Malaki 1
1
A liranzo la Nungungulu ka Israeli.
1A mhaka ya xiprofeto xa Jehova ka Israeli hi nomu wa Malaki.
2Nzi mu ranzile, ku wula Jehova. Kanilezi mu ngalo: U hi ranzile hi yini? Esau i wa hi nakulobye wa Jakobe ku wula Jehova: hambu zi hi tano, nzi lo ranza Jakobe,
3nzi venga Esau; a zitsunga zakwe nzi lo zi maha marumbi, nzi nyikela a tshomba yakwe ka mahlolwa ya khwati. Jer. 49:17; Rom. 9:13
4Edome a ngaku ngalo: Hi hahlulilwe, kanilezi hi ta tlhela hi ya aka marumbi! Jehova wa tiyimpi i ngalo: Va ta aka, kanilezi mina nzi ta khungumula. A vanhu va ta va vitana, aku: I tiko ga kubiha: niku, Mbanhu va zangarelweko hi Jehova kala kupinzuka.
5Mu ta zi wona hi mahlo ya nwina, muku: A kuliswe Jehova ni le handle ka tiko ga Israeli.
A kukanyisuia ka Jehova.
6A mufana i fanele ku dzunza a raru wakwe, ni xitiri xi ta dzunza a nwinyi wa xona. Makunu loku mina nzi hi raru, gi kwihi a wudzunzo ga mina? Ni loku nzi hi nwinyi, ku kwihi a kuchabyiwa ka mina? ku wula Jehova wa tiyimpi ka nwina vapristi, mu kanyisako a vito ga mina. Mu ngalo: Hi kanyisile a vito ga wena hi yini? Ekso. 20:12
7Mu nyikela a zakuga za nyalidede alatini ga mina. Zonake muku: Hi ku nyenyezisile hi yini? Lezi mu nge ngalo: A meza ya Jehova ya soleka.
8Loku mu maha muphahlo hi xihari xi tileko mahlo, a hi kubiha loko ke? Loku mu nyikela hi lezi zi khwitako ni leʼzi babyako, a hi kubiha loko ke? Loku u wa ta zi yisa ka mufumeli wa wena, i wa ta xalaliswa ha wena ke? I wa ta ku amukela ke? ku wula Jehova wa tiyimpi. Levi 22:20; Deut. 15:21
9Makunu khongelani mahlweni ka Nungungulu, kasi a fela ku hi zwela wuxinji. Xana a ngava ni tipswalo ha nwina lezi mu mahileko a zakunghahi ke? ku wula Jehova wa tiyimpi.
10O loku ku wo khwa i kona xikari ka nwina loyi a nga valako a tinyangwa, kasi mu nga dziveli a nzilo mahala laha alatini ga mina! A nzi xalaliswi hi nwina, ku wula Jehova wa tiyimpi, kambe nzi nga ta amukela a muphahlo wu tiswako hi canja ga nwina.
11Hakuva a vito ga mina ga hombe xikari ka vamatiko kusukela kutsuwukeni ka gambo kala kupeleni ka gona: matshanwini wontlhe ku hiswa a libani vitweni ga mina, zinwe ni minyikelo yi basileko; hakuva a vito ga mina ga hombe xikari ka vamatiko, ku wula Jehova wa tiyimpi.
12Kanilezi nwina ma gi bihisa loku muku: A meza ya Jehova yi na ni chaka, ni zakuga lezi zi yiswako ka yona za soleka.
13Mu engeta muku: Langutani a makaratela ya yona! mu tlhela mu yi njorola, ku wula Jehova wa tiyimpi. Mu neha lezi zi phangilweko, ni lezi zi khwitako, ni lezi zi babyako mu ta maha muphahlo hi zona! Nzi ta zi amukela mandleni ya nwina ke? ku wula Jehova.
14Kanilezi a rukiwe a mukhohlisi, loyi a phahlelako hi lexi xi nga ni bawa laha a ti bohako hi xifungo, kasilezo i na ni matsune ntlhambini wakwe! Hakuva mina nzi Hosi ya hombe, ku wula Jehova wa tiyimpi, a vito ga mina ga chaveka xikari ka vamatiko.
Currently Selected:
Malaki 1: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.