm ja Dios ja kyäjpxynyajxpë y'ënantën:
6Mijts Belénkëtë kajpn, Judea y'itjotmëtë,
ka'ap mijts mnanëkookajpnëty ma tääpë naaxën,
jä'ä ko jam tu'uk ja yajkutujkpë pyëtsëma'any
mëti'ipë tyu'u wyinye'eyäämpyën yë n'Israel kajpnës.
7Ënet ja Herodes ayu'utsy tyaxëy ja matsa'a ijxpëjkpë. Tääts ojts tyajtëy tyajtëtä'äky yajxon jëna'a ënety ëka'any të t'ixtë ja matsa'a 8ets ojts t'ëwa'atsy ja në'ë'aaw tu'u'aaw ets nyëjkxtëty jam Belén ets t'ënëmaay:
Nëjkxtë ets xy'ixta'atëty ja mëxu'unk yajxon. Ko xypyaatëty, etsës ënätyë xytyuk'ëwaanëtëty ets nëjkx näjyëtu'un n'ëwtatyës.
9Ko ja Herodes jëtu'un y'ënëmaayëtë ets tsyo'ontë ets ja matsa'a wyinye'eyëtë mëti'ipë ënety të t'ixtën xëëwpëtsëmy, koonëm ja matsa'a wya'k'o'oyëy ma ja mëxu'unk Jesús ënety jam kyo'knën. 10Ko ja matsa'a ixtääpyë t'ijxtë ko ja matsa'a, janty xoontä'äky ojts nyäyjyawëtë. 11Ko tyëjkëtyë tëkoty, japts tpatë ja mëxu'unk Jesús mëët ja tyaak Maria. Tääts twinkuxtënaaytyë ets twintsë'këtë ja mëxu'unk. Ënet tyaj'ëwatstë ja y'apëjkënëty ets tmooytyë ja wyintsë'kën: ja pu'ts pujxn, poom ets ja pa'akxu'kpë nëë mëti'ipë mirra xyëëwajtypyën. 12Ko ënety të t'ëkwintsë'ëkëtë ja mëxu'unk, tääts ojts yajtuk'ëwaanëtë kuma'ayjoty ko ka'ap nän jam y'ëkwinpijnëtëty ma ja Herodes. Tääts wyimpijnëtë ma wiink tu'ujën ets nyëjkxnëtë kyajpnjotm.
Ko ja Jesús yajmëke'eky
13Tëë ënety ja matsa'a ixtääpyë tsyoontë ko ja José ojts t'ixy kuma'ayjoty ja Wintsën y'anklës ets y'ënëmaayë:
Pëtë'ëk ets nëjkx jap Egiptë mëët yë mëxu'unk ets tyaak. Jap m'itëty koonëmës nikajpxëty, jä'äkyëjxm ko ja Herodes y'ixta'ajäämpy yë mëxu'unk ets tyaj'ooka'any.
14Tääts ja José pyëti'ky koots ets ja mëxu'unk ojts tsa'anë'ëky ets tsyo'ony mëët ja Maria ets nyëjkxtë Egiptë. 15Jam ojts tsyëënëtë, koonëm ja Herodes y'o'ky. Jëtu'un tyuunë jyajtë ets y'atëwëty mëti'ipë ja Dios tyukkajpxnajxën ja kyäjpxynyajxpë: Jap Egiptë ojts nmëkäjpxyës ja n'u'unkës.
Ma ja Herodes tni'ënä'ämën ets ja mëxu'unktëjk y'ooktëty
16Ko ja Herodes tnija'awëy ko ja matsa'a ixtääpyë ënety tëë wyin'ëënyë, tääts ni'ik jyoot'anpëjky ets ojts tni'ënä'ämë ets ni'ëmukë y'ooktëty ja mëxu'unk ye'etyëjkpë jam Belén ets ma ja naax kajpnën wiinkonpë yajpaatën, tëë ënety tpamay ja xëëw po'o jëna'a ja matsa'a ixtääpyë të tnikajpxtën. 17Jëtu'un y'atëëy ja aaw ayuk mëti'ipë ja Dios ja kyäjpxynyajxpë Jeremías ojts tnikäjpxyën:
18Yajmëtoow jam Ramá ko ja ja'ay jyë'ëtë ya'axtë;
Raquel ja y'u'unk y'ëna'k nyiyäxyp,
ets ka'ap tkupëjky ets pën yajjotkujkëtëty,
jä'ä ko tëë ënety ja y'u'unk y'ëna'k y'o'kta'atë.
19Ko ja Herodes y'o'ky, ënät ja José ojts t'ijxkojnëpë kuma'ayjoty ja Wintsën ja y'anklës jam Egiptë, ets y'ënëmaayë:
20Pëtë'ëk, nëjkx jam Israel y'itjotm. Mëët yë mëxu'unk ets tyaak. Tëë y'o'knëtë ja ja'ayëty mëti'ipë ënety yaj'ookantëpën ja mëxu'unk.
21Ënet ja José pyëti'ky ets ojts nyijkxy jam Israel y'itjotm mëët ja mëxu'unk ye'etyëjk ets ja tyaak. 22Ko tnija'awëy ja José ko yë'ë ja Arquelao jam yajkutujkp Judea y'itjotm ets yë'ë ja tyeety Herodes të tkutëkë, tsë'kë ja José ets jam nyëjkxëty. Kuma'ayjoty ojts ja Dios y'anklës tyuk'ëwaanëty ets ka'ap tsyëënëty jam Judea, paaty ojts nyijkxy jam Galilea. 23Ko jam jyajtë, Nazaret ojts nyëjkxtë tsënääpyë. Jëtu'un y'atëëy mëti'ipë ënety ja Dios ja kyäjpxynyajxpëtëjk të tnikajpxtën, ko y'ënantë, ja Mesías: Nazareno yajtijëty.
Currently Selected:
Mateo 2: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.