2 Makabhewu 15
15
Gupadwa ga Nikanori
(1 Makabhewu 7:39-50)
1Nikanori, na tivisidwe gupwani Judha gumogo ni masotshwa yaye va di romo mivbinganoni ga Samariya, a di gira gikungo nya gu ya va dhumela na tiyide gwadi khu litshigu nya Sabhadho. 2Vajudha, va nga bani va gurumedzwa gu mu landrela, va di mu kawuka khu matsenya, va ganela, khavo: “U nga giri wusaseli nya wukhongolo mwendro gu va songa khu wurengo. Aholu ninga githawo litshigu li hathidwego ngudzungudzu li agisidwego khu wule a wonago satshavbo.” 3Aholu mwama wule nya guvivbedwe khu monyo, na khuvekide ngudzu a di wudzisa, khuye: “Ina Ndzadzini yomo pfhumu nya tshivba nya gurume gu girwa gialakanyiso nya litshigu nya Sabhadho, gani?” 4Avo va di mu phindrula, khavo: “Ina, khu Pfhumu nya Tshivba Yatshavbo a vbanyago, a guromo Ndzadzini, khuye a rumidego gu gira gialakanyiso nya litshigu nya livbandre na mavili.” 5Khu guralo, uye a di engedza, khuye: “Eni neni nyi mufumeli nyi mukodzi nya satshavbo mafuni, nyi ngu ninga nayo gukheni gu na pharwe matshari, gu na girwe guruma ga mufumeli.” Aholu, tandregide gu tadzisa gikungo gyaye nya wughevenga.
Judha a ngu laya ni gu tiyisela vangana vaye
6Gikhati Nikanori, na gugumugide khu matshandza yaye nya makhongolo, a nga bani na gu pimisa gu vbaha giwonegiso nya gupale gwaye khu silo nya guphangwe ga Judha gumogo ni vabangaladzi vaye, 7Makabhewu a di gu lindrela gikhati gyatshavbo, khu gitumbo nya guvbelele, gukhuye Pfhumu a na mu sayisa khu giphaso gyaye. 8A di gu tiyisela vathu vaye, a va laya gukhuye va si thavi gudhumedwa khu va nya mayigo, ni gukhuye va alakanye siphaso va si manidego na si guta khu ndzadzini, ni gukhuye, olu gambe, va lindrele khu gu tumba kholu Mune nya Tshivba Yatshavbo, a na va ninga gupala. 9A di va tiyisela khu gu va hevbulela wufakazi umo nya Mabhuku nya Nayo ni ya Vaprofeti, a di va dundrugisa mayunga va ma dwanidego gale, a gu va wusedza, khu magirelo yaya, gutiya ni tshivba nya yiphya.
10Hwane nya gu na va tiyiside ni gu va wusela tshivba mihefemuloni gwawe, a di va gira va wona wuvivbi wa va nya mayigo ni gumba tumbega gwawe ga sisambanyo va girago. 11Khu kharati, a di ambagisa givhikelo nya tshivba moyo ni moyo nya masotshwa yaye, nasiri khu sivhikelo nya sitshangu ni matshari, aholu khu gutumba magana yaye nya gutiyise hwambo. Ngudzungudzu, a di va tsakisa khu gu va embela ndroro va fanedego gu khodwa ga iyo, ni giwoniso gi nga tsakisago vathu vatshavbo.
12Giwoniso a gi wonidego khegi: Oniya, a nga bani ari muphasi nya khongolo nya mhamba, mwama nya guthavisege ni wuwadi, nya githawo makhaleloni gwaye, nya makhalelo nya gutsakise, nya maganelelo nya guhambane ni vakwawe, a dzi garadzidego gukhugela wanana waye khu gugira dzindruda ni mithumo yatshavbo nya yadi, na khusedzide mandza a di lombelela khu tshangano watshavbo nya Vajudha. 13A di vbohedwa gambe khu mumbe mwama a nga hambanago ni vambe khu guaga hungoni gwatshavbo khu dzinvi, nya makhalelo nya wuzundzo ni wumburi nya gusamadzise ngudzu.
14Oniya a di ganela, khuye: “Khu yi woni eyi pari ya vandriyago, wule a lombelelago ngudzu khu vathu ni lidhoropa nya gukatege, Jeremiya muprofeti wa Nungungulu.” 15Jeremiya a di khusedza libogo, a gu ningela litshari nya ndralama ga Judha, na gu mu ninga, a di ganela, khuye: 16“Dzega litshari leli nya gukatege, a gu giningwa gya Nungungulu, khu ilo u na pala valala.”
