1 Samuil TÂ BÎLA NANI
TÂ BÎLA NANI
Samuil ba kulkan sa, wihta nani tila wina lâs ba; bara sin Israel luhpia nani tila kat, pas prapit kau tara kulkan ba. Ulbanka nani wauhkataya pas witin ai nina bri ba, wan marikisa wihta almuk nani piua kan ba wihki nanara asla kaia lâka bapan ba, king kum Dawan bui bâk sakan ba karnika ra, bara prapit kum bui sin sunu daukan ba.
Naha wauhkataya ra upla tara nani yumhpa dahra takisa: Samuil, Saúl bara Debit. Sapta 1—7 nani pas ba ra, Samuil rayaka sturka nani wan marikisa, witin aisubi takan piua ba wina; bara Israel tâura aimaki ai warkka nani dauki kan ba sin wan marikisa.
Saúl king lâka ra iwan dahra nani ba wan marikisa sapta nani 8—15 ba kat. Ningkara wan aisisa, nahki Saúl saura takan ba, bara ai kingka lâka sin mâyara bal iwan ba, ai daukanka ba yamni apia takan, baku sin nina bliki rausauhkanka nani daukan ba, baha tila kat Debit ra sin. Baha sut takan ba mita sika, Debit ba war aiklaklabra tara takan ba, bara ban sin filisteo nani mihta kat kauhan ba, sapta 16—30 kat. Lâs sapta nani ra wan marikisa, nahki Saúl bara ai luhpia nani sut kira, saura pali pruan ba Guilboa warka tara aiklabi kan tila ba kat.
Israel kingka mangki yan sturka ba wan marikisa, upla nani ba baku brin dauki kan makaban ba mita, Dawan bui witin nani ai brinka ba kat daukaia dîa makaban ba yaia dukiara king ba mangki yan, sakuna baha wiras kan Dawan ai kingka lâka bri ba karnika ba aiska witin ra yan, bara Dawan baku Israel purara king aimakaia, upla sut ba lika, king bîla wali kan.
Baha sturka tânka pali plamaika ba lika, king bara upla nani sut ba sin, Dawan ra sika bîla walaia, ai kingka lâka mununhtara iwaia. Dawan lâka ba ni upla sut raitka ba yaban kaia, yuyakira nani bara umpira nani ba sut aikuki kumi kulkan kaia, ai raitka sin briaia; baha lâka ba dauki iwi kaia.
Dawan baman sip sa upla nani ra yamnika nani sut yabi kaia, ai bîla wali ai lâka bîla nani kat dauki ba natka kat, witin baman king nani kingka sa. Baku daukras sa kaka, upla sut ba ban saurka lâka ra iwi pât wahwi kabia.
Currently Selected:
1 Samuil TÂ BÎLA NANI: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua