Jasua 2
2
Jasua mita upla blikan Jeriko kutbanka ba ra, nahki dimaia ba kaikaia
1Sitim wina Jasua bui waitna wâl saki Jeriko ra blikan, tawanka tânka ba pliki kaikaia. Baha waitnika nani ra witin naku win: “Man nani Jeriko tawanka tara ba ra was bara witin nani ba tânka pliki laki kaiki bal wan wima.’’
Witin nani wan, bara tihmia kum tawanka ba ra luaia dukiara rug mairin kum nina Rahab wi ba watla ra takaskan. 2Sakuna upla kum pat kaikan bara Jeriko kingka ra maisa pakaia wan bara witin ra naku win:
—Israel luhpia nani wina, wan tasbaya tânka na pliki kaikaia balan.
3Bara king ba Rahab ra ai bîla bliki, win:
—Baha waitnika nani man ra balan wamtla ra dingki brisma ba latara sâks, baha waitna nani ba sika balan wan tasbaya na tânka pliki kaikaia.
4Sakuna Rahab waitnika nani ba yukuki si, bara suldiar nani ra win:
—Âu, man nani aisisma ba kasak, tila waitna nani yang ra balan kan, sakuna witin nani ba ani wina balan sapa yang tânka briras kapri. 5Yu dimaia ra kau tawan getka ba prakras kan ba kainara, witin nani pat tawan wina taki wan, bara anira wan sapa yang sin baha tânka briras. Sakuna man nani nanara nina bliki waia sip sma, witin nani ba alkaia.
6Sakuna kasak pali aisaia kaka, waitna nani ba witin mita utla bahna ra suni linin kiaubi wilkanka nani bâra kan ba tilara swin yukuwi banhwi kan.
7King suldiar nani ba waitna nani ba nina bliki, Jordan awala puswi luaika nani ba kat wan. Witin nani nan taki wan ba ra, tawan getka ba sin prakan kan. 8Waitna nani utla bahna ra sunan kan ba sin kau yapras, Rahab utla bahna ra uli wan bara witin nani ra win:
9—Yang daira walisna Dawan mita naha tasbaya na pat man nani mihtam ra mangkan sa, witin mita upla nani na pat man nani sibrinkam dingkan sa. Man nani nâra balram na dukiara upla sut na pat sibrin bla pruisa. 10Yang nani tânka brisna man nani Idsip wina bal takram ba ra, Dawan mita Kabu Pauni laya ba lâkan,#Imp St 14.21. man nani baila wala ra luaia dukiara, baku sin man nani bui Sihón bara Og kingka nani sut tikram,#Kul K 21.21-35. amorreo nani king wâl, Jordan baila wala kat ba. 11Baha sturka walri ba ra yang nani ra sibrin tara ai dingkan sa, upla kumi sin man nani mampara sip bubia apia. Kan Dawan, man nani Gâdkam ba, kasbrika purara ba baku naha tasba ra sin witin ba Dawan sa. 12Bahamna yang bui man nani ra makabisni nanara man nani bui yang ra swer takma, yang bui man nani ra yamni mai munisna na baku, man nani sin yang bara taiya nani ra sin baku yamni munaia. Man nani sin kunin aisapara, diara kasak daukisma ba sainka sin kum aik, 13bara aisiki, mamiki, muihki nani bara laikra nani luhpia nani ba ikpara, raya swis. ¡Man nani bui yang nani ra prura wina swaki ai sâks!
14Bara waitna nani ba pana witin ra win:
—Yang nani rayaki pali ni man nani rayakam pali ba dukiara aisamna, yang nani nâra balri na dukiara man bîlam wina upla wala ra aisaras pali kama kaka. Dawan naha tasbaya na yang nani ra aikbia ba ra, kasak lukanka ba praiska wal, kunin âpu lâka ra yang nani bui man ra yamni mai munamna.
15Rahab watla ba tawan kutbanka ba purara mâkan kan, bara witin kiwa kum saki waitna nani ba ra yaban, witin nani bahara alki, windar bâk alahwi tasba ra iwi wan. 16Rahab witin nani ra win:
—Man nani il nani tilara plaps, bara baha nani mai pliki tauki sip mai sâkbia apia. Yu yumhpa bahara yukuwi bas, witin nani mai pliki si kli tawan ra tawi bal dimbia ba kat. Baha ningkara man nani taki mahka yabalkam ra impaks.
17Waitna nani ba kli witin ra win:
—Man bui diara sut dukiara yang nani ra daukaia swer taki aisaram ba, baha kat yang nani daukamna. 18Sakuna yang nani tasbayam ra bal dimamna ba ra, man naha kiwka pauni na wal yang nani windarku ai lahbram kiwka na, windarka ba ra ban pami swiaia sma. Bara wamtla na bilara papikam, mamikam, muihkam, lamkra nani, papikam taika nani sut aikuki dimi nâra bas. 19Sakuna wamtla bîla wina latara taki prubia kaka, baha ba witin yakan ai pâtka kabia, yang nani baha tilara pât âpu sna. Sakuna man nani utla bilara kama ba ra, upla kum bal mai kangbia kaka, yang nani purira kabia baha wapnika mangkaia. 20Ban sakuna, naha lâka yawan wal aisi dauki na man upla wala ra wima kaka, yang nani swer taki aisisna lâ daukan na kat, yang nani dîa daukaia mai wîri ba sin daukamna apia.
21Mairin ba pana win:
—Yawan wal dîa lâ daukan ba kat kabia.
Bamna lakula daukan, bara waitna nani ba mahka wan. Bara mairin ba ai windarka ra kiwa pauni ba wilki pami swin. 22Blikan waitnika wâl ba wih yu yumhpa il nani tilara yukuwi kan ai pânika wal. Suldiar nani lika waitnika wâl ba alkaia pliki, kuntri kir taukan yu yumhpa. Sakuna sakras kan ba ra, witin nani kli Jeriko tawanka ra tawi balan. 23Bara waitna nani ba il nani wina bal iwi, Jordan awala ba lui wan Jasua wal prawaia. Bara witin nani dîa kaikan, walan, dîa daukan ba tânka sut witin ra win, witin nani ra dîa takan ba sin win. 24Witin nani sin win: “Tasbaya aiska ba Dawan yawan wan mihta ra mangkan sa. Yang nani wari ba tâka, nanara upla sut ba pruaia prais sibrin daukisa.”
Currently Selected:
Jasua 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua