Roman 11
11
Israel luhpia nani bâk sakan ba
1Bamna nanara, yang makabi walisni: ¿Gâd ai uplika Israel luhpia nani ba ban pali lulkan sa ki? ¡Apia pali! Kan yang pali na sin Israel uplika sna, Ebraham kiamka bara Benjamín taika.#Pil 3.5. 2Kan tâ wina Gâd bui Israel luhpia nani ba ai uplika baku kaikan, bara nanara baha nani ba sip lulkbia apia. ¿Kaikras sma ki man nani, Ulbanka ra prapit Ilayas aisi ba, witinka mita Gâd ra ai pura sunra bâk Israel luhpia nani dahra sakan ba? Witin naku win: 3“Dawan, witin nani mita man damra aisasara nani sut ikan bara altarkam sut sin âpu daukan, bara yang baman sna, kuna yang ra sin ai ikaia want sa.”#1 Ki 19.10,14. 4Kuna Gâd pana wisata: “Yang upliki nani 7,000 aihka sakri sa, witin nani gâd Baal ra kau ai lula krikras sa.”#1 Ki 19.18. 5Baha sim natka ra naiwa yua Israel luhpia nani kau dakni sirpi swin ba lika, Gâd ai kupia latwanka ra baha nani ba bâk saki brin. 6Bamna Gâd latwanka lâka ba mita sa kaka, nanara upla mita dîa daukaia sip yaba tâka mita lika apia; kan upla dauki ba mita kaka, baha lika Gâd latwanka ba kasak pali latwan lâka tânka apia sa.
7¿Baku bamna, dîa? Israel luhpia nani pliki kan ba sip sakras kan, sakuna Gâd wahbi sakan nani ba lika sakan. Wala nani ba lika kupia karna daukan, 8Ulbanka ra dîa aisi ba baku: “Gâd spiritka ba mapara baha nani ba yan ai dara walras kan; nakra nani sip kaikras ba yan, bara sip walras kiama nani ba sin yaban, bara naiwa kat baku ban sa.”#Kli S 29.4; Ais 29.10. 9Debit sin naku wisa:
“Witin nani pata tara liliaka ba
lika daiwan alkaika bara inska alkaika tanka baku sa,
witin nani ai mina prukbia,
bara klala yaia wisi.
10Ai nakra nani ba blain takbia
bara diara sip kaikbia apia,
bara ai nina dusa ba sin kruski ban kaia ra baku bri kabia.”#Law 69.22-23.
Ju apia uplika nani swaki sakanka ba
11Nanara yang makabi walisni: ¿Ju nani ai mina prukan ba mita, ban aiska pali kauhan sa ki? ¡Sip apia pali! Sakuna, Ju nani Gâd bîla wali daukras kan ba mita, Ju apia nani ba swaki sakan lâka brin, bara baha mita Ju apia nani ba mapara kupia tuskanka sa. 12Bamna, Ju nani mina prukanka, swakwanka ba mita tasba aiska na hilp brin kaka, bara witin nani mâyara tawan ba mita Ju apia uplika nani sin hilp brin kaka, ¡Ju nani kli tawi dimbia bara nahki kau hilp bribia lukisma!
13Sakuna Ju apia uplika nani sma ba ra, diara brisna mai wiaia. Gâd bui Ju apia uplika nani tilara ai blikan, bamna yang warkki ba mita diara uya pain daukisma. 14Brin ai daukisa yang nisanki pali wina, tila ba man nani daukisma ba baku daukbia, bara baku witin nani sin swaki sakan kabia. 15Ju nani ba lulki swin ba mita, tasba uplika nani ba Gâd wal kupia kumi lâka brin. Witin nani ba Gâd bui kli bribia ba ra, ¿dîa kabia? ¡Pruan kan nani ba raya kaia lâka ba bribia! 16Plawar akban wina pas brit ba, Gâd dukia holikira kulkan sa kaka, plawarka akban pîska aiska ba holikira sa. Bara dus wakia kumi Gâd dukia holikira kulkisa kaka, tnawa nani ba sut holikira kulkan sa.
17Bamna tila Ju nani ba lika, sim oliv dusa tnawa nani kan klaki saki, man oliv dusa tnawa wail katma ba, baha nani watlika ra mai mangkan sa. Baku sika wakia pali ba wina dukiam briram, bara oliv dusa rayaka pali ba ra sin. 18Sakuna lukpara tnawa pali nani ba wal man ba kau pain sma. Man ba kau pain sma lukma ba ra, damra wals man apia sika dusa ba wakia ra alki bri ba, sakuna wakia ba sika man ra alki mai bri ba.
