Mateu 3
3
Johani Mubapatizi.
1Hi ka lawo masiku ku lota Johani Mubapatizi na a kanela xiwuleni xa Judia, Mar. 1:4, 15; Lu. 3:2, 3; Joh. 1:28
2aku: Hunzulukani, hakuva mufumo wa tilo wu tshinele. Xip. 4:17; 10:7
3Hakuva hi yaloye a nga kanela ha yena muprofeti Isaya, aku ngalo:
A gezu ga loye a bako hungu xiwuleni, giku:
Longiselani a ndlela ya Hosi,
Mahani magonzo ya yona ma lulama. Isa. 40:3; Mar. 1:3; Joh. 1:23
4Makunu Johani i wa hi ni tinguwo ta woya ga kameli, ni bhandi ga xikhumba xiwunwini xakwe; a kuga kakwe ku wa hi humbi ni wulombe ga khwati. Levi 11:22; Mar. 1:6; 2 Tih. 1:8
5Zonake ku loya kakwe a va le Jerusalema ni Judia gontlhe, ni tiko gontlhe gi nga kusuhani ni Jordani; Mar. 1:5; Lu. 3:7
6va lo bapatizwa hi yena congweni wa Jordani, va wulela zionho zabye. Miti. 19:4, 18
7Kanilezi laha na a wona a vanyingi va vaFarisi ni vaSadusi na vata kubapatizeni kakwe, i te ngalo kabye: Pswalo wa tinyoka, mu lulekilwe hi mani ku chava a khulo gi tako ke? Xip. 12:34; Rom. 5:9; 1 Tes. 1:10
8Hikwalaho humesani mihanzu yi kombisako kuhunzuluka.
9Mu nga alakanyi muku: Hi na Abrahama, a nga dadani wa hina; hakuva nza mu byela lezaku Nungungulu i na ni ntamu ku vuxela Abrahama a vanana hi maribye laya, Joh. 8:33, 39; Miti. 13:26; Rom. 4:1
10Hambu ni lezi a xihloka xi vekilwe mitswini ya tisinya; a tisinya tontlhe leti ti nga pswaliko mihanzu yi neno ti ta tsemiwa, ti hoxiwa nzilweni. Xip. 7:19; Lu. 13:7, 9; Joh. 15:6
11Mina nzi mu bapatiza hi mati kasi ma hunzuluka; kanilezi loyi a tako nzhako ka mina i na ni ntamu ku nzi hunza mina; a nzi faneli ni ku rwala zilato zakwe; yena i ta mu bapatiza hi Moya wa ku Basa ni nzilo. Mar. 1:8; Lu. 3:16; Isa. 4:4; 44:3; Miti. 1:5
12A lihlelo lakwe li le canjeni gakwe, yena i ta swiyelisisa a wuhulelo gakwe, a hlengeletela a mavele yakwe magombeni yakwe, kanilezi a mungu i ta wu hisa hi nzilo wu nga timekiko. Mal. 3:3; Xip. 13:30
A kubapatizwa ka Jesu.
13Zonake Jesu i lota ka Johani le Jordani hi le Galilea, a ku ta bapatizwa hi yena. Xip. 2:22; Mar. 1:9; Lu. 3:21
14Kanilezi Johani i wa lava ku mu kaneta, aku ngalo: Hi mina nzi faneleko ku bapatizwa hi wena, kasi wena uta ka mina!
15Jesu i lo hlamula aku kakwe: Lezi a zive tano; hakuva zinghaho hi fanele ku tatisa kululama kontlhe. Zonake Johani i lo mu vumela.
16Jesu laha na a bapatizilwe i lo huma zalezo hi lomo matini, languta, a tilo gi lo vululeka, a wona Moya wa Nungungulu wu relela kota tuva hehla kakwe. Isa. 11:2; Mar. 1:10; Lu. 3:22
17Zonake ku lo zwala a gezu gi huma matilweni, giku: Loyi hi Nʼwana wa mina a ranzekako, nzi xaleleko khwatsi ha yena. Tis. 2:7; Mar. 1:11; Lu. 9:35; Joh. 12:28; Efe. 1:6
Currently Selected:
Mateu 3: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.