1 Yohana 2
2
Yesu Mwarëëyi Witu
1Anaane, ngumwandëkëa ërëë kunë nyenye gusoko nyenye mweke utenda mahutye. Ëgweeso nësa muntu gëkaku watenda ihutye, sese gukweti murombei kunë tata Yesu Kiristo, në wa tutë; 2na ukëërëa kunë mweeso Muungu ugugurekea mahutye itu, na ti gusoko a mahutye itu gutufu ëgweeso noo gusoko a mahutye a antu voong'e va mu urëmi.
3Në itungo ërëë gutufu në sese gwinjë gutenda në Muungu uguguraghëëya uvii sese gudaha uraghëëra mwino sese gumumanyie mweeso. 4Mweeso në uguhanya, “Nene nëmumanyie mweeso” ëgweeso atiutenda në mweeso uguraghëëya në mwegheeghe, na tutë ëtifo mukhatë akwe. 5Ëgweeso muntu woong'e nëukwatëëre ukhani wakwe, tutë Muungu ugumuyanja mweeso gwa uyanjo nëukhondekie. Gwa ërëë sese guraghëëra tutë mwino gwë mukhatë akwe. 6Mweeso unë uguhanyaa uduvie mukhatë akwe unoneye utenda viuyi viuyi mwino mweeso watendie.
Iraghëëyo në Ifya
7Ayanjwi, iraghëëyo në nene ngumwandëkëa nyenye ti ifya, ëgweeso në iraghëëyo ërëëro nënaa nyenye murëkweti ufuma mwanadyo. Në iraghëëyo ërëëro në nyenye mwarëtegheeye ufuma mwandyo. 8Mbesa uvii në nene ngumwandëkëa nyenye ëdahëtë ughemwa mwino iraghëëyo në ifya. Mweeso warëraghëëre utendeka tutë na nyenye mwarëraghëëra utendeka tutë, gusoko itungo ra kitë raja ufikëa u mpeo na weru wa tutë wadaha gwerya.
9Mweeso unë uguhanyaa uduvie mu weru na kunu umuhwëte muuya këë wë mu kiti ëkëëko nënaa ga mwandyo. 10Mweeso unë umuyanjëte muuya uduvie mu weru na gutie intu mukhatë akwe nërëumusacha mweeso akhankukwe. 11Ëgweeso mweeso unë umuhwëte muuya uduvie mu kitë na ugutendaa mantu a kitë, na mweeso atimanyie intu në mweeso unoneye urëtenda, miho akwe ëtiudaha goona gusoko a kitë.
12Nene ngumwandëkëa nyenye ang'ënya në anyui, gusoko mahutye anyu arekewe gusoko a rasëë në Yesu warëtendie. 13Nene ngumwandëkëa nyenye, anyampaa, gusoko nyenye mumumanyie mweeso unë arë urëfo ufuma mwandyo. Nene ngumwandëkëa nyenye, abalanda, gusoko nyenye mwina nguu nanguu ukëa murughu uyoo. Nene ngumwandëkëa nyenye, ang'ënya në anyui, gusoko mumumanyie Tata.
14Nene ngumwandëkëa nyenye, anyampaa, gusoko nyenye mumumanyie mweeso arë urëfo ufuma mwandyo. Nene ngumwandëkëa nyenye, abalanda, gusoko ukhani wa Muungu ugikhaa mukhatë anyu, na nyenye mwina nguu nanguu ukëra murughu uyoo. 15Mutawuyanjee urëmi nanguu mba mantu ayo ukëra uyanja mantu a Muungu. Nësa muntu gëkaku wawuyanja urëmi, mweeso atiudaha umuyanja Muungu. 16Gusoko mantu oong'e nëërëfo mu urëmi, nkumbu ya mwëërë, nkumbu ya miho, nanë gëdida ga ufanga gëtifumie kunë tata, ëgweeso ifumie mu urëmi.
17Urëmi ugukëra itambëëmwe na nkumbu yayo; ëgweeso unë ugutendaa mafenji a Muungu uguduvaa khae na khae.
Murughu wamwa Kiristo
18Anaane, ërëë në itungo ra mpeo; na mwino nyenye mwategheeye mwino murughu wamwa Kiristo ugwenda ujie, uvii itungwee arughu vamwa Kiristo vingë vadwëëra. Gwa uvii sese gumanyie mwino ërëë në itungo ra mpeo. 19Antu avaa vafumie gunji a iburi ritu, gusoko veeso arë ti va guuvaru witu. Gusoko nësa veeso arë va giburi ritu, arë vëufwaghëëra utenda vëitambëëmwe nasee. Ëgweeso veeso vendie gunji a iburi ritu, gusoko ëdahe uraghëëra daaji mwino veeso arë ti va giburi ritu. 20Ëgweeso Mwahu Mweeru wamuvirëe makuta nyenye, na nyee nyoong'e mumanyie. 21Nene namwandëkëe nyenye, ti gusoko mutimanyie tutë, ëgweeso nyenye mumëmanyie na mumanyie mwino wegheeghe utigwendaa nkhanja ëmwe na tutë. 22Anyu në mwegheeghe ëgweeso në wasuu në gukhana mwino Yesu unë Kiristo? Wasuu në ugumukhana Tata nanë Mwana në mufëngi wamwa Kiristo. 23Gutie muntu mba umwe nëugumukhana Mwana nëugutenda wina ukhuvëi vina Tata. Wasuu unë ugumukumwua Mwana wina ukhuvëi vina Tata noo. 24Mwino kunë nyenye, rasëë nëmwarëtegheeye ufuma mwandyo, rëgikhaa mukhatë anyu. Nësa rasëë në nyenye mwarëtegheeye ufuma uvii nyenye noo mwinjë uduva mukhatë a Mwana nanë mukhatë amwa Tata. 25Na ërëë unë mweeso waraghanie, mwino sese ginjë uduva khae na khae.
26Nene namwandëkëe nyenye nëëvaghokee vasaa unë vëudaha umukhonga nyenye. 27Mwino kunë nyenye wijuo unë nyenye mwawughenyifie ufuma kunë mweeso ugikhaa mukhatë anyu, na nyenye mutinjë ufenja muntu mba umwe amusëye. Wijuo wakwe në tutë, na gutie wegheeghe mbanduvë, na ugumusëyaa nyenye mantu oong'e. Mwino mawsëiywe uyi, ikhai mukhatë akwe.
28Na itungwee, nyenye anaane në anyui, duvi mukhatë akwe, gusoko itungo në mweeso wenda udwëëra sese gudahe ukhomya nkhoo na gweke unyweheera gwa mënyaa itungo nëhikwë mweeso waja. 29Nësa nyenye mumanyie mwino mweeso në wa tutë, nyenye mutiuhanga wisaghasaghei mwino mu muntu unë ugutendaa tutë ufafiwe na mweeso.
Currently Selected:
1 Yohana 2: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.