19Ban kra wima: “Âu, sakuna tnawa nani pali ba klaki sakan, yang ba watlika ra ai mangkan oliv tnawa kamna.” 20Aitani, sakuna baha nani kasak lukras kan ba tâwan klaki sakan, bara man lika ban bâra sma kasak lukram ba mita. Baku bamna, man mamyunpara, sakuna sibrinka lâka ni bri bas. 21Bamna Gâd tnawa pali nani ra saurka swih tikras kan kaka, baku man ra sin saurkam swih tikan kabia apia. 22Bamna kaiks, nahki Gâd ba painkira pali sa, sakuna lâ sin karna brisa. Witin mita kauhan nani ba wal lâ karna bri kan, sakuna man wal lika uya pain sa. Sakuna man ai latwanka lâka ba nina blikaia sma; baku apia kaka, man sin klaki mai sakan kabia. 23Sakuna Ju nani ba kli kasak lukbia kaka, kli watlika ra mangkan kabia; kan Gâd ba karnika brisa baha nani kli watlika ra mangkaia. 24Bamna man Ju apia sma ba, oliv dusa wail kum wina ban ai tânka wina klaki mai saki, oliv dusa pain kumi ra mai mangkan. ¡Baku sin kau aiska pali, Ju nani ba sika oliv dusa pain ba tnawa nani, bamna witin nani ba lika kli ai dusa pali ra mangkan kabia!
Israel luhpia nani tnata ra swaki sakanka lâka ba
25Muihki nani, Gâd daukanka dahra prakan ra bâra ba tânka brima brin ai daukisa, man nani ba sinskira sma lukaia apia dukiara: Tila Israel luhpia nani kupia karna takan ba, Israel apia nani ba sut Gâd ra brih balaia piua kum praiska baman dukiara sa. 26Ani piua baku takbia, bâra lika Ju nani ba sut swaki sâkbia, kan Ulbanka ba baku wisa:
“Pri sasakra ba Saion wina balbia,
bara witin mita Jekob wina saurka ba sâkbia.#Ais 59.20.
27Bara naha sika yang bui witin nani wal lâ daukri ba,
yang bui witin nani saurka ba sut sakamna ba ra.”#Jir 31.33-34.
28Swaki sakan lâka tânka smalkanka ba mita lika, Ju nani ba Gâd wal ai waihla baku kulkan sa, man nani Ju apia nani ra sans maikaia; sakuna Gâd mita kau ban Ju nani ra latwan kaikisa, kan ai damika nani ba wina witin bâk saki brin. 29Bamna Gâd mita yabi ba witin kli dakbi sakras sa, bara paiwi ba wina kitwi takras sa. 30Man nani lika kaina piua ra Gâd bîla wali daukras katma, kuna nanara Ju nani bîla wali daukras kan ba mita, Gâd mita man nani ra kupia yamni mai kaikisa. 31Baha sim natka ra Ju nani ba nanara Gâd bîla wali daukras sa, sakuna baha lika man nani ra baku Gâd mita Ju nani ra ai kupia yamnika yabia baman sa. 32Bamna Gâd mita upla sut ba bîla wali daukras lâka ba mununhtara swin, baku mika sut dukiara ai kupia swapnika bribia.
33¡Nahki Gâd yuyaka lâka ba, ai sinska lâka ba, bara diara tânka kaikaia lâka bri ba tihu pali sa! Witin ai lâka ba tânka yawan mita sip tânka briras, bara ai yabalka nani tânka ba sin sip kaikras sa.#Ais 55.8-9; Jdt 8:14. 34Bamna Ulbanka ba wisa: “¿Ya Dawan lukanka tânka ba brin ki? ¿Ya mita witin ra lâ smalkan ki?#Job 15.8; Ais 40.13; Jir 23.18; 2 Ko 2.16; Si L 9.13. 35¿Ya pas Dawan ra yaban pana witin wina mana briaia?” 36Kan diara nani sut ba Gâd wina aula, witin paskan bara witin dukiara baman sa.#2 Ko 8.6; Epe 4.6; Kol 1.16. ¡Prana kabia Gâd ra, ban kaia ra! Baku kabia.
Currently Selected:
Roman 11: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua