Galatia 6
6
Pi ne ńkaa pì’ ńkẅéte
1Mefɛ́ mefɛ́, pi lɔɔn ńkeme nyìŋ á ne fʉa nò, pi lɔg pá’ pi ne ńjú’u mbwo Zẅìge Ssé ńgÿo ngàŋ piŋe ná mánzsè gẅie aa ndʉŋ ndʉŋ. Tá ńcʉ́’ʉ légÿo ńdɔg pɔ́ mbʉ́lè. Wɔ̌wɔ́ɔ ná pi wɔ́ piŋ ḿbɔ́ɔn twó yé ḿbɔ́gɔ légwɔ́ gie à ge gwe yé tsɛ̀ɛ nkwà’te. 2Pi kaa menò mí ḿbi’ ńkẅéte. Pi lɔɔn ńgÿo pú’u, mbà pi gÿǒ mmó gie *lepʉ̌ Kristo ne ńzɛ́te. 3Nyìŋ lɔɔn ńkwaŋ ngie aa mmó, té gwɔ́ yɛ̌ mmó, mbà à sele fʉte twó mbùm yé. 4Wɔ̌wɔ́ɔ ke ńtsa’ kwà’ mé mefà’. À lɔɔn ńtsa’, ńgyá ngie ńgwɔ́ nò poŋo yé mǒ, mbà á póŋ ngie anò gwaa poŋo yé ńtí pɔ́ nue ée kwà’ mefà’ mé. Tà á le gwaa poŋo yé ńtí pɔ́ pá’ à lʉŋté mɛ̌ mefà’ ná me petsɔ́ pʉ̀a wɔ́, 5á nue wɔ̌wɔ́ɔ gẅiin léfa’ mé mefà’ mie e Ssé la cʉ́me mbwo ye. 6Á póŋ ngie nyìŋ gẅie mé ne ńzí’i yé nò Ssé à gab shúm sé ńná se nyìŋ gẅie à ne ńzí’i yé.
7Tà nyìŋ sele fʉte twó mbùm yé, mé ee ntě ńgwága Ssé wɔ́. Nyìŋ lɔɔn ḿbye kɔ́ wɔ́, mbà à ge lá’ káb pɔ́ yɛ̌. 8À lɔɔn ḿbye shúm sie é póŋ mbùm nnɛ́ ye, mbà shúm mbùm nnɛ́ ŋwɛ́ ge lá’ gÿo à kwé ḿbyé. Tá ńgwɔ́ gie à lɔɔn ḿbye shúm sie é póŋo Zẅìge Ndʉalʉ̌a, mbà Zẅìge Ndʉalʉ̌a ge lá’ gÿo à gẅiin le gwɔ́ tèmì. 9Tà pege ke ńkʉ́a legÿo nò mbòŋo, á nue pege lɔɔn gÿo nò mbòŋo ńdɔg ńgʉa pɔ́ lé mvfò, mbà fʉ̀’ ge lá’ ku’, e Ssé gÿo pege lág shúm tɛ’. 10Pú’u la, pege lɔɔn ńnyé ńgẅiin shÿó, pege gÿo nò mbòŋo mbwo pʉ̀a metsèm, ńtʉʉ lelÿò ńgÿo mbwo mefɛ́ mefɛ́ pie pega pɔ́ pǔ ńzába ntʉ́m ná Kristo.
Nzsòte nò mbɔɔ tsyɛ̀’te
11Pi gyá pá’ mɔɔn menÿɔ́g ŋwà’ne ge fáŋte fáŋte. Kwà’ mèŋ Pɔl zɔ lɔgɔ́ pwó yɔ́ɔn ńŋwe’e yɔɔn jʉ’! 12Pʉ̀a pie pɔ́ sẅɛ́ɛ gẅi sẅɛ́ ngie pi zẅíŋ mé pú’u gẅí, ée pʉ̀a pie pɔ́ fa’a pɔ́ légÿo mmó gie á ge poŋ pà Yuda. Pɔ́ gÿo pú’u, ńtsɔ́ɔn ngie pà Yuda té kʉ́e wɔ́b ngie pɔ́ tyé yɔ́b pɔ́ nà nò legwé Kristo nà tÿǒ nkǐ wɔ́. 13Pʉ̀a pie é sẅɛ́ɛ gẅi pú’u, kwà’ pɔ́b yɔ́b zɔ́ɔn fó tè kú’te *lepʉ̌ pà Yuda ntsèm wɔ́. Tá ńké ne ńkwoŋo pɔ́ ngie mé pú’u gẅi pú’. Pú’u pɔ́ lɔg pá’ pɔ́ gÿǒ tà mé pú’u gẅí, ńdɔg ńŋá’te mvfò pà Yuda, 14ńgʉa ná mèŋ, mbà mmó gie á lɔɔn ńgwɔ́ n dɔg ńŋá’te, á gwɔ́ pɔ́ pá’ Cʉ̀apʉ̀a wege Yěsô Kristo la kwé nà tÿǒ nkǐ la. Pá’à la kwé nà tÿǒ nkǐ lá, eshúm yɔɔn njÿó ée lejʉ́ŋ mèŋ ńcʉ́’ pɔ́ pfó shúm, á gʉa ná mèŋ n gwɔ́ mbwo pɔ́b, mbà mèŋ n déen ńkwé. 15Áa mbwo Ssé *lepu’ú nyìŋ, kà lényé ngàŋ té pú’ wɔ́, à tè kẅéte. Anò gie á kẅéte á gwɔ́ pá’ nyìŋ léen sele ńcʉ́’ʉ nyìŋ sẅé. 16E Ssé nyɛ ngie ntʉ́m wé ée mbòŋ, ḿbiŋ ńnéŋe sẅétè tsɛ̀ɛ ntʉ́m pʉ̀a metsèm pie ée gÿo jú’ wɔɔn ntÿɔgɔ́ we sẅé, é tÿɔ́gɔ kwò mǒ, mbɔɔ mbwo pʉ̀a Ssé tà mag.
17Tà fó lyɛ̌’ɔɔn, ḿbɔ́ɔn nyìŋ lélá’ ńgíŋe ńdɔgɔ yɔɔn nò ńgege wɔ̀ɔn. Melagá fʉ̌ŋ mie mèŋ n gẅiin é la’te ngie mèŋ n gwɔ́ pɔ́ nyìŋ Yěsô.
18Mefɛ́ mefɛ́, Cʉ̀apʉ̀a wege Yěsô Kristo ne ńgwɔ́ né pi, á tsɛ̀ɛ ntʉ́m pi. *Amen.
Currently Selected:
Galatia 6: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.