Luka 19
19
Yesu nane Sakayo
1Mweeso againgëa u Yeriko naarë ukëëre mukhatëkhatë ayo. 2Na arë urëfo muntu umwedu rina rakwe Sakayo, arë müküü wa anyaukhua kooti, na arë mughwarë. 3Na arë ugufenja umona Yesu mweeso muntu në wëurë ëgweeso ainadaha, gusoko a wingë wa antu, gusoko mweeso arë mukufëi wa chimo. 4Na vii agatongea udurye usonge aganatëa unto a mukuyu gusoko adahe umwona mweeso, gusoko arë ujie ukëëra njëa asëë.
5Na Yesu naarë wafika hafo, agaraava unto, na agamukhanëa “Sakayo, sima urë fang'ë, gusoko inoneye nikhae ukhako reo.” 6Na vii mweeso agasima urë fang'ë, na agamughenyifa gwa uyanjo. 7Naarë veeso vaona uyii voong'e vëgaandya ng'unyung'unyu, vëuhanya, “Mweeso wenda unyumba a muntu në munya mahutye.” 8Na Sakayo agaëmëka usonge na agamukhanëa Müküü, “Tegheeya Müküü, wato wa mari ane nguvafa atuki, nëmbesa namuheeye muntu gëntu, gwa uhughangu gumusuchëya mëhënjo ëne.” 9Na Yesu agamukhanëa, “Reo utyoi wafika unyumba ëyëë, gusoko mweesono në mwana wamwa Ibrahimu. 10Gusoko Mwamuntu wajie ufenja na utyoa gasëkë nëgayaghae.”
Wikhori wa Siingi
(Mat 25:14-30)
11Naarë antu vategheeya mantu ayai mweeso, agafwaghëëra uvakhanëa wikhori, gusoko arë wahumbëa uYerusalemu, na gusoko arë vaghemaa itungo tirërëfu utëmi wa Muungu ugighea gifando. 12Na agavakhanëa vii, “Mwana wa mutëmi umwedu mutakii agaenda ung'ë akure ende ufenja utemi na usuka. 13Agavaëtana ikumi, mung'ë a atumami vakwe agamufa muntu hela igëtunga agavakhanëa: ‘Suujëi ëyëë faka kunë ngusukëa.’ 14Ëgweeso anyakhao arë vamuhuëte na vëgatuma antu vende kunë mweeso uhanya, ‘Gutiufenja muntu uyi atendeke mutëmi witu.’” 15Naarë wasuka, na wahangaa utëmi, agaraghëëya atumami vasaa naarë waafiie hela vaëtanwe vaje kunë mweeso gusoko adahe umanya mu muntu wa hangie sao kë. 16Mutumami wa mwandyo agaja usonge akwe, agahanya, “Müküü, hela yako yafafa ingëja ikumi iongeya.” 17Na mweeso agamukhanëa, “Watenda ija, mutumami në muja! Gusoko watendeka wina mwighuuyo uintu nërënyui ngugutenda webale u miji kumi.” 18Na wagavëë agaja, agahanya, “Müküü, hela yako yafafa ingëja itano. 19Na agamukhanëa, ‘Na veve webale miji ëtano.’ 20Na muuya agaja, agahanya, ‘Müküü, iyii hela yako, naikundëkie ija kifembu ra isaa, 21gusoko nene naguoghofie vee gusoko veve umuntu mukaku. Veve uguhoa na kunë winaëka fang'ë, na utënanga kunë wina fandëa.’ 22Mweeso agamukhanëa, ‘Nene nguguramua vee gwa nkhani ya momo wako mughonjo, veve umutumami në muvë! Arë umanyie mwino nene në muntu në mukharë, nguheyaa kunë ntinaëka fangë na utënanga kunë ntinafandëa? 23Asikë vee, winaëka hela yane giduka ra hela në nene naja nëje uihoa itambëëmwedu na sao?’ 24Na agavakhanëa vasaa naarë vaimëkie fifë, ‘Muheyi hela yasii na mumufe wasuu në ukweti siingi ikumi.’ 25(Na veeso vëgamukhanëa, ‘Müküü wasuu ukweti sao a mafunju ikumi). 26Nene ngumukhanëa nyenye, mu muntu në ukweti gëntu ugufewa ëgweeso wasuu në atikweti gëntu uguheeywa na gasëkë në ugëkweti. 27Ëgweeso arughu vane avai nëvatiufenja nene netendeke mutëmi wao vaeti hafai na muvauraghe usonge ane.’”
