Roman 14
14
Man muihkam lâka daukpara
1Bamna upla kumi kasak lukan lâka ra swapni sa kaka, ban tilamra bri bas, sakuna dîa ai tânka ba dukiara lika wal aisi blauhpara. 2Tânka kum ba lika naku sa: Upla manis ba lukisa witin nani sip sa diara sut ba piaia, kuna wala nani bâra sa witin nani ba kasak lukan lâka ra swapni sa, bara inmakan nani baman pîsa. 3Bamna ya plun sât sât pi ba mita upla kumi plun tila nani piras sa wisi bahki kulkaia apia sa; bara plun tila nani baman pi uplika ba mita plun sut pi uplika ba lâka aisi daukaia apia sa, kan Gâd mita baha uplika ba pat ai uplika saki brin sa. 4¿Man ba ya sma, upla wala dukia dadaukra lâka aisi daukisma ba? Ai dawanka bisniska sa, witin ba buisa sapa, apia kaka kauhisa sapa. Bara uplika ba yaka pain bûi kabia, kan Dawan lika sip sa witin ba yaka pain kaia.
5Tânka wala ba lika naha: Upla tila nani lukisa yu kum ba kau tara sa yu wala ba wal, bara wala nani lukisa yua sut ba lika kumi. Bamna upla kumi bani ba ai kupia lukanka ba kat kaia sa. 6Bamna upla kumi yua kum aihka saki kulki ba lika, Dawan dukiara sa. Bamna ani uplika plun sâtka sut pi ba, baha sin Dawan mayunaia dukiara pîsa, kan witin mita Gâd ra tingki wisa; bara ani uplika sin plun tila nani piras ba, baha sin Dawan mayunaia dukiara piras sa, bara witin mita sin Gâd ra tingki wisa.#Kol 2.16.
7Yawan kumi bani ba ai wîna kat man dukiara raya apia sa, bara wan dukiara sin pruras sa. 8Baku bamna, yawan raya sa kaka, Dawan dukiara raya sa; bara pruisa kaka, baha sin Dawan dukiara pruisa. Baha mita yawan raya kabia kra bara prubia kra, Dawan dukia sika. 9Kan Kraist pruan bara kli sin raya takan, witin lika pruan nani bara raya nani wal Dawanka kaia.#2 Ko 5.10.
10¿Kuna man, dîa muni muihkam lâka aisi daukisma ki? ¿Dîa muni muihkam ba diara apia baku kulkisma? Yawan sut lika Kraist mawanra buaia sa, witin mita wan lâka aisi daukbia dukiara. 11Kan Ulbanka ba wisa:
“Yang rayaki dukiara swer takisna, Dawan bila,
upla bani ai lula krikbia yang maiwanra,
bara upla sut param pali aisabia yang na Gâd sna.”#Ais 45.23.
12Baku bamna, yawan kumi bani wan tânka ba saki Gâd ra param wibia.
Man muihkam mina prukanka daukpara
13Baha mita yawan pana pana wan walka lâka aisi daukaia apia sa. Sakuna, man nani wilin pali taks muihkam mina batakaia dukia ba daukaia apia, saurka lâka ra sin yarka kauhbiara. 14Yang kasak daira walisni diara saura kumi sin âpu sa; Dawan Jisas ra kasak lukisna ba mita sakuna upla kum lukisa diara kum saura, bâra sa witin mapara sika baha ba saura. 15Bamna man ani pata pima ba mita muihkam mina batakisa kaka, ba kat lika man latwan lâka âpu sma tânka marikisma. Baku bamna, plun sât kum kum piaia want sma ba mita, yarka upla kumi sin tiwbiara, kan baha tâwan sin Kraist pruan. 16Baha mita, sans yapara dîa pain sa wi banhwisma ba tâwan ninam ra saura aisaia. 17Bamna Gâd King aimaki ba lâka lika piaia, diaia wal tânka apia sa, sakuna baha lika wan rayaka wapni briaia lâka sa, bara kupia kumi lâka bara lilia lâka Spirit Holikira bâk yawan bri ba tânka sika. 18Ya naha natka ra Kraist dukia dauki ba, witin ra Gâd mita pain kaikisa bara upla nani mita sin.
19Baku bamna, kupia kumi lâka dauki dukia nani ba nina blîkpi, baha diara nani wal sip ba, wan walka wal pana pana hilp munaia spirit lâka mapara pâwaia dukiara. 20Dîa dîa pisma ba tâka mita, yarka Gâd warkka bahki ra tawbiara. Plun sut lika klin sa, baha tânka ba param sa; sakuna dîa dîa pi ba mita upla wala mina batakisa kaka, baha lika saura sa. 21Bamna pain sa yawan wîna piaia apia, wain sin diaia apia, bara wan muihni mina prukaia dukia kumi sin daukaia apia sa. 22Kasak lukan lâka brisma ba, Gâd mawanra man pali mita bri kaia sma. ¡Lilia pali kabia baha uplika tânka trai kaiki bara witin ai kupia ra ai dara walisa pâtkas sa! 23Bamna ya plun kum pîsa kaka pain lukras lâka ra, witin ban pîsa ba mita pâtkira takisa, ai kupia aiska ni piras bamna; kan diara sut kasak lukan lâka wanki ba tâka mita wan kupia aiska ni daukras ba, baha lika saurka lâka sa.
Currently Selected:
Roman 14: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua