MATIUS 2
2
Manga raho wuassu Ra'i
1Mawu Yesus inasungkangnga su soam Betlehem su wanua Yudea, su tempo pamamarentan Ratu Herodes. Su tempo udde manga pira mapapanden anumpitanna wuassu ra'i nirumanta su Yerusalem. 2I mangitou ma'iwal᷊o su al᷊awo'u tampa, “Suapanete Ana'a udde, apan nasungkangnga maola'a ratun taumatan Yahudi? I yami naasilo anumpitanna nasabangnga wuassu samba'an ra'i, wuṛṛu i yami nirumanta massubba si Tou.”
3Napawe i Ratu Herodes naaringikka olangnge udde, i tou niṛṛumoro atonna, aroddi lai anambon taumata su Yerusalem. 4Ne i tou nandolokken anambon imam tembonanne wuṛṛu manga hurun agama taumatan Yahudi rumanta maammulla. See i tou naiwal᷊ote si mangitou, “Suapa sarun masungkangnga Ratu apan suete nipa'iren Ruata?”
5I mangitou sinumimbakka, “Su soa Betlehem su wanua Yudea. Ana waugu ereindi niwoṛṛettu sangkatou nabi,
6‘I'o Betlehem, su wanua Yehuda,
i'o atonna-tonna wal᷊inewe addio'anne su wallattu al᷊awo'u soa ahunanne su Yehuda.
Ana waugu inasabanganne wuassi'o sarun dumanta sangkatou piaṛṛangnge,
apan sarun mangehetta al᷊aṛṛana-U Israel.’ ”
7Napawe suete naasomba tal᷊aane aroddi, i Herodes namaggote manga mapapanden anumpitanna wuassu samba'an ra'i udde, ringannu mal᷊annaba. Wua'udde i tou naiwal᷊ote si mangitou, ro'en angngera i yamiu nanattakka naasilo anumpitanna udde. 8Wua'udde i tou nandolokke mangitou watukku Betlehem ringannu tanatane indi, “Roote, rea'ete Ana'a udde ringannu ma'uduppa. Wuṛṛu amungkangngu i yamiu maasomba si Tou, wal᷊oa'a si ya'u, tadea'u i ya'u lai inai massubba si Tou.”
9-10Wua'udde i mangitou inaite. I mangitou naasilo lai anumpitanna apan suete niasiloanni mangitou rorone su samba'an ra'i. Lembon lulluassa i mangitou naasilo anumpitanna udde! Anumpitanna udde nalliu ṛoro wuassi mangitou, wua'udde natta'alla su lantakku tampan Ana'a udde. 11I mangitou sinumutta sulal᷊ummu wal᷊e udde wuṛṛu naasilote Ana'a udde ringanni Maria, inangngene. I mangitou inumal᷊intuda wuṛṛu nassubbate ana'a udde see namu'ate tampan darotongngi mangitou wuṛṛu nangonggollen sasamba si Tou wul᷊awanna, amania wuṛṛu mur. 12Ruata napanaungnga si mangitou sulal᷊ummu wal᷊iawa tadea'u imbaṛṛangnga i mangitou mabelengnga ringanni Herodes. Nariaddi i mangitou napul᷊ete niumamatta su lal᷊anna waine.
Tinumal᷊angnga watukku Mesir
13Napawe manga mapapanden anumpitanna udde napul᷊ete, mala'ekattu Mawu naipasilon batangane si Yusuf sulal᷊ummu wal᷊iawa. Mala'ekatta udde nabbisara, “I Herodes pia pandumma madea'a ana'a udde pateanni tou. Ana waugu udde apu'ote, apira'e ana'a udde ringannu inangnge tal᷊anga'e watukku Mesir. Atana'e poiaroddi ma'oman sara i ya'u mabbal᷊o si'o apia.”
14I Yusuf nabangunte, wuṛṛu ṛabbi udde lai tou nangapiddu Ana'a udde ringannu inangngene tinumal᷊angke watukku Mesir. 15I mangitou natana'a poiaroddi, na'oman sara i Herodes nate.
Aroddi nariaddite apa apan suete niwisara Mawu sulal᷊ummu nabi-Ne ereindi, “I ya'u mamaggo Ana'-U wuassu Mesir.”
Pamamate manga al᷊aṛṛana'a
16Napawe i Herodes naasingkatta manungku manga mapapanden anumpitanna wuassu ra'i udde namahia si Tou, i tou nasa'u atonna. Wua'udde i tou nandolokke mapapaten al᷊awo'u ana'a esakka uukke rua tonna inawa su Betlehem wuṛṛu lai su wanua maranine. Udde nassul᷊ungngu tal᷊aane apan niaringiṛṛanna wuassu manga mapapanden anumpitanna udde su tempo anumpitanna udde niasiloanna.
17Aroddi nariaddite apa apan suete niwisara Nabi Yeremia, eteudde,
18“Su Rama niaringikka tingikku lal᷊allu,
sasal᷊iomanna wuṛṛu lal᷊uai.
I Rahel lulluain al᷊aṛṛanangnge;
i tou madiri limbatanna ana waugu al᷊aṛṛanangnge natete.”
Nabelengnga wuassu Mesir
19Napawe i Herodes natete, tantal᷊anna i Yusuf ta'e su Mesir sangkatou mala'ekattu Mawu naipasilom batanganne si Yusuf sulal᷊ummu wal᷊iawa. 20Mala'ekatta udde nabbisara, “Manga taumata apan mamate Ana'a udde natete. Ana waugu udde pabbangunte, apira'e Ana'a udde ringannu inangnge wuṛṛu pabbelengke su Israel.” 21Ne i Yusuf nabangunte, see nangapidden Ana'a udde wuṛṛu i Maria nabelengke su Israel.
22Arawe wua'udde i Yusuf naaringikka manungku i Arkelaus, ana'i Herodes nallol᷊ossa iamangnge maola'a ratu su wanua Yudea. Nariaddi i Yusuf matta'utta inai poiaroddi. Napawe i tou suete naasomba tul᷊adda Mawu panginsueanne sulal᷊ummu wal᷊iawa, i tou inaite su wageangngu leta'u Galilea. 23Isudde i tou natana'a su soa aranne Nazaret. Ringannu aroddi nariaddite apa apan niwatti'u manga nabi su ola'u Ana'a udde: “I tou sarun isaggo taumata Nazaret.”
Currently Selected:
MATIUS 2: LAITLD
Highlight
Share
Copy
Want to have your highlights saved across all your devices? Sign up or sign in