Megàŋ ntúm 28
28
Pɔl aa tsɛ̀ɛ ngwòŋ Malte
1Peg fó ncwò legwé ńkẅɛ pá’ɔɔn, mé kúu kwóŋ, éshwóŋó wég ngie lezíŋ ngwòŋ gẅie peg tyé wó ée lê Malte, é ngwòŋ gẅie ntse la kéle ńnéŋe soŋ. 2Pàlá’ ŋwɛ́, pú ńgÿo nò mbòŋo ná peg tà ńnyɛɛ máamáa mmɔ̌g, ńtóŋo wég ńgie peg tó ńzɔ́g. Á gwaa gwɔ́, mbà mbʉ̀ŋ zyé lélú, efÿɔ́g piŋ ne ńkúu. 3Mé ne ńzɔ́gɔ mmɔ̌g, Pɔl ŋwaa gígyé nkẅíŋ léma’a mmɔ̌g. Nnú gwɔ́ tsoló, ńjú’u gyě mmɔ̌g, ńdúmo pwó yé ńcʉŋe mǒ. 4Pʉ̀a lá’ ŋwɛ́ gyá pá’ nnú cʉŋé nà pwó yé, ésele ńgɔɔn tsetsɛ̀ɛ pɔ́b ngie: Nyìŋ wɔɔn ge gÿo lêkɔ́ wɔ́, é gwɔ́ fÿɛ́. À tsẅɛ̌ ntse tá’, messé gyǎ ngie pɔ́ té ge nyé yé à gwɔ́ wó wɔ́. 5Tá Pɔl siŋe pwó yé, ńnÿɔgte ndùm mmɔ̌g. Nnú sẅɛ́’, ńgwé mmɔ̌g. Ammó té Pɔl gÿo. 6Pʉ̀a pá ne ńzẅí’te ngie jʉ’e pwó Pɔl ge kwɔ́’ mbɔɔ légyá á vege vege ńgwe ńkwé, ńzye ḿbyɛ́b, ńgyá tsɔ́ mmó té Pɔl gÿo. Pɔ́ leen sele shwóŋè ńgɔɔn ngie: Àa tsɔ̌ ssé!
7Atsetsá’ ŋwâlá’ we lÿò laa ngʉ̀ŋe jʉ’ó. Mé tóŋo ngàŋ lé Pẅibilẅis. Á gyá wég, ńkúe wég pá’ meshǔ pé lá. Peg ńnéŋe mbʉ̀a yé lyɛ̌’ tá. 8Á gwaa gwɔ́ tá pà Pẅibilẅis ŋwɛ́ nuŋe ndá, ńne ńguɔ. Nnɛ́ ne ńkwɔ́’ɔ yé, ajʉ’ʉ kwɔ́’ ne ńgÿo yé. Pɔl gʉa ńgyá yé, ńzáb mbwó twó yé, ésẅíŋte Ssé, ńgÿo á zeŋe. 9Petsɔ́ megàŋa guɔ lêen ńké ńjú’, éfó meshÿó meshÿó tsɛ̀ɛ ngwòŋ ŋwɛ́, ńtó ńgyá Pɔl. Á gÿo pɔ́ zeŋe. 10Pʉ̀a jʉ’ó la pú ńgÿo mekù’ még tɛ’. Tà peg gÿo ne ńgee, pɔ́ náa wég kɔ̀ɔkɔ́ɔ wɔ́ gie a lɔɔn ńgwɔ́ á kúu nzsè legìŋ ńkẅéte wég.
