2 Pedro 2
2
Llutan yachatsikuqkuna imanö kawayanqantapis ninqan
Judas 3-16
1Israel nacionchö llulla profëtakuna unay kayanqannömi qamkunachöpis llutan yachatsikuqkuna kayanqa. Paykunaqa Tayta Diospa willakuqnin tukurmi criyitsiyäshurniki manakaqkunata yachatsiyäshunki. Tsaynöllam salvakuq Señor Jesucristutapis ñëgayanqa. Paykunatam juiciu finalchö Tayta Dios illaqpita ushakätsinqa.
2Paykuna yachatsiyanqanta cäsurmi runakunapis warmikunapis jutsata rurar kawayanqa. Tsaynö kawayaptinmi Tayta Diospa willakuyninta pïmaypis manakaqman churayanqa. 3Qellaypä mallaqashqa karmi allish tukullar sakyayäshunki. Paykunata infiernuman qaykunanpä unaypitanam Tayta Dios destinarqan. Paykunataqa pasaypa ñakaymi shuyaraykan.
4Jutsa ruraq angelkunatapis Tayta Dios manam perdonarqantsu, tsaypa rantinqa infiernumanmi qaykurqan. Tsay tsakaymanmi wichqarqan juiciu finalchö juzgananpä.
5Noé kawanqan witsanpis jutsasapa runakunata manam perdonarqantsu. Tsay runakunaqa Tayta Dios munanqannö kawayänanpä Noé willaptinpis manam cäsuyarqantsu. Tsaymi Tayta Dios diluviuwan ushakätsirqan. Tsaynö ushakätsirpis Noéta y qanchis runakunallatam salvarqan.#Gén. 6.1-7; 8.18.
6Tsaynöllam Sodoma y Gomorra markakunatapis uchpayanqanyaq Tayta Dios rupatsirqan.#Gén. 19.24. Tsaynö rurarqan castigakuq kanqanta jutsasapa runakuna tantiyayänanpämi. 7Peru tsay markakunata rupatsirpis Lottam sïqa alli runa kaptin salvarqan. Paymi tsay markakunachö täraq mana alli runakuna jutsata rurayaptin ima ruraytapis puëdirqantsu.#Gén. 19.1-16, 29. 8Paykuna kaqchö tärar jutsata rurayanqanta rikar y manakaqkunata parlayanqanta wiyarmi qoyay qoyay pasaypa llakikurqan.
9Tsaynöpam musyantsik pay munanqannö kawaq kaqtaqa ima ñakaypitapis Tayta Dios salvamänantsikpä kanqanta. Peru jutsa ruraqkunatam sïqa juiciu finalchö pasaypa castiganqa.
10Mana kuyapaypam castiganqa llutalla pïmaywanpis kakuqkunata. Tsay runakunaqa Tayta Diostapis manam cäsuyantsu. Yachaq tukurmi supaykunatapis mana mantsaypa ashlliyan. 11Ciëluchö kaykaq angelkunaqa runakunapita mas poderyuq y Tayta Diospa puntanchö kaykarpis manam supaykunata ashlliyantsu.
12Tsay runakunaqa mana tantiyarmi tsaynö ashlliyan. Ashmakunanö yarpayniynaq karmi wanutsishqa kayänanpä yuriyashqa. Mana allita ruraykäyanqallanchömi ushakäyanqa. 13Wakinkunata ñakatsiyanqanpitam kikinkunapis ñakayanqa. Pïmay rikaymi manakaqkunata rurarpis mana penqakuypa asikachäyan. Qamkuna mikuyänaykipä qorikäyanqaykichöpis llutankunata parlarmi kushikuyan.
14Tsay runakunaqa pï warmita rikarpis munapäyanmi. Jutsata rurarpis manam ajayäyantsu. Manarä shumaq tantiyakuqkunatam llutankunata yachatsiyan. Runa mayinta engañaytaqa imaykanöpam yachayan. Tsaynö kayanqanpitam pasaypa castigashqa kayanqa.
15Tayta Dios munanqannö ñöpata kawashqa karpis kananqa llutankunata rurarmi puriykäyan. Beorpa tsurin Balaam qellay raykur llutanta ruranqannömi paykunapis llutankunata ruraykäyan. 16Qellaypä raykur Balaam aywaykaptinmi china ashnun parlar mana aywananpä micharqan.#Núm. 22.4-35.
17Tsay runakunaqa tsakishqa pukyunö y wakpa kaypa aywaq tsaki pukutaynömi kaykäyan. Paykunapäqa alistashqanam kaykan tsakaykaq paqas [imayyaqpis] tsaychö wichqaräyänanpä. 18Paykunaqa alabakurmi yachaq tukurnin imatapis parlayan. Jutsankunata tsayrä dëjashqa kaqkunatam llutankunata rurayänanpä valuratsiyan.
19Runakunatam promitiyan yachatsiyanqanta chaskir libri kawayänanpä kanqanta. Tsaynö promitirpis kikinkunaqa manam libritsu kayan, sinöqa jutsapa poderninchömi kaykäyan. Ima viciupis runata vinciptinqa tsay viciupa poderninchömi kaykan.#Juan 8.34; Rom. 6.6, 16.
20Salvamaqnintsik Señor Jesucristuman criyikushqa kaykar jutsa rurayllachö yapay kakurqa punta kanqanpitapis peormi tikran.#Mat. 12.45; Luc. 11.26. 21Diospa willakuyninman criyikushqa kaykar yapay jutsata rurananpä kaykaptinqa mejor ama tsay sagrädu willakuyninman criyikuyanmantsu karqan. 22Jutsata yapay ruraqkunapäqa rasuntam niyan: <<Allquqa gumitanqantam yapay mikun. Kuchipis armatsiyaptin yapaymi mituchö pichukuskin>>.#Prov. 26.11.
Currently Selected:
2 Pedro 2: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.