Matayo 2
2
Airatatamana aye ka bi Yesu
1Were ho i abatika Yesu ni Betereme yo du Yuda yo rago gu bakindo nga Erode, oni ngére, airatatamana ki ye uroyo ku Yerusarema yo, 2ki ya, “Wari du gu ko ni i abatika ko ni Bakindo aYudo re? bambiko ani abi gako kerekuru uroyo ki ye ka irisa ko.” 3Were ho Erode agi he ni nga bakindo si ki imi ti ko, na aboro Yerusarema dũ. 4Ko ki dungura abaira aboromotumo na ga aboro abakeapai, ko ki sasana yo wari i ka batika Kristo ni. 5I ki ya fu ko, “Betereme yo du Yuda yo; bambiko si ni keke he be nebi wa gere,
6‘Na mo nga Betereme, du ringara Yuda yo,
mo adu nga sa yo dagba agbia Yuda te;
bambiko bazogo aye yo du mo ni,
ni adu ni babanda gimi aboro nga aYisaraere,’ ”
7Erode ki yambu agu airatatamana re tie, ni gbuko ki sasana yo sirisiri ti gu rago ho i abi kerekuru ni. 8Ko ki kedi yo ku Betereme yo, ki ya, “Oni ndú ka gbata gu toni gude re sirisiri; ho oni ka bi ko ni, oni ki ye ka gumba ha fere, mi ndu ka irisa ko.” 9Were ho i agi ga bakindo pai ni, i ki ndu gayo nduge; were gu kerekuru i abi ru uroyo u ki ningbe fu yo ku mbata yo, daho u ada ni ki ru ri gu ba ho gu toni gude adu ni re. 10Were hoi abi kerekuru ni, i ki sambua tiyo ni bakere ngbarago. 11I ki rimi ku dimo yo ki bi toni gude be Maria nga nako; i ki ti sande ki irisi ko; i ki zogo gayo kumuko ki fu gamahe fu ko, nga dahabu na fuõngua na mure. 12Mbori ki yugu he fu yo rogo musumo yo ya ka i karaga nga tiyo koyo du Erode ni ya, si du i aga ti ni ku kpuyo yo ngba kura gene.
Ora ku Ezipeta yo
13Were ho i aguari ni, oni ngére, ga Gbia maraika ki ta yugo tiko fu Yosefa rogo musumo yo, niya, “Mo gúari ki di toni gude na nako, ki oro ku Ezipeta yo, mo ki sungu yo daho mi ka gumba pai ni foro; bambiko Erode nikagbata toni gude ka imo ko.” 14Ko ki guari ki di toni gude na nako yuru, ki ga ku Ezipeta yo; 15ki sungu yo daho Erode akpi ni. Gu pai Gbia agumba ku ngba nebi si du ni digisidigisi he, ya, “Mi ayambu wire Ezipeta yo.”
Ga Erode zinga
16Were Erode, ho ko abi he ni ya airatatamana asawia ko, ko ki zingi gbe, ki Kedi aboro ki iimi akumbagude dunduko naadu Betereme yo, na pati he kirikiri, agu yo garãyo adu ue na agu yo garãyo ata du nga ue ya, a wa gu rago ko awiriki pa ha sirisiri be airatatamana. 17Gu pai ki du ni digisidigisi he Yeremaya agumba ha nga nebi, ya,
18“I agi fugo Rama yo,
kpe na bakere nunga,
Raere nikpari tipa awiriri;
ka ri awasa nga ya, bambiko i ho te.”
Yega ku Nazareta yo
19Ho Erode akpi ni, ga Gbia maraika ki yugu tiko fu Yosefa rogo musumo Ezipeta yo, 20niya, “Mo gúari ki di toni gude na nako, ki ga ku rogo ringara aYisaraere; mbiko agu yo naasadi ka imo toni gude i kpi.” 21Ko ki guari ki di toni gude na nako, ki ye ku rogo ringara aYisaraere. 22Ono ho ko agi he ni ya Arukerao azogo aboro Yuda yo ku ba bako nga Erode, ko ki gunde ti ndu koyo; ko ki kuru ku ringara Gariraya yo, Mbori nayugu pa ha fu ko rogo musumo. 23Yosefa ki ye ki raki rogo bakporo nga Nazareta; gu pai dũ ni digisidigisi he anebi agumba ha, ya “I ya ti ko boro Nazareta.”
Currently Selected:
Matayo 2: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.