Nte 2
2
Mwahu Mweru Waasimëa Asëywi
1Naarë itiku ra Fentekoste rafika, asëywi arë vihangwëëye itambëëmwe kunë arë varë. 2Gënyafaafo antu vëgategheeya mukindo ufuma girunde; ruri narë wikhwete mwino nkungu në nküü. Na mukindo usuu ugamijuya nyumba asëë oong'e kunë arë vikhee. 3Na igadwëëra ndëmë nëyikhwete mwino moto, igatemanukanga na usima gunto awe. 4Na voong'e vëgijuywa na Mwahu Mweru, vëgaandya urighëëtya ndëghëtya hiya hiya mwino Mwahu Mweru agavaarëa.
5Na vërëfo Ayahudi, antu naa vëumukurya Muungu ufuma mu undughu fang'ë a irunde. 6Itungo nënaa vategheeya mukindo, mwirundo wa antu ugagihangwëëya. Na vëgataka go gusoko mu muntu agategheeya asëywi vëurighëëtya ndëghëtya a ndughu akwe. 7Na vëgataka ino na uhanya, “Urë avai voong'e nëgwategheeya vëurighëëtya ti Agalilayana? 8Urë nëgutegheeye mu muntu mukhatë itu gwa ndëghëëtya akwe mughonjo? 9Wapariti nanë Amedi nanë Elamiti nanë anyagikhaa uMesopotamia, uYudea nanë uKapedokia, Fonto nanë Asia. 10Firigia, Famfulia, Misiri nanë ng'andë ya uLibya në ya uKirene, na aghenyi ufuma uRumi. Ayahudi nanë avoo nëvatendekie Ayahudi. 11Akirete nanë Aarabu, guvategheeye vëurighëëtya gwa ndëghëëtya itu, ntendo nküü ya Muungu.” 12Vëgataka na ubughaa vëgiwëya veeso gwa, “Ërë ryana rayo ntunihë?” 13Vangëja vëgavakuna vëuhaya, “Veeso vëghaëte gwa divai në mpya.”
Matanantyo amwa Fetero
14Ëgweeso Fetero agimëka itambëëmwe na avoo ikumi na umwe, agaandya uvatanantëya antu gwa ruri në uküü agavakhanëa, “Aghosya va uYudea na nyee nëmugikhaa uYerusalemu, reki ërëë rëmanyëke kunë nyenye, na mutegheeye nkhani yane. 15Antu avai vatighaëte mwino nyenye mughema, gusoko itungwee këë diu. Saa agatatu. 16Ëgweeso ërëë unë agarërighëëtya munyagëdaghu Yoeli.
17‘Matiku a umpeo gutendeka, Muungu uguhanya,
nguvahunwëra antu voong'e Mwahu wane.
Abalanda vanyu nanë ancha vanyu vëjie
uyahanya mantu a Muungu nëëjëdwëëra usonge.
Aghaëmanga vanyu vëjie goona mantu a usonge ukëërëa ndoti,
nanë anyampaa vanyu vëjie gootea ndoti.
18Nhaa, mbesa atumami vane va gëghosya na va gëkhema,
matiku asaa nëjie uvahunwëra Mwahu wane,
vëjie uhanya sayu a Muungu.
19Nëjie utenda makura gunto girunde na ndolyo
fang'ë mu urëmi,
saghami, nanë moto, na muruke wa yuki
20yuva rëjie giroriwa, na mweri ugutendeka
ukhoku gënya saghami, nëkëë rinadwëëra
itiku ra Müküü.
21Na ëgutendeka, muntu woong'e
nëugurëtaana rina ra Müküü ujie utyowa.’
22“Antu va Isiraeli, tegheeyi nkhani iyii. Yesu wa uNasareti, muntu në Muungu wendie umuraghëëra daaji kunë nyenye gwa makura nanë utako nanë ndolyo, unë wendie utenda mwëëmo ukëërëa kunë mweeso. Mwino nyenye aghonjo mumanyie. 23Yesu uyuu agafunyiwa gwa uhonga mufango wa Muungu në wë daaji na nënaa umanyëkie ufuma mwandyo, antu vëgamukhoma u mutë na umuuragha gwa mëkhono a antu në avë. 24Ëgweeso Muungu agamufëtya ufuma gwakuyi agamurekea mu nguu ya ikuya, gusoko arë ëtiudahëka ikuya rëmutunge mweeso. 25Gusoko Daudi wahanyiye vii kunë mweeso,
‘Namuune Müküü usonge ane matiku oong'e
gusoko wë gu uvaru wane wa gëlëlo
mbesa ntiuhingihuka;
26uvii nkhoo ane ëgayanja na urëmë ugaririsya;
gunto a asaa mwëërë wane ugikhaa mung'ë a maghonjë.