Yesu Waëngëa uYerusalemu gwa Werërësyo
(Mat 21:1-11; Mrk 11:1-11; Yoh 12:12-19)
28Naarë warighëëtya ayai, agatongea usonge, ao winjë uYerusalemu. 29Naarë wahumbea ufika uBetifage na uBetania, u Gëtanto nëgëutanwaa ga uMiseituni#19:29 Gëtanto ga Miseituni: Në ëkëko nëgëhanyiywe kunë Luk 19:37., agavatuma asëywi vakwe vavëë, 30agavakhanëa, “Endi ugijiji nëkiiusonge anyu, nëmwaingëa mwinji umuhanga mwandoghwe utungie, na akëë ainarairwa na muntu, mutungwëëri mumuete hafai. 31Nëmpa muntu amuuweeye nyee, ‘Asikë nëmumutungwëëra?’ Muhanye vii, ‘Müküü umusëgheete mweeso.’ 32Na vasaa naarë vatumwa vëgaenda uhanga mwino chu arë wakhanëa. 33Naarë vëumutungwëëra mwandoghwe, aghonjo vëgavakhanëa, ‘Asikë nëmumutungwëëra mwandoghwe?’ 34Na vëgasucha, ‘Müküü umusëghëëte.’ 35Na vëgamutoa mwandoghwe kunë Yesu, na vëgaara masaa ao umughongo wa mwandoghwe, vëgamunatëya Yesu. 36Na mweeso naarë unguenenda winjë, antu vegaara masaa ao ubabaa. 37Naarë wafika fifë na uning'ino a Gëtanto ga Miseituni, iburi roong'e ra asëywi vakwe rëgaandya ugirisisya na umukurya Muungu gwa ruri aküü, gusoko a ntendo nküü në vayuune, 38vëuhanya, ‘Aforiwe mutëmi në ujie urina ra Müküü, majëghana girunde, na üküü unto!’ 39Na Afarisayo vëkëtunga naarë vëmukhatë a iburi rasëë ra antu vëgamukhanëa mweeso, ‘Musëyi vakiye asëywi vako.’ 40Mweeso agavasucha, ‘Nene ngumukhanëa nyenye, nëmbesa avai vakie, magwe ëukurya mukindo.’”
Yesu Uguurëëra Muji wa uYerusalemu
41Naarë wahumbea fifë na uwuona muji agaurëra, 42uguhanya “Eseja bahu vee rëo umanyie mantu në ueta majëghana! Ëgweeso itungwee afihiwe umiho ako. 43Gusoko matiku ajie kunë vee, në arughu vako vajie ugukitëya ikita ugufimëya vee, na ugumankëa ufuma ng'andë yoongë, 44na vëugukhuëya fang'ë du, veve na ana vako mukhatë ako na vatiugurekea igwe nërëmëkie unto aigwe rëuya. Gusoko wina manya ikhondo naarë Muungu wajie ugutyoa.”
Yesu Uguingëa Uhekalu
(Mat 21:12-17; Mrk 11:15-17; Yoh 2:12-17)
45Na mweeso agaëngia uhekalu na agaandya uvajuncha unji vasaa naarë vëughurya, 46agavakhanëa “Ëandëkiwe, ‘Nyumba ane ëutendeka nyumba a marombi,’ ëgweeso nyenye mwamëtenda ë mpaanga aahëmbi.” 47Arë ugusëyaa mwiitiku uhekalu. Akumbëki në aküü na asëyi vaseria na atongeri va antu vëgafenja umuuragha mweeso. 48Ëgweeso veeso vënahanga intu në vadahëte uritenda gusoko antu voongë arë vategheeye nkhani yakwe.
Currently Selected:
Luka 19: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.