Luka 4
4
Yesu Uguëghëëywa
(Mat 4:1-11; Mrk 1:12-13)
1Na Yesu, arë wijue Mwahu Mweru. Mweeso agasuka ufuma u Yordani, arë utongerwe na Nkhoo gwa matiku makumi ane umbugha, 2uguëghëëywa na Setani. Na ainalia intu mpa rëmwe matiku asaa. Narë ahia agaona njaa. 3Setani agamukhanëa, “Nësa veve wë, Mwana wa Muungu, rëkhanëe igwe ërëi rëfeuke mukaate.”
4Na Yesu agamusucha, “Yiandëkiwe, ‘Muntu atiuduva gwa mukaate gutufu.’ 5Na Setani agamuhora faka unto, agamuraghëa mweeso ntëmi yoong'e ya muurëmi gwa itungo rëkufei, na umwëëra mweeso, 6Nene ngugufa vee ntëmi iyii yoong'e na üküü wayo woong'e, gusoko ayai nafiwe nee na ngumufaa wasuu nënasëgha. 7Uvii nëmbesa vee winjë unkurya nene, ayai oong'e ëutendeka ako.”
8Na Yesu agamusucha, mweeso “Iandëkiwe, Veve umukurye Müküü Muungu wako, na mweeso iyenedu umutumëkëe.”
9Na agamuhoa faka uYerusalemu, na agamwëmëcha gunto a munara wa hekalu, na agamwëëra, “Në mbesa vee wë Mwana wa Muungu, ijughutë mughonjo fangë ufuma hafai; 10gusoko yiandëkiwe, ‘Mweeso uguvaraghëëya malaika vakwe vagudëme vee, na 11umëkhono ao vëugulaka fanto, utaje ugikhuiya mughuu wako gigwe.’” 12Na Yesu agamusucha, “Ihanyiwe, utamwëghëëye Müküü Muungu wako.” 13Na Setani narë wamarëya maëghëëyo, akwe oong'e, agahegha ufuma kunë mweeso urë faka ikhondo ikufei nërëjie.
Yesu Waandya Mwëmo wakwe uGalilaya
(Mat 4:12-17; Mrk 1:14-15)
14Na Yesu agasuka gwa nguu ya Mwahu Mweru uGalilaya, na sayu yakwe iganing'anëa ung'e yoong'e ya fifë. 15Na mweeso agasëya umasinagogi, agakuriwa na voong'e.
Yesu Uguhitwa uNasareti
(Mat 13:53-58; Mrk 6:1-6)
16Na Yesu agaenda uNasareti, kunë wakurëe na agaenda usinagogi itiku ra sabato mwino arë ntende akwe ërëë. Na agaëmëka asome, 17na agafewa gëtabu ga munyagëdaghu Yesaya. Agakunukua gëtabu na agaona kunë guandëkie;
18“Mwahu wa Müküü wëunto ane,
gusoko wanjirie makuta nee nëtanantye
sayu në njija gwa atuki.
Wantumie uvatanantëya itungwëërwa ra atungwa
na iforyo gwa afoku goona kangë
uvatungwëëra vasaa
nëvëonewe,
19na utanantya mwakha wa Müküü në wayanjiwe.”
20Na mweeso agagikunëka gëtabu, agamusuchëya mutumami, na agagikhaa fang'ë. Na antu voong'e narë vëusinagogi vëgamukhamëchëya miho. 21Na mweeso agaandya uvakhanëa, “Reo maandëko ayai afikëa umatwë anyu.” 22Na voong'e vëgamurighëëtya ija mweeso. Na veeso vëgataka nkhani njija narë itungëte ufuma umomo wakwe na vëgahanya, “Uyui ti mwana wamwa Yosefuna?” 23Na mweeso agavakhanëa, “Gutie ntenga ninjëumudonoera nyee wikhori urui, ‘Mughanga ifonie vee mughonjo, nëgwaategheeye nëwayatendie uKaferanaumu uyatende na hafainoo gitumbë ra khanyu.’ 24Mweeso agahanya, ‘Tutë, ngumukhanëa nyee, munyagëdaghu atiutegheywaa ung'ë a khao mughonjo.’ 25Ëgweeso tutë, nene ngumukhanëa nyee, arë varefo ahimbë vaingë ung'e a Isiraeli matiku a munyagëdaghu Elia. Ikhondo në irunde rëgautëwalii mëakha ëtatu na mëeri mutandatu. Ikhondo rasëë ëgaja njaa nküü igakunëkëa ng'e oong'e. 26Na Elia arë ainatumwa gwavangëja ëgweeso uSaraputa gutufu ungë a Sidoni, umukhema në muhimbë. 27Na arë varëfo anyamatana vaingë ung'ë a Isiraeli ikhondo ra munyagëdaghu Elisha, na gutie kunë veeso në waoyiywe, ëgweeso ëyenedu Naamani muntu wa uSiria.”
