MATEO 2
2
Jöwaiñamo weejö’jocoomo
1Wedén ña Jesuuquidiito cönennui, Judheea nonoodö de’wono jataawä, Edoodhe yää jata cajiichaanai’chädööje yeichö. Yaawä jöwaiñamo cöneejoto shii weja’catoojo dö’senno. Jeduusadén ña cönä’döicho. 2Tönwanno cönä’döa’to:
¿Äsha nai judhíocoomo cajiichaanaichomo wennuaajä? Ñaa cöneeneaacä chu’tädö shidiichä, shii weja’catoojo dö’se yeeja’caajä. Sadä ñaa cöneejä yaawä ya’deme’que; quee cönä’döa’to.
3Yää eta’jäcä cajiichaana Edoodhe cönääcatoncai, tameedä Jeduusadén ñancomo mmaja. 4Yääje mma yaawä Edoodhe cöni’jummaicho tameedä Wanaadi wwä töwa’deuwaamo edhaajotoncomo, tameedä judhío owaanomannamo mmaja. Töwö cöneecamma’joicho:
—?Äsha Äwaanacaanei wennutoojo ecammaajä nai? quee cönä’döaacä.
5Tönwanno cönä’döa’to:
—Wedén ña yennutoojo ecammaajä na, yää Judheea nonoodö de’wono jataawä. Edäaje naadö naane’ Wanaadi wa’deuwödö ecammanei nimennä’jödö:
6Yää Wedén ñano jata, Judhá nonoodö’jödö de’wono,
she’caasa yeichaame edä nono de’wono jata antawäiñe, töquiiñeme’quemje’da na.
Yäätä nennua’de Cajiichaana,
sootoi edhaajotoncomooje töweiyemö, ñanno iisadaaediitacoomo; quee imennaajä na; quee cönä’döa’to Edoodhe sotoi.
7Yääje mma yaawä Edoodhe tacaade’da cöna’dejjaicho ñanno jöwaiñamo; cöneecamma’joicho:
—¿Ächännauwä’cä cönäänejoi ñäädä shidiichä? quee cönä’döaacä.
Yaawä ñanno yäänejo’jödö cu’nadö cöneecammaicho chäwwä, sa’donna. 8Edoodhe cönenno’jaicho yaawä Wedén ña; cönä’döaacä chäwwäiñe:
—Ojoncomo; shiichu’cä ujiichantäcä. Äwwäiñe edanta’jäcä ecammatantäcä’de yaawä öwwä, öwö mmaja wiya’deme’taiye’dede; quee cönä’döaacä Edoodhe chäwwäiñe.
9Yääje cajiichaana Edoodhe a’deddu etaadö’jo, ñanno jöwaiñamo cönääma’toicho yaawä. Ñäädä shidiichä, shii weja’catoojo dö’senno yeeja’caajä cöneenea’todö, dhowaajoiñe cöntaacä. Cöneedennai yaawä shiichu’cä ejoodhe. 10Shidiichä eneea’jäcä töwwäiñe ñanno jöwaiñamo cöna’cwainchaicho jooje. 11Maa taca cönoomomöicho yaawä. Shiichu’cä cöneenea’to, yeenö Madía enaawä. Tä’mudhe cönä’döicho yaawä shiichu’cä je’taca; cönwa’deme’ca’to. Yaawä töjaatuwaichomo a’ducaadö’jo, aashichaato cunu’jätöicho chäwwä, oodo, juu shimi’jotoojo mmaja, adhaawa täjeeto mmaja. 12Yääje mma yaawä töjaatacäiñe cönennacaicho anejja ääma tai. Tönwanno Edoodhe dö’täcä ennaca’da cöneiya’to, yääje töwäänetöödöcoomo ai ecamma’jödö weijäcä.
Ejiito ña wääneje’jä
13Yää ’jeje, jöwaiñamo wöta’comjäcä, Cajiichaana amoodedö cönäänejoi José wwä, iwäänetöödö ai; cönä’döaacä chäwwä:
—Ääma’täcä; shiichu’cä adääcä, yeenö mmaja. Ejiito ña äänejeetäcä. Iiña eichäcä’de öwwä ecammadö wa’cä. Edoodhe dajaane shiichu’cä nujiiya emaadö wetä; quee cönä’döaacä amoode José wwä.
14Yaawä José cönä’jäi. Coijai cönääma’täi, Ejiito ñadäädä. Shiichu’cä cönaadäi, yeenö mmaja. 15Iiña cönä’ja’to Edoodhe wäämadö wa’cä. Yää cöneeja’dätäi Cajiichaana a’deddu nönge yeichö wetä, yää töwa’deuwödö ecammanei wwä cöneecammajoichö: “Önnedö wa’dejjane, Ejiito ñanno yeejödö wetä”; quee.
Mudeeshi’chä töja’jo’jocoomo Edoodhe wwä
16Yaawä, ñanno jöwaiñamo wwäiñe täncu’tä’jödö towaanäcä yä’döa’jäcä, Edoodhe cönäätömai jooje. Tameedä mudeeshi’chä Wedén ñancomo töjaajodööcomo cönaanontäi yaawä, Wedén ñano jäcä amoinchemjöncomo mmaja. Dhanwaacomo’cä dea mma cömja’ja’to, yeenötoncomo enaawoncomo dea mma, aacä weduuto jona tödööene, mädä ’cäwa’cä numa yeichö ecamma’jödö weijäcä jöwaiñamo wwäiñe awa’deene töwwäiñe shidiichä ene’jödö. 17Mädääje Jeedemía nimennä’jödö nönge cönä’döi, ñäädä Wanaadi wa’deuwödö ecammanei. Edääje töwö cömmennäi:
18Waamonä cönäätaacä Adaama ña, joojato.
Wodiiñamo iisadaaediitacoomo cönaamoa’to tönnacoomo junnei.
Ä’wa’dojoo’jai’cha cönä’ja’to, yä’jajo’jocoomo weijäcä; quee Jeedemía cömmennäi.
19Yaawä Edoodhe wääma’jäcä, Cajiichaana amoodedö cönäänejoi José wwä Ejiito ña yeichö, iwäänetöödö ai. Edääje cönä’döaacä:
20—Ääma’täcä. Mä’dä mude’cä’cä adääcä, yeenö mmaja; Iisadaaede ña adhennacaatäcä. Töwä’ja’e naato eduuwa ñanno shiichu ema’sa’como’jödö; quee cönä’döaacä amoode José wwä.
21Yaawä José cönääma’täi; mude’cä’cä cönaadäi, yeenö mmaja. Iisadaaede ña cöntonto. 22Yaawä José wwä eta’jäcä yuumö nwacaanoje Aadaquedao cajiichaanaje yeichö Judheea ña, töwö tösaade cönä’jaacä, iiña töötä’se’da. Töwäänetöödö ai ecamma’jödö weijäcä Caadideea ña mma cöntämä. 23Iiña töwä’döa’jäcä Naasade ña cöneejata’täi. Yää cöneeja’dätäi Wanaadi wa’deuwödö ecammannamo wä’dö’jocoomo nönge yeichö wetä, yää: “Naasade ñanooje Äwaanacaanei nätä’täja’de;” quee yä’dö’jocoomo naichö.
Currently Selected:
MATEO 2: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos