1 Akorinto 16
16
Dahwa gusoko a Akiristo
1Nene ngufenja uhanya nëëghokee ifunya ra ng'angu gusoko a antu në vëru në vë Guyahudi mwino nene naraghëëye makanisa a uGalatia uvii nyenye noo mufenjiwa mutënde uyui. 2Itiku ra mwandyo ra Ijuma, mu muntu nëahute gëntu, mwino mweeso uguhanga hela, gusoko ng'angu ëtiufenjiwa ëtëndeke në nene naja. 3Na në nene nafika kuuko, nene nëjie uvatuma avoo unë nyenye mwahuvëe gwa keeti uhora vifewa vyanyu uYerusalemu. 4Nësa inoneye nene noo ngudaha gwenda, veeso vinjë ukhuvëa na nee mung'ë a muhënjo.
Mëfango amwa Faulo
5Nene ninjë umusoya nyenye nënëfumie uMakedonia. Gusoko nëramwue ukëërëa uMakedonia. 6Na fangëja nene nëjie gikhaa itambëëmwe ginanyu mbesa gikhaa ginaanyu gënyinga ga mpefo, gusoko nyenye mudahe unjarëya nene ufwaghëëra na muhënjo, itungo roong'e nënaufenja gwenda. 7Nene ntiufenja nëmusoye nyenye matiku a fifë na uja gikhaa itambëëmwe ginaanyu itungo ikufë. Nene nëhuvëëre nëjie gikhaa itambëëmwe ginaanyu gwa itungo irëfu, nesa Müküü wayanja. 8Ëgweeso nene ninjë gikhaa Efeso faka sigunkuu a Fentekoste ëkërë, 9gusoko gënyamwango gëruguwe gusoko ane gwa utënda mwëmo nëunoneye na mbesa gwina antu vingë nëvëumpënga.
10Në Timoteo waja, oni mwino mweeso atiuhanga intu raghoghofa itungo në wë itambëëmwe nanyee. Gusoko mweeso ugutëndaa mwëëmo wa Müküü, mwino nene ngutëndaa. 11Muntu woong'e atamuhorye mweeso. Nyenye inoneye mumwarëëye ufwaghëëra na muhënjo wakwe gwa majëghana, gusoko mweeso adahe usuka ruvë kunë nene. Gusoko nene itambëëmwe na aruna ane gumwindëe mweeso.
12Mwino gusoko a muna witu Afolo, nene namunenie gwa nguu aje umusoya nyenye itambëëmwe na aruna vangëja, ëgweeso ti mafenji a Muungu mweeso uja itungwee. Mweeso ujie nëwahanga iyoma.
Nkhani ya uMpeo
13Irii utiku nanë mumwë, ëmëki sësë mung'ë a uhuvëi wanyu, tendi gëghosya, khomi du. 14Oong'e në nyenye muyatënda tëndi gwa uyanjo.
15Itungwee, aruna ane, nyenye mumanyie nyumba amwa Stefana arë a mwandyo utëndeka Akiristo u mukoa wa Akaya. Na veeso vëndie gifunya aghonjo gwa utumami gusoko a antu në vëru. 16Nene ngumunena nyenye muvakurye atongeeri mwino antu avaa, nanë muntu ungëja nëugitumaa mwëmo itambëëmwe na veeso. 17Nene nina uyanjo uküü gusoko Setefano, Foritunato, nanë Akaiko vajie afaa ufuma uKorinto, gusoko veeso vadahie ugufaa asaa nënaa nyenye mutiudaha utënda gusoko ane. 18Gusoko veeso vendie uryucha nkhoo ane viuyi viuyi mwino nyenye. Inoneye nyenye muvatëgheeye nanguu gwa asaa në antu avaa vëuhanya.
19Makanisa a Asia ëgumuracha. Afolo nanë Firiskila itambëëmwe nanë kanisa nëvëutang'ana unyumba awe vëumuramucha ino mung'ë a Müküü. 20Aruna voong'e vëumuramucha. Iramuchi gwa iramuchëyo ra Gëkiristo muntu na muntu muyakwe.
21Nene, Faulo, ngwandëka gwa mukhono wane mughonjo. 22Nësa muntu atina uyanjo kunë Müküü në ajumwe. Müküü witu waja. 23Mboto ya Müküü Yesu itendeke itambëëmwe na nyee. 24Uyanjo wane utënde itambëëmwe na nyee nyoong'e mung'ë amwa Kiristo Yesu, Amini.
Currently Selected:
1 Akorinto 16: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.