Ukunukuo 2
2
Ukhani gwa Efeso
1“Gwa malaëka wa kanisa ra Efeso andëka vii: Uruu unë ukhani ufuma kunë mweeso nëukwatëëre njota imufungatë u mukhono wakwe wa gëlëlo, na në ugwenenda mukhatëkhatë a chengo imufungatë ya vimwëë vya sahabu. 2Nëyamanyie mantu ako oong'e, nëumanyie wikunkunyayi wako na ughimu wako. Nëmanyie mwino wendie uvahunguhëa vasaa nëvëgëhanyaa mwino atumami na ngwë tëuvuu, ugamanya mwino në vegheghe. 3Veve u mughimu, waghimëëye makhasëko mingë gusoko a rina rane, mbesa winatënaa nkümbü. 4Ëgweeso nëna ihanyo rëmwe kunë veve: veve, itungwee utënyanjëti kangë mwino afoo mwandyo. 5Uvii, kümbukwa afoo nenaa këë winagwa, uyareke mahutye ako, na utënda mwino naa ugutenda afoo mwandyo. Nene uvii, nëjie kunë veve ugeheya chengo gako fana na gëre. 6Ëgweeso ngugukuta gusoko a gëntu gëmwe: Veve uyahwëtë nëëgutendwaa na Anikolai mwino nëyahwëtë nene. 7Në wina makutwë, uvii, na ateghëëye asaa në Mwahu uguyakhanëa makanisa!”
“Vasaa nëvëuhuma nguvafa nkari ya mutë wa ufanga në wëmukhatë a bustani a Muungu.”
Ukhani gwa Simirna
8“Gwa malaëka wa kanisa ra Simurna andëka vii: ‘Uruu unë ukhani ufuma kunë mweeso në Alfa na Omega, në naa wakure na watënda mufanga kangë. 9Nëmanyie malwe ako; nëmanyienoo utuki wako, mbesa, gwa tutë veve umughwarë; nëyamanyie mantu në mavë nëvëugutëndea avoo nëvëgëtaana Ayahudi ëgweeso ti Ayahudi va tutë, ëgweeso në iburi ramwa Setani. 10Utaoghofee mbanduvë asaa nëegunoneye ukhasëka. Tëghëëya! Ibilisi ugufenja uvaghema gwa uvatendea ayaanyu vangëja ugeresa; nyeenoo muhanga makhasëko gwa itungo ra matiku ikumi. Mutënde mwahuvëi mbesa faka ikuya, nenoo ngumufa ngaa a ufanga.’ 11Në wina makutwë, uvii, atëgheeye asaaa në Mwahu uguyakhanëa makanisa! Vasaa nëvëuhuma vëtiuvaariwa na ikuya ra gavëë.”
Ukhani gwa Fergamoni
12“Gwa malaëka wa kanisa ra Fërgamoni andëka vii: Uruu unë ukhani wakwe mweeso në wina itëmeo në ryeghe mbaru yoong'e në ivëë. 13Nëmanyie fana ugikhaa: Veve ugikhaa gitumbë ra utëmi ramwa Setani! Ëgweeso këë ukwatëëre rina rane; wina khanaa uhuvëi wako kunë nene mbesa matiku ayoo Antifa musudangëi wane muhuvëi, nëwauraghiwe faafo fana Setani ugikhaa. 14Ëgweeso nëna mantu makeevu kunë veve; ayaanyu vangëja vëmuhongie Baalamu nëwamusiye Balaki uvatëgha vana va Isiraeli vële malëwa nëakumbëkiwe sanamu na utënda ulehadi. 15Viuyi viuyi, vërëfonoo mukhatë anyu antu nëvëhongie masëyo aa Nikolai. 16Uvii, rekanuka na mahutye ako. Nitë uvii, nëjie kunë vee ruvi na gihoma na antu vasaa gwa itemeo nërëufuma u moomo wane. 17Në wina makutwe, uvii, na atëgheeye asaa në Mwahu uguyakhanëa makanisa! Vasaa nëvëuhuma nguvafa mana ëyoo nëifihie. Nguvafanoo igwe rinyughuu në ryeru nërëandëkiwe rina ifya në gutie muntu nëurëmanyie ëgweeso gutufu vasaa nëvëurëghenyifa.”
Ukhani gwa Tiatira
18“Gwa malaika wa kanisa ra Tiatira andëka vii: ‘Uruu unë ukhani wa Mwana wa Muungu, në miho akwe ëgumisamisa mwino moto, nanë mëghuu akwe ëeriye mwino saba nëëhutiwe.’ 19Nëmanyie mantu ako oong'e. Nëmanyie uyanjo wako, uhuvëi wako, utumami na ughimu wako, veve ugutënda vijago itungwee ukëra afoo mwandyo. 20Ëgweeso nëna ihanyo kunë vee: Veve umughimëëye mukhema uyoo Yesebeli nëugyëtaana munyagëdaghu wa Muungu. Mweeso uguvaseya nanë uvayaghaya atumami vane vëtende ulehadi nanë ula malëwa nëakumbëkëwe u sanamu. 21Namufee itungo ra ufea mahutye akwe, ëgweeso atiufenja urekanuka na ulehadi wakwe. 22Tëgheeya! Itungwee ngumujughuta guurëë mweeso itambëëmwe na voong'e nëvatendie ulehadi inakwe vëuhangwa na makhasëko makharë. Nhaa, ngutënda vii nesa vëtinjë ufea ntendo yawe në mbë nëvayitëndie inakwe. 23Kangë, nguvauragha asëywi vakwe, uvii makanisa oong'e ëmanye mwino nene unë ngihengechaa nkhoo nanë masëgho aantu. Ngumurëfa mu muntu muuntendo yakwe. 24Ëgweeso nyee vangëja në mwë kuuko uTiatira nëmutihongie masëyo amwa Yesebeli, nanë mwinisëyaa gasëë nëvëugëtaana, ‘Gëmpihë gamwa Setani,’ ngumukhanëa mwino ntiuvafa murigho ungëja. 25Ëgweeso mukunyatee asaa në mwinayo itungwee faka fana nëjie. 26-28Nëvëuhuma, nanë vasaa nëvëukunyatëa faka mpeo utenda nëngufënja, nguvafa udaho gunto a ndughu yoong'e. Nhaa, nguvafa udaho uruurouruuro nënaughenyifië kunë Tata; unë vëuyibala ndughu yoong'e gwa mwaanga wa chüma nanë uyëunanganga mwino gëfe ga irongo. Kangë nguvafa gënkungu. 29Në wina makutwë, uvii, atëgheeye asaa në Mwahu uguyakhanëa makanisa!”
Currently Selected:
Ukunukuo 2: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.