27Gusoko veve utëumëreka nkhoo ane gwarungu va makhaa,
mbesa utiumuyanjëya Mweru wako aghore
u mbëlëlo.
28Veve wandaghëëre nene njia ya ufanga;
veve wantendie nene nijue uyanjo chaki
gusoko veve urëfo.’
29“Aruna ane, nene ngudaha uhanya gwa udaho nëëmughokee kükü witu Daudi në wakure na waëkiwe, na mbëlëlo akwe ëitambëëmwe nasee faka reo. 30Uvii gwa utendeka munyagëdaghu, na gwa umanya mwino Muungu wadahie girafëa gwa irafëyo kunë mweeso mwino naa ugudaha uvëka umwedu wa ufafo wakwe ahore ikhondo mu utemi wakwe. 31Mweeso agaona usonge na agahanya nëëghokee ufëtyo wamwa Kiristo, në ainarekwa gwarungu va makaa, mbesa mwëërë wakwe winaghoraa.
32“Yesu uyuu Muungu wamufëtiye ufuma gwakuyi, na gwa rasëë sese soong'e gwë vamasudanga. 33Uvii gwa unantëywa na gikheechwa u mukhono wa gëlëlo wa Muungu, na gwa ughenyifa ufuma kunë Tata iraghano ra Mwahu Mweru, mweeso wadahie uhunua ëkëë unë nyenye mugikengee na ugëtegheeya. 34Gusoko Daudi ainanatëa girunde; ëgweeso mweeso mughonjo uguhanya,
‘Müküü wahanyiye kunë Müküü wane,
Ikhaa u mukhono wane wa gëlëlo,
35faka nëvatende arughu vako mpalaahatu umëghuu ako.’
36“Uvii antu voong'e va Isiraeli mumanye gwa tutë mwino Muungu wamutendie mweeso Müküü na Kiristo, Yesu uyuu në nyenye mwamukhomie.”
37Itungo nënaa antu vategheeya uyi, vëgarighwa nkhoo yao, na vëgahanya kunë Fetero nanë atumami nëvësaghie, “Aruna vitu gutende urë?” 38Na Fetero agavasucha, “Fei, na mu muntu abadiswe gwa rina ramwa Yesu Kiristo, gusoko a irekewa ra mahutye anyu; na nyenye mughenyifa gëfewa ga Mwahu Mweru. 39Gusoko iraghano në kunë nyenye na kunë vana vanyu na gu voong'e në vë kurengë na mu muntu në Müküü Muungu uguvaetana kunë Mweeso.” 40Na agasudangëa gwa nkhani ingëja nyingë mweeso agavakhonkomeka veeso uguhanya, “Ityoi nyenye aghonjo ufuma na ufafo urui në uvë.” 41Uvii avoo në vaghenyifie ukhani nënaa Fetero wauhanyiye vëgabadiswa. Ahuvëi fifë a maghana atatu a njou vëgagiongeeya giburi rao. 42Na vëgagifunya veeso aghonjo u masëyo na ukhuvëi wa atumami, na uegha mukaatë na uromba.
Uduvi Mukhatë Ahuvëi
43Na choghofi gëgaja gunto a mu muntu utako nanë ndolyo igatendeka gwa njëa a atumami. 44Na voong'e naarë vahuvëe arë vëitambëëmwe, na mantu oong'e arë vëkhuvëe itambëëmwe. 45Vëgaghurya mantu nënaa vëyakwete nanë maari yao, na vëgagiaghania oong'e mwino muntu arë ugufenja. 46Na itiku gwa itiku naavëgwendaa uhekalu itambëëmwe na uegha mukaate mu nyumba yao. Veeso vëgala malëwa gwa uyanjo na nkhoo aginyumpya. 47Naavëumukuryaa Muungu na antu voong'e vëgayanja. Na itiku gwa itiku Müküü agaongeeya mwiburi rawe vasaa unë naa vëutyowa.
Currently Selected:
Nte 2: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.