Pɔl kǔ tÿǒsoŋo Roma
11Peg la tsẅé tsɛ̀ɛ ngwòŋ ŋwɛ́ mesaŋ métá, ńgÿo ńgʉa, ńkúu tsɔ́ *máamáa kanú’ gẅie mé tóŋo lé Messé mie ée mefág. Á gwɔ́ gie á la fó tÿǒsoŋo Alekzáŋdeli, ńgwɔ́ kúu jʉ’ó, á gwɔ́ fʉ̀’e fóm, á zso wó. 12Peg fó tsɛ̀ɛ ngwòŋ Malte, ńgʉa tà ńkúu ngʉ̀ŋe tÿǒsoŋ Sirakuse, ésẅɛ́’, ńnéŋe wó lyɛ̌’ sétá, 13ńgÿo fó wó, ńjʉŋte pɔ́ megʉ̀ŋe ntse tà ńkúu tÿǒsoŋo Reggio. Njÿó gÿo ńdʉ́a, atsɔ̌ fefà fó shÿó ntsíŋ ńzye lécʉ’e, ńkẅéte wég, peg lɔg lyɛ̌’ sépʉ́a, ńkúu ngʉ̀ŋe tÿǒsoŋo Puzɔles, 14ńkúu wó, ńgyá tsɔ́ mefɛ́ mefɛ́. Pɔ́ tóŋo wég ngie peg laa pɔ̌ ńnéŋe mbʉ̀a pɔ́b tà’ ngàba lá’. Wɔɔn aa pá’ peg la gÿo tá ńkúu tÿǒsoŋo *Roma. 15Á gwaa gwɔ́, mbà peg kà ne ńtóo mefɛ́ mefɛ́ pie ée tÿǒsoŋo *Roma jú’, ńkẅɛ ńtó, ńzá’a wég. Petsɔ́ zá’a wég ndùmo sɔ̌ɔn Apius, petsɔ́ zá’a wég á jʉ’ gie mé tóŋo lê Mendá méntá mie ée mé megʉ̀. Pɔl la gwɔ́ tá ńgyá mefɛ́ mefɛ́, ḿbú síe Ssé, ńgíŋe shÿɔg. 16Peg kúu tÿǒsoŋo *Roma, mé zẅíŋ ngie Pɔl pɔ́ tà’ ndÿɔ́’ ncù gẅie à ge ne pyɛ́bɛ yé gʉa ńtsẅé jʉ’ gie Pɔl kwǒŋ.
Pɔl aa tÿǒsoŋo Roma ne shwóŋó pʉ̀a nò Ssé
17Peg kúu *Roma pú’u, é tɔ́g lyɛ̌’ tá, Pɔl tóŋ mekěm pà Yuda pie é tsẅé *Roma ngie pɔ́ tóo jʉ’ gie à ńnéŋe wó. Pɔ́ tó tà ńnéŋe ssé, á gɔɔn né pɔ́b ngie: Mefɛ́ pɔ́ɔn, mèŋ n tyě pá’ɔɔn, mbà mèŋ, n daa tsɔ́ nò mbwo pàlá’ pégè fʉa, ḿbiŋ ńké tè tsɔ́ nò ná mà pàmangʉa njʉ’ pégè fʉa. Tá’, à yɔɔn, mbà mé léen ńgwoon wɔ̀ɔn tÿǒsoŋo Yerósalem, ńnéŋe wɔ̀ɔn mbwo pà *Roma lɔɔn. 18Pɔ́ ka ŋaga wɔ̀ɔn tà ne fa’a lékyɛɛ wɔ̀ɔn ńnyé, á zɔɔn ńgwaa gwɔ́, mbà pɔ́ kaa gyá tsɔ́ mmó gie mèŋ n ka gÿo tà à lɔɔn ńgwɔ́ mé cʉa mǒ ńzẅé wɔ̀ɔn mɔ́, 19tá’ pà Yuda pú tè zẅíŋ. Mèŋ n gyá kékáŋ, ngie á lɔɔn ńgwɔ́ pú’u, mbà Kása pa *Roma zɔ ge ŋag yɔɔn ntsaŋ. Tá’, n ke tě ńgɔɔn pú’u, lékúu jʉ’ɔɔn ésẅiŋe lá’a yégè wɔ́. 20Yɔɔn áa mmó gie á ně ńgÿo tá mèŋ n tsɔ́ɔn légyá gẅi pege shwóŋe. Pi zsě gí mmó gie pà Israel ée ńzɔ́gɔ ḿbyɛ́bɛ. Metsɛ̂n mɔɔn piŋ ńgwɔ́ nà mbwó mɔ́ɔn pá’ɔɔn ńtí pɔ́ yɛ̌.
21Pà Yuda jú’ tà ńtsɔ́’ɔ mbwo Pɔl ngie, peg laa zɔɔn ńkẅé tsɔ́ ŋwà’ne gie á fóo Jẅidea ńgɔɔn nò ná gù wɔ́. Atsɔ̌ fɛ́ wege ké tè tóo jʉ’ɔɔn ḿbíte tsɔ́ nò éshwóŋó wég ná gù wɔ́, tsɔ́ nyìŋ laa gɔɔn ngie ɔ̀ gÿǒ tsɔ́ nò tepòŋ wɔ́. 22Tá’ peg kě ne ńkwoŋo ngie ɔ̀ cwoŋo ńkyagte mmó gie áa lóŋ gù éshwóŋó wég. Peg gɔɔn pá’ɔɔn tá ńké ńzɔɔn ne ńzsé ngie mé ée nzɔ̌ nzɔ̌ wɔ́, éshwóŋè pɔ́ te pòŋ á nà nùɔ pàfag nnɛ́ gie ɔ́ɔ mǒ lɛ.