28Narë vategheeya vii, voong'e narë vëusinagogi vëgijuwa ikuo. 29Na veeso vëgaëmëka wëma na vëgamufunya mweeso unji a muji, na vëgamutoa mweeso ukenento agëtanto kunë muji wao arë ujengie, uvii veeso vadahe umujughuta mweeso fang'ë ihomeye na itwe. 30Ëgweeso mweeso agavaaghura veeso mukhatë agaenda kunë winjë.
Muntu në Ukweti Gënyonyinyonyi
(Mrk 1:21-28)
31Na mweeso agaenda faka uKaferanaumu, u muji wa uGalilaya. Na mweeso agaandya uvasëya veeso itiku ra sabato. 32Na veeso vëgataka ino masëyo akwe gusoko ukhani wakwe arë wina udaho. 33Na mukhatë a sinagogi arë urëfo muntu në arë wina gënyonyinyonyi në gëvë, na mweeso agarëa gwa ruri në üküü, 34“Hai! gweena ntuni na vee, Yesu wa uNazareti? Wajie uguragha sesena? Nëgumanyie vee wë anyu, wë Mweru Umwë wa Muungu.” 35Ëgweeso mweeso agamukenea mweeso ugumukhanëa, “Kia na mufume uyui!” Narë gënyonyinyonyi gamutagha fangë mukhatëkhatë antu gyeso gëgafuma kunë mweeso na ginamuvarya. 36Na voongë vëgataka vëgaandya ugikhanëa mu muntu na muyakwe, “Ukhani këë urui? Gwa nguu na udaho uguraghëëya gënyonyinyonyi në gëvë gëufuma unji.” 37Na sayu akwe ëganing'anëa goong'e mung'ëë asëë.
Yesu Uguvaforya Antu Vaingë
(Mat 4:18-22; Mrk 1:16-20)
38Na mweeso agaëmëka agahegha u sinagogi, na agaëngia u nyumba amwa Simioni. Na nyinya në mukhwe wamwa Simioni arë uwaire ino, na veeso vëgamuromba gusoko akwe. 39Na mweeso agaëmëka fifë kunë mweeso na agakenea urue, ugamwekea mweeso na gënyahafo agaëmëka na uvatumamëa veeso. 40Na yuva narë rauharëa, voong'e narë vakweti arue hiyahiya veeso vëgavaeta kunë mweeso na agaikëa mëkhono akwe unto a mu muntu agavaforya veeso. 41Na vinyonyinyonyi vinginoo, vëgavafuma vëurëa, “Veve wë Mwana wa Muungu!” Ëgweeso mweeso agavakenea veeso, na ainavayanjëya veeso urighëëtya gusoko arë vamanyie mwino mweeso Kiristo.
Yesu Ugutanantya uSinagogi
(Mrk 1:35-39)
42Narë arë waacha diu mweeso agauka agaenda ugëmpihë. Na antu vëgamufenja na vëgafika kunë mweeso, vëgafenja umughiya ateheghe kunë veeso. 43Ëgweeso agavakhanëa, “Inoneye nëtanantye sayu në njija a utëmi wa Muungu u miji ëngëjanoo. Gusoko natumiwe soko asëë.” 44Na mweeso arë ugutanantya umasinagogi a uYuda.
Currently Selected:
Luka 4: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.