Yuda 1
1
1Yuda, në mutumami wamwa Yesu Kiristo, na muuna (në munyughu) wamwa Yakobo. Kunë avoo nëvaëtaniwe ayanjwi va MuunguTata na vaghojiwe gusoko amwa Yesu Kiristo: 2Gëhe, majëghana nanë uyanjo ëtendeke kunë nyee gwa wingë.
Asëyi va Weegheeghe
3Ayanjwi, nene arë nina nkumbu umwandëkëa nyenye asaa nëëghokee utyoi në sese guukhuvëe. Nene nëgaona inoneye umwandëkëa umususutëya nyenye mwikunkunyaye gusoko a uhuvëi në Muungu waufunyiye itambëëmwe gusoko a antu nëveru. 4Gusoko antu vëgëtunga vendie gingëa mukhatë itu gwa gëmpihe, ufuma khae Muungu waaraghwëye mwino vënoneye ukuuriwa. Antu avaa vëfeura mboto a Muungu gusoko a utenda ntendo ya ulehadi na umukhana Yesu Kiristo unë mweeso imwenë Mwibali në müküü na Müküü witu.
Mwino Muungu Uguvatendea Antu Nëvëumuhitaa Muungu
5Itungwee nene ngufenja umukumbukëya nyenye, mbesa nyenye khae arë mumanyie vija mwino mweeso në agavatyoa antu ufuma ung'ë a uMisri, itungo rëmwedu agavaruvanga vasaa në vinahuvëa. 6Na vamalaëka në vëgadëa ukwatëëra lii iyoma rawe ra wibali ëgweeso veeso vëgareka mikhao ao girunde. Mweeso agavatunga gwa mënyororo a khae na khae na uvaghumëa fang'ë kunë gwina kiti gëkuu na uduva kuuko faka iramwuwa ra itiku në ikuu. 7Mwino Sodoma na Gomora nanë miji nënaa ëfifë në vëgatenda uvaya na gingëa mung'ë a ulehadi nëti wa ntundo. Miji ësëë atendekie nyinkhori gwa ukërëywa u nkurëo a moto wa khae na khae.
Antu Nëvëtiumukuryaa Muungu Vëgikhwanëywa na Ntende ya Antu Vëgëtunga va Iraghano ra khae
8Mbesa uvii antu avaa noo mung'ë a ndoti yawe vëgakhomba mëërë awe gwa ulehadi, vëumuhita Muungu nëwibalëte, na umëtuka ntundo në njeru në a girunde. 9Ëgweeso itungo në Mikaeli malaëka në müküü vëgihoma gwa nkhani itambëëmwe na ibilisi, na gikunguma itambëëmwe vinakwe asaa nëëghokee mwëërë wamwa Musa, mweeso inahoraa udaho woong'e umutanantëya iramwuwa gunto akwe, ëgweeso agahanya, “Müküü agukenee vee.” 10Ëgweeso antu avoo vëutukaa gëntu gëkaku në veeso vëtigëmanyie. Na gwa mantu asaa në veeso vëyamanyie gwa njëa a silika#1:10 Silika: Ntendo në maimuwana mba antu vatundëywe nayo. mwino maimwana a gihaka ëgutendaa, Muungu winjë uvaruvanga veeso. 11Hëhë awe! Gusoko veeso vëgwenenda gunto a njëa amwa Kaini. Veeso vëgatenda uvii gwa ilengo ra uhanga hela ihutye në Balaamu warëtendie. Muungu winjë uvaruvanga veeso mwino agamuruvanga Kora narë ainamukuryaa Muungu. 12Avaa nëmahada nëëikhwe mu sigunkuu yanyu ya uyanjo, mwino veeso vëunywaa mung'ë a ukhuvëi wanyu na vëtina mënyaa. Veeso vëgikeree aghonjo. Veeso vikhwete na marunde nëëtina majë, nëëufembwa gunto na mpefo. Vikhwete na mëtë a muchwë nëëtina nkhari. Veeso vëjie ukurwa në mëryë na vëukuya rukuu. 13Veeso vikhwete na mafefe a majë a girambo, vëufunya ifombou ufuma na ntendo yawe në mbë nëti ya mënyaa. Vikhwete na njota nëyiufimaa na yarekie wikhao wawe. Gusoko ësëë Muungu waning'anëye kiti ga gëjota ga gwarungu va makhaa, khae na khae.
14Në antu avaa noo në Enoki, wa ufafo wa mufungatë ufuma kunë Adamu waadaghwëye, uguhanya, “Rarava, Müküü wajie itambëëmwe na maghana jëka a vamalaëka në veru, 15gusoko atende uramwui gwa antu voong'e na uvarëfya voong'e nëvëtiumufaa Muungu iküryo. Gusoko a mëëmo awe oong'e a uyaghao nëvamëtendie gwa udëa umukurya Muungu na gusoko a nkhani yoong'e në nkaku, unë anyamahutye avoo nëvëtiumufaa Muungu ikuryo wayirighëëtye kunë mweeso. 16Anyaunang'ana vëuhondaa antu vangëja, faka veeso vëutendaa mantu në ëmwunkumbu yawe. Mëomo awe ijue nkhani ya gijaghumbua, vëuvakhanëa antu nkhani nëilombe gusoko vëhangë sao.”
Makeneo nanë Maraghëëyo
17Ëgweeso nyenye ayanjwi, inoneye mükümbükwe nkhani ya uraghui wa atumami va Müküü witu Yesu Kiristo. 18Veeso vëgahanya kunë nyee, “Itungo ra umpeo, vëjie udwëëra antu nëvëjie utenda chaka na nyenye, gwa nkumbu yawe aghonjo ya uyaghao gwa udëa umukurya Muungu.” 19Në antu avaa unë vëgwetaa wibaghui, antu nëvibalëtwe na nkumbu ya mwëërë, na vëtina Mwahu Mweru. 20Ëgweeso nyenye ayanjwi, ijengi nyenye gwa nyenye gunto a uhuvëi wanyu në weruchwë ino. Rombi gwa udaho wa Mwahu Mweru. 21Ighoji mukhatë a uyanjo wa Muungu; kunu mwindëe gëhe ga Müküü witu Yesu Kiristo faka kunë mujie uhanga ufanga wa khae na khae. 22Vaonei uvavi vangëja, në vina buku. 23Antu vangëja vatyoi gwa uvahuka ufuma u moto. Antu vangëja vaonei uvavi itambëëmwe na choghofi, mbesa uhura masaa awe nëatendewe mahada a ikhwe na mwëëre.
Irombi ra Irumbi
24Itungwee kunë mweeso në wina udaho wa umughoja nyenye mweke ugwa na umweta nyenye ëse mutina mbio usonge a u uküü wakwe, ëse mutina ihutye na mwina uyanjo. 25Kunë Muungu umwedu, Mutyoi witu ukëërëa kunë Yesu Kiristo Müküü witu, ëtendeke irumbi, aküü, nguu, nanë udaho, ufuma matungo oong'e nëakëire, nanë ërëfo, nanë a khae na khae.
Currently Selected:
Yuda 1: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.