23Pà Yuda gɔɔn pú’u, pâ Pɔl táŋa lyɛ̌’ gie pâ pɔ̌ ge gÿo gíŋe pumte. Alyɛ́’ ŋwɛ́ gÿo ńku’, pɔ́ gíŋe ńtó, ńkẅɛ́te yé jʉ’ gie à ńnéŋe wó, ńgwaa tó sɛ̌ lekwò ḿbú ńgyɔ́ɔn tɛ’. Pɔl kyagte nò *lefùɔ Ssé éshwóŋó wɔ́b tà fó mba’á mba’ ńkúu ncwò nzém, éfa’ shÿó légÿo tà pɔ́ nyɛte ńzsé nyìŋ gẅie Yěsô aa yé, ńne ńkẅile menò tsɛ̀ɛ meŋwà’ne *lepʉ̌ Mǒsê mbɔɔ tsɛ̀ɛ meŋwà’ne pà *ntsẅì nkʉ̀ Ssé. 24Tsɔ́ pʉ̀a tsetsɛ̀ɛ pɔ́b jú’u nò gie à gɔ̌ɔn, ńzẅíŋ. Petsɔ́ pʉ̀a lʉ’ lʉ’. 25Pɔ́ cʉ́’ʉ légʉa, pɔ́ té gíŋe shwóŋó ńjú’e wɔ́. Pɔl cʉ́’ ńgɔɔn né pɔ́b pɔ́ ngie: A Zẅìge Ssé lɔ́ɔn ńgɔɔn shwóŋó nò. Á la lɔg ncwò *ntsẅì nkʉ̀ Ssé Esǎya ńgɔɔn né metá pi ngie: 26Gʉa ńgɔɔn mbwo lá’ yɛ ngie:
Mé ge gÿo gɔɔn nò, pi jú’ mboŋó, é ké le zsé mmó gie mé gɔɔn wɔ́;
é cwoŋo náŋte, é ké le gyá
27Oon, álá’ yɔɔn pú tè ne ńkwoŋo lé jú’u tsɔ́ mmó wɔ́.
Pɔ́ kéen ńziŋe metuŋó mɔ́b,
pɔ́ kéen ńtsɛ́ nÿɔ́g mɔ́b.
Pɔ́ ka tè ne ńkwoŋo lélɔg nÿɔ́g mɔ́b ńgyá jʉ’ wɔ́, ńké tè ne ńkwoŋo lélɔg metuŋó mɔ́b ńjú’ wɔ́.
Pɔ́ té kwoŋ ngie à kúu tsɛ̀ɛ ntʉ́m pɔ́b wɔ,
ńké ńgÿote pɔ́ pú’u, ńzsé ngie pɔ́ té piŋe mbwo mèŋ Ssé, n zeŋe wɔ́b gwɔ́.
28Pɔl gíŋe ńgɔɔn né pɔ́b ngie: Pi gẅiin lézsé ngie, á ké ńgwɔ́ fʉ̀’ɔɔn, mbà Ssé kéen ńtúm Nkʉ̀ mbòŋo gẅie é gÿo mé tsẅɛ́, á mbwo pʉ̀a pie é té pà Yuda wɔ́. Pɔ́ ge jú’ é zẅíŋ. [ 29Á gɔɔn pú’u, pà Yuda gwɔ́ fó jʉ’ó gʉa, ńgiŋe ńzoŋo nò ŋwɛ́ tà ńcÿɔ́gɔ cÿɔ̌g.]
30Pɔl ńnéŋe *Roma neŋé ngù’ pʉ́a. Á tsɛ̀ɛ ndá gie à la kẅé ne ḿbéen. Awɔ̌ nyìŋ wɔ́ gẅie à kwoŋó légyá yé, á tóo wó, pɔ́ yé shwóŋó. 31Á ne sá’a shwóŋó pʉ̀a mmó gie *lefùɔ Ssé ée sɛ̌, ḿbiŋ ńcwoŋo ńzí’i wɔ́b nyìŋ gẅie Cʉ̀apʉ̀a Yěsô Kristo aa yé pɔ́ shʉ̀ashʉ̌a, atsɔ̌ nyìŋ piŋ ńké tè yé tɔ’.
Currently Selected:
Megàŋ ntúm 28: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.