17Na va tiyisedwe khu magana yaya ya Judha, ma dzi kodzago gu ninga tshivba ni gu wusedza wungwazi mihefemulo ya madzaha, Vajudha va di wona nari gwadi guduga lizumboni, va ya dhumela valala ni gu dwana khu tshivba yawe yatshavbo, kholu lidhoropa, wukhodwa gumogo ni Nyumba ya Nungungulu si diri mhangoni. 18Va di si garadzegi ngudzu khu gukhathalela vagadzi, sanana, vandriyawe gumogo ni valongo vawe. Gilo nya guhegule ni lisima gi nga bani gi va vbisisa a diri gu khathalela guagisa Nyumba ya Nungungulu. 19Gu disiri gudugwana gutshaniseka ga vale va nga bani va tshade dhoropani, va di garadzega khu kotani nya litunga li nga bani li gu vbweta gu ya dwanwa vbavbandze, panini. 20Gikhati vatshavbo va nga bani va lindrela guphedwa litunga, valala va di gu hidzimela khu sikwata sawe nya gudwane litunga, dzindzofu na dzi vegidwe wulangani nya wadi ni vakhileli nya dzikavalu na va sasamedzedwe khu dzibambe. 21Makabhewu, a di khedzisa gwadi gidzemo nya gingi gi nga bani gi hidzimela, ni talo nya matshari nya guhambanelane ngudzu, ni guthisa nya dzindzofu, a di khusedza mandza ndzadzini a gu lomba ga Pfhumu, a girago siliwugiso. A di gu dziti gwadi gukhuye gupala kha na gu mana khu tshivba nya matshari, aholu khu gugola gwa Nungungulu a ningago vale a va wonago vari ni fanelo. 22Judha a di lombelela ga Pfhumu khu magana yaya, khuye:
“Uwe Pfhumu, u rumede ngilozi yago,
matshiguni ga Ezekiya mufumeli wa Judheya,
u gu songa lizana ni livbandre na mararu ni livbandre magumi mazana (185.000)
vama nya masotshwa ya Senakeribhi,
23kharato gambe, Uwe Nyadzitshivbe, Pfhumu ya ndzadzini,
rumela olu ngilozi nya yadi,
yi hi thangela, ni gu va thela hwanga ni gusamala.
24Khu tshivba nya libogo lago,
mbembisa vale va gu valago,
va ta dhumela vathu vago nya gukatege.”
Khu magana yaya, a di vbedza nombelo waye.
25 # Wona gambe: 1 Mak 7:43-50. Masotshwa ya Nikanori ma di hidzimela na ma gu womba mipundru ni gu embelela dzindzimo nya nyimbi. 26Aholu avo va Judha va di dwana litunga ni valala, na va gu rana Nungungulu ni gu lombelela. 27Na va gu dwana khu mandza, va di gu lombelela ga Pfhumu khu myonyoni gwawe. Kharati, va di songa gipimo nya magumararu na livbandre magumi mazana (35.000) vama, va dzipwa na va tade khu gutsaka ni tshivba khu gu dzi wonegisa gwa Nungungulu.
28Na li vbede litunga, va di bwelela na va tsakide, va di wona Nikanori na thegide vbavbatshi ni matshari yaye. 29Khavbo avbo, vbakari nya mikulungwane ni gunengela, va di lombelela ga Pfhumu khu lidimi la tigoni gwawe. 30Judha, gukhugela wudzahani gwaye, a nga dzi ningelago wurumba waye watshavbo, givili ni hefemulo, gu vhikela vathu va na gyawe, a di ruma gu pila hungo, mandza ni libogo la Nikanori, va hongola naso Jerusalema.
31Na vbohide dhoropani, a di ramba vathu va tigoni gwaye, ni vaphasi nya mhamba, mbeli nya giluvelo, a di ruma gu ya ranwa gambe avo va nga bani vari likhokholani. 32A di va yeyedza hungo wa Nikanori, muthu nya guvivbedwe khu monyo, ni mandza ya nyaguvivbe yoyu a nga ma khusedza nyambana githawo a wugela Nyumba nya guage ya Mune nya Tshivba Yatshavbo. 33Khu hwane, a di ruma gu piledwa khu sipandre lidimi la muvivbi, gasi gu li rinya ga sinyoni; ni libogo li pidwego kha nga tsayiso nya guvivbe gwaye, li na vbayegwa mbeli nya Nyumba ya Nungungulu. 34Vatshavbo va di khusa maho va khedza ndzadzini, va lombelela ga Pfhumu nya wudhumo, khavo: “A na rungudzwe wule a sayisidego guaga nya nyumba yaye.” 35Judha a di vbayega gambe hungo wa Nikanori vbanyangwatunu nya likhokhola, kha nga giyeyedzo nya lisine ni giwoniso nya wuvhikeli wa Pfhumu. 36#Wona gambe: Est 9:20-32. Va di pwanana, va gu vega nayo, nya gukhavo, litshigu lile kha li na divadwa, gikhati gitago gu na alakanywe litshigu leli, khu litshigu nya likhumi na mararu nya ngima nya likhumi na mivili, wu ranwago pwani Adhari khu lidimi nya giarami, khu litshigu li handzamedzwago khu eli nya buzo wa Moridhokayi.
Guhegisa
37Esi khu sigiro si dugeledego ga Nikanori. Kha nga ulo gukhugela litshigu leli, lidhoropa la Jerusalema li nga simamago gu khala tshivbani ga Vahebheru, aneni nyi na hegisa avba sasamedzo wangu. 38Wa gu bani wu landrisidwe gwadi, wu wuya wu sasamedzwa gwadi khu magirelo nya gutsakise, a diri ugo gugola gwangu; aholu wa gu bani wa sa duga gwadi, mwendro gu bani wa sa vbelela, nyi zamide gu gira avbo nyi nga gu kodza. 39Kha nga olu gu sirigo gwadi gu sela vbinyu basi, mwendro gusela basi mati gikhati gyatshavbo, aholu a gu gwadi ngudzu gu sela vbinyu nya gupatedwe ni mati, kharato nugo, sasamedzo nya wadi nya matimo khu owu wu nengedzisago mudzindzeveni ga muhevbuli. Nyi ngu hegisa khu magana yaya.
Currently Selected:
2 Makabhewu 15: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.