Job TÂ BÎLA NANI
TÂ BÎLA NANI
Job wauhkataya ra sturi nani pat taki luan dahra aisanka ba wina, nanara mayuni aiwani, prana dauki aisi bîla nani ra tawisa (prana wal ulbi aisi bîla nani). Job ba Ju aisika almukka patitara uplika kum kan, waitna yamni yuyakira, ai luhpia sin ailal bri kan; witin ai purara sauhki tikaia pâtka tara balan, ai dukia nani sut tikan, ai luhpia nani sin sut pruan. Witin ra sin siknis saura pali alkan; baha mita witin ai kanra bîla kaikanka briras kan (sapta 1,2). Tâura ai pânika nani yumhpa balan, baha ningkara wala nani sin balan kan, witin ai maisa nihkaia. Baha nani witin wal aisin bara tila taim unsabi blahwi baku aisi kan (sapta 3-37).
Job piua ra uplika nani ba luki kan, upla ai saurka dauki ba tâka mita pât wahwisa. Naha kat sika blahwan ra dimisa, kan Job lukanka ra piu bani lukan yamni, upla ra umpira kaiki prisant yui ba mita, witin baku pât wahwaia ba aitani sa apia luki kan. Sakuna ai pânika nani lika mapara karna aisi kan. Witin nani luki kan, Job ba upla saurakira kum sa, ai saurka dahra ba yukukisa, sakuna sikniska ba mita param sakisa.
Job ai kupia baiki aitani lukras sa, naha lukanka witin pât wahwi ba dukiara; witin sip tânka briras nahki sip kabia, Gâd mita baku witin ra daukaia, kan witin ba pâtkas sa, uba saura pali. Ai latwanka bri ba bara ai tânka pain briras ba tilara, Gâd ra makabisa witin wal ai mawan kat wal prawaia bara ai dahra wiaia ai tânka ba dukiara, kan witin tnata ra takaskaia want sa, karna takan kaia, ai kulkanka lâka ra bara waitna kum pain lalukra kaia.
Lâs tani ra, Gâd Job ra aisin. Makabanka tara, tihuka nani bâk makabi walisa, ai karnika bara ai sinska lâka, nahki diara paskan ba wan marikisa.
Naha na Job ra tânka yabisa, nahki pali upla ba Gâd mapara diara apia ba; witin ba tara pali sa, sinskira bara karnika sut bri ba. Bara ai kupia lanhkan diara tânka pain briras, kan sturi nani karna aisin ba dukiara. Bara kau pali ba, sturi nani sin ban ai kupia baiki bara karna nani sin aisin (38.1—42.6).
Ai kupia lakan tâka mita, Job ba lukanka baman karna daukras kata, Gâd nakra ra, wîna tara mapara sin kau tara yaban pâwanka, kainara piua ra kata wal. Tani wala Gâd mita, Job pânika nani ra lawi daukan; kan Job pât wahwanka ba sip tânka briras tâka mita, bara sim ban luki kan ba dukiara. Kaina piua ra upla saura baman klala brisa, lukanka kum warha kan, Gâd mapara. Job ai kupia alki takaskras ba tilara, yamni kaikras kan, bara mapara aisan, piua nani kum kum ra ai bîla sawaia kat praiska, witin ban ai kasakka lukan ba Gâd kum kasak ba ra man ki bri kan, ban kra upla sinskas lukras ba ban sirpi mita, sip piua nani kum kum ra tânka sut briras munisa, dîa munisa piua ra pâtkas nani sin pât wahwi ba (42.7-17).
Currently Selected:
Job TÂ BÎLA NANI: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua