Roman 8
8
Spirit ra raya kaia ba
1Baku bamna, nanara lika Kraist Jisas wal asla takan nani ba pât dingkaia ba âpu sa. 2Jisas Kraist ra raya kaia spiritka lâka ba mita, pri wan sakan sa saurka lâka ba prura lâka ba wina. 3Kan Moses lâka mita sip daukras pali kan ba Gâd mita daukan sa, Moses lâka ba karnika âpu kan wan wîna tara swapni ba hilp munaia; baha mita Gâd ai Luhpia pali ba blikan yawan saurakira nani na wan talia ba kat, saurka sakripaiska baku, bara baha sin wîna tara natka ba kat saurka ba pât ra dingkan. 4Witin naha na daukan Moses lâka adar wankan ba daukaia sip kabia dukiara, kan nanara yawan wan wîna tara brinka ba kat apia sa, sakuna Spirit brinka ba kat mika.
5Bamna wîna tara brinka kat baman iwi uplika nani ba, wîna tara brinka ba baman dukiara trabil taki lukisa; sakuna Spirit brinka kat iwi uplika nani ba, Spirit brinka dukiara trabil taki lukisa. 6Wîna tara brinka ba trabil taki lukaia lâka ba mita pruaia ra wan brih auya; sakuna Spirit brinka ra trabil taki lukaia ba lika, raya kaia bara âuyapah lâka ra wan brih auya. 7Bamna upla lâka kat baman luki tauki nani ba lika Gâd wal waihla takisa, kan Gâd lâka ba brin daukras bara baha ra sip bawras sa. 8Baha mita, wîna tara brinka kat baman luki uplika nani ba, Gâd kupia lâka sip daukras sa.
9Sakuna man nani lika wîna tara brinka ba daukaia lâka ra raya apia sma, kuna Spirit brinka ba daukaia mika, kan Gâd Spiritka ba man nani ra iwisa. Ani uplika Kraist Spiritka ba briras sa kaka, witin lika Kraist uplika apia sa. 10Ban sakuna, Kraist ba man nani ra raya sa kaka, wînam tara ba saurka mita pruan kabia kra, kuna spiritkam ba lika Gâd kasakkira kulkan ba mita raya kabia. 11Jisas Kraist pruan nani tila wina bukan Gâdka Spiritka ba man nani ra raya sa kaka, sim Kraist pruan wina bukan Gâdka Spiritka ba wînam tara prui kira nani ra raya kaia lâka kli yabia, Spirit man nani ra raya iwi ba mita.#2 Ko 3.16.
12Baku bamna, muihki nani, yawan diara kum daukaia brisa, sakuna upla saura brinka nani lâka ba natka ra iwaia lika apia. 13Kan man nani wînam brinka lâka kat raya kaia lukisma kaka, man nani lika pruma; sakuna wînam lâka ba Spirit mita ikbia kaka, man nani lika raya kama.
14Baha nani sut Spirit mita tapahki brih auya ba lika Gâd luhpia nani sa. 15Bamna Spirit man nani briram ba lika alba kaia spiritka apia sa kli sibri kaia; sakuna Spirit kumi Gâd luhpia wan dauki ba sika briram ba. Bara naha sim Spiritka na mita sika yawan wini ba: “¡Yang Aisiki!”#Mk 14.36; Gal 4.6. 16Bara baha Spiritka ba sika yawan wan spiritka wal asla taki aisisa yawan na Gâd luhpia nani sa. 17Bamna yawan na Gâd luhpia nani sa kaka, witin mita wankaia win dukia nani ba yawan bribia.#Gal 4.5-7. Baha dukia nani ba yawan bribia Kraist wal asla; bamna nanara yawan na Kraist wal asla pât nani wahwisa kaka, witin wal asla sin ai prana ba naika bribia.
Naika prana ba
18Bamna yang lukisna, pât nani nanara wahwi na, sip apia pali sa baha prana yawan naika kaikaia ba wal prakaia. 19Paskanka aiska Gâd daukan ba brin pali dauki ai kainara lukisa, Gâd luhpia nani ra param takaia nani ba kaikaia. 20Kan paskanka aiska ba diara bahki takan sa, bara baha ba witin nani yan baku takras, kuna Gâd mita baku kaia mangkan ba mita.#Bla St 3.17-19. Sakuna ai kainara bîla kaikaia lâka ba lika ban bâra kata, 21kan paskanka aiska ba alba kaia lâka ba wina bara sauhki tikaia lâka ba wina pri sakan kabia, baku mika witin nani sin Gâd luhpia nani pri sakan pranakira ba tilara ai dukia bri kabia. 22Baha mita yawan kaikisa, paskanka aiska, Gâd paskan ba sut naiwa kat ban latwan bri ai mamna lulkisa, sim tuktan aisubi sakaia latwanka ba baku. 23Paskanka aiska ba baman pât wauhras, sakuna yawan pali na sin pât wahwisa, naika wan dukia briaia ba tawahkia baku pat yawan Spirit ba brisa kuna. Wan kupia mununhtara latwan kum brisa, bara yawan lika Gâd luhpia nani baku wan briaia piua ba bîla kaiki banhwisa, bara baha piua sika wan wîna tara aiska ba pri sakan kabia.#2 Ko 5.2-4. 24Kan wan kanra bîla kaikaia lâka playka ba mita sika swaki wan sakan sa; kuna upla kumi dîa bîla kaiki kan ba pat kaikisa kaka, baha lika diara bîla kaikisa tânka apia sa. Bamna upla kumi diara kaikaia kan ba pat kaikisa kaka, kau diara wala bîla kaikaia ba âpu sa. 25Sakuna yawan bîla kaiki dukia ba sip kau kaikras sa kaka, wan kupia alki takaski baha ba bîla kaikaia sa.
26Baha sim natka ra, Spirit mita wan swapnika nani ra hilp wan munisa. Kan nahki wan pura sunaia sa tânka ba yawan kaikras sa, sakuna baha sim Spiritka ba mita Gâd ra wan tâwan makabisa ai mamna lulki ba kira, yawan mita aisaia sip apia ba. 27Bara Gâd, wan kupia tânka pliki kakaira ba, Spirit dîa aisi ba witin pain kaikisa; kan Spirit lika Gâd uplika nani ba dukiara makabisa, Gâd kupia lâka ba kat.
Kau pura lalura ba
28Bamna yawan kaikisa, diara sut Gâd mita mangki ba lika witin ra latwan kaiki nani ba hilpka pali sa, baha nani Gâd ai kupia lâka kat luki si paiwan ba. 29Patitara piua Gâd mita upla nani paiwan ba, baha uplika nani ba paiwan ai Luhpia baku kaia,#2 Ko 3.18; Gal 4.19; Pil 3.10. baku mika Gâd Luhpia ba ai muihni ailal ba tilara tawahkia kaia. 30Bara patitara piua wina Gâd mita aihka sakan nani ba, witin sin baha nani ba paiwan; bara paiwan nani ba sut witin mita kasakkira nani kulkan; bamna baha kasakkira kulkan nani ra mayunra sin yan.
31¿Dîa kau yang nani wiaia sna ki? Gâd ba yawan wal sa kaka, ¿ya wan mapara buaia sip kabia ki? 32Gâd ai Luhpia pali ba sin wankaia apia wiras, sakuna yawan sut wan mata ban prura mihta ra mangkan; bamna, ¿nahki yawan na witin ai Luhpia wal asla diara sut ba wankras kabia ki? 33¿Ya sip kabia ki Gâd mita bâk sakan nani ba dahra kwahkaia? Gâd mita sika baha nani kasakkira kulki ba. 34¿Ya sip kabia ki baha nani pât ra mangkaia? Kraist Jisas sika pruan ba, bara baha sut purkara, Kraist sika pruan nani tila wina buan bara Gâd mihta aihkika tani ra sa, bara wan tâwan makabisa. 35¿Bamna ya mita sip sa ki Kraist latwanka lâka ba wina wan dakbi sakaia? ¿Baha daukaia sip kabia ki pât wahwan ba, ban kra trabil nani ba mita, apia kaka rausauhkan lâka ba mita, plun wahwaia ba mita, kwala âpu kaia ba mita, pât wan lamara ba mita, prura mita kra? 36Ulbanka ra naku aisisa:
“Man nani tâmwan
yu aiska pali prura mihta ra ai mangkan sa;
sîp nani ra ikaia watla ra brih auya ba baku.”#Law 44.22.
37Sakuna baha sut tilara, yawan na kau pura lalura sa, witin mita latwan wan kaikan bamna. 38Baha mita yang kasak lukisna, diara âpu sa Gâd latwanka ba wina wan dakbi sakaia. Prura mita, raya kaia ba mita, insal nani ba, karnika bri nani ba bara spirit lâka mapara karnika bri nani ba sapa, diara nani nanara ba, bara diara nani naika balaia ba, 39purara ba, tihu pali ra ba sin apia, bara diara wala sut Gâd daukan ba mita sin, sip apia sa. ¡Gâd ai latwanka lâka wan Dawan Kraist Jisas param wan marikan ba wina dakbi wan sakaia dukia kumi sin âpu sa!
Currently Selected:
Roman